BELIZE is klein maar ryk aan verskeidenheid—van tropiese woude tot ’n turkooiskleurige see wat die talle eilande langs die kus omring. Maar hierdie verskeidenheid wat die natuurskoon betref, is net die begin van Belize se wonders.

Honderde voël- en diersoorte kan in hierdie land gevind word. Van die diere wat daar voorkom, is die kleurryke reënboogbektoekan (Ramphastos sulfuratus) en die Baird-tapir (Tapirus bairdii)—’n dier met ’n rubberagtige neus wat verwant is aan die renoster en op land en onder water vinnig kan beweeg! Dan is daar ook die alleenlopende jaguar (Panthera onca). Trouens, die wêreld se eerste jaguarreservaat is in Belize.

Belize het vroeër deel uitgemaak van die Maja-beskawing. Spaanse veroweraars het in die 16de eeu daar aangekom, maar hulle het die Majas nie heeltemal oorwin nie. Later het die Britte beheer oor die gebied verkry, en in 1862 het hulle dit amptelik as ’n kolonie verklaar en dit Brits-Honduras genoem. In 1981 het Belize onafhanklikheid verkry.

 Die mense van Belize is net so kleurryk soos hulle omgewing. Party van die vernaamste etniese groepe is Kreole, Oos-Indiërs, Garifunas, Majas en Mestizo’s. Die mense is vriendelik en beleefd. Kinders gebruik dikwels die woorde “Juffrou”, “Mevrou” of “Meneer” wanneer hulle met volwassenes praat.

In Belize is daar gemeentes van Jehovah se Getuies in Amerikaanse Gebaretaal, Belize-Kreools, Engels, Mandaryns, Maja (Mopán), Nederduits en Spaans. In 2013 het omtrent 1 uit elke 40 mense in Belize die Herdenking van Christus se dood saam met die Getuies bygewoon.