Wɔ mmenii sʋ̃maa bɔ ɔfʋã nu nɩ, mmenii mɔɔ ɩsʋnɩ bɔ nnwʋnlamɩ anyɩ mɔɔ bekilaa ɔhʋanɩ kɛɛ bɛ nɩɩ bɛ keli wɔ ɔhʋanɩ ɔkʋ̃ zʋ nɩ ɩlɛ́balɩ nu.

•   “Wɔ oyuwadɩ yɩ ɔfʋã dɩka bela nɩ, mmenii mɔɔ ɩsʋnɩ bɔ nnwʋnlamɩ anyɩ mɔɔ bɛ nɩɩ bɛ iáli wɔ ɔhʋanɩ ɔkʋ̃ zʋ nɩ fa nkyɩkyɛmi ba ahyɩhyɛdɩ, okuwu nɩɩ mmenii azʋlɔtʋ munwala bɛ ɛbɩlawɔlɛ nu. Ɩma mmenii sʋ̃maa bɛ nɩɩ bɔ nwʋ bɔ nwʋ iáli yi bʋwɔ.”—António Guterres, Amanlɩ Amanlɩ Nkabomi Bɛ Ɛhɛlɛlɛvʋlɔ Ebani.

 Mmenii mɔɔ ɩsʋnɩ bɔ nnwʋnlamɩ anyɩ mɔɔ bɛ nɩɩ bɛ keli wɔ ɔhʋanɩ ɔkʋ̃ zʋ nɩ, asʋ̃ ɩkɛɣa nu a? Mɩnla yɛ Bayɩbʋlʋ yɩ kã a?

 Bayɩbʋlʋ yɩ bʋwa yɛ ma yɛnwʋ kezimɔ Nyamɩnlɩ bu mmenii mɔɔ ɩsʋnɩ bɔ nnwʋnlamɩ anyɩ nɩ.

•   “Nyamɩnlɩ ɩwɔlɩ enii ɔkʋ̃ na iluwa yɩ zʋ ɩmanlɩ mmenii azʋlɔtʋ munwatĩĩ mɔɔ bɔwɔ oyuwadɩ nɩ bɛɣalɩ. Ɩmanlɩ bɔwʋwalɩ nnɩka nnɩka wɔ oyuwadɩ nɩ nu munwatĩĩ.”—Egyima 17:26.

•   “Nyamɩnlɩ ɩába mmenii nu. Nyamɩnlɩ ide abiyela mɔɔ ɩyɛ yɩ nɩ na ide pɛlɩpɛlɩ itiã nu, mɔɔ iáhila dɩka mɔɔ ɩzʋ̃ nɩ a.”—Egyima 10:34, 35.

 Bayɩbʋlʋ yɩ da yɩ ali kɛɛ mmenii munwala bɔzʋ̃ abusunwa ɔkʋ̃ nu na Nyamɩnlɩ de mmenii munwala tiã numɔ.

 Nyamɩnlɩ Bulombunlililɛ, mɔɔ ɩdɩ sʋlɔ aɣanɩ nɩ yɛ ɩkɛma mmenii mɔɔ ɩsʋnɩ bɔ nnwʋnlamɩ anyɩ nɩ kɛyɛ ɔkʋ̃ a. Ɔzɔ aɣanɩ yɩ kehilehile mmenii ma bɔkɔnwʋ kezimɔ ɩsɛ kɛɛ bɛ nɩɩ bɔ nwʋ bɔ nwʋ di wɔ ɔhʋanɩ baaba zʋ. Mmenii kozuma kezimɔ bekeli nɣanlɩdɩlɛ bela mɔɔ ɩfalɩ mmenii mɔɔ ɩsʋnɩ bɔ nnwʋnlamɩ anyɩ mɔɔ bɛ nɩɩ bɛ iáli yi bʋwɔ nɩ zʋ.

•   ‘Bɛzabɛ mɔɔ bɛda azɩlɛ yɩ zʋ nɩ kozuma ɛdɩnɣɛlɛ.’—Ayɩzaya 26:9.

•   “Azʋ̃nudwolɩyɛ ɩzʋ̃ nɔhʋanlɛ ɛdɩnɣɛlɛ nu ɩkɛɣa, na nɔhʋanlɛ ɛdɩnɣɛlɛ ikozo azʋ̃nudwolɩyɛ nɩɩ banɩwɔlɛ mɔɔ ɩkɔwʋwa ɛkɛnɩ daabaa.”—Ayɩzaya 32:17.

 Nnɛ, mmenii abʋmɩ abʋmɩ sʋ̃maa bosumaa kezimɔ bɛ nɩɩ mmenii mvʋlɔ keli wɔ owulɛ nɩɩ annidi ɔhʋanɩ zʋ wɔ Bayɩbʋlʋ yi nu.

•   Sɛ ɛpɛ kɛɛ ɔnwʋ sʋ̃maa a, kɩnga odwokɔ mɔɔ ɩwɔ Awake! nu mɔɔ ise “Ɛdanɩlɛ—Asʋ̃ Yi Munwa Awudo Wɔ Kɛ a?”

•   Kɩnga odwokɔ mɔɔ ise “Kezimɔ Ɛ Nɩɩ Wʋ Nnwuakula Kɔwɔ Mmenii Mɔɔ Ɩsʋnɩ Bɔ Nnwʋnlamɩ Anyɩ Mɔɔ Bɛ Nɩɩ Bɛ Iáli Yi Bʋwɔ Nwʋ Nkɔmmɔ” na wʋanwʋ kezimɔ awʋvʋlɔ nɩɩ bo nnwuakula kɔwɔ odwokɔ eyi nwʋ nkɔmmɔ wɔ awudo.