Eŋɛnywiwema Luiki Tɔ 3:1-38
3 Le exwe 15 tɔ mɛ nɔ Tibɛ Seza cɛkpakpaɔ, Pɔnsi Pilati nyi ejujikpɔtɔ le Ʒude, Erodi* nyi Galile jujikpɔtɔ,* nɔviɛ Filipu nyi ejujikpɔtɔ le Iture koɖo Trakoniti yí Lizaniasi nyi ejujikpɔtɔ le Abilɛnu.
2 Hwenɔnuɔ, Anasi nyi avɔnsatɔwo ga yí Kayifu nyi avɔnsatɔ gangantɔ, eyi Mawu ŋɛdu va nɔ Ʒan, Zakari vi le zogbeji.
3 Eyi Ʒan dan kpedo eju ciwo pleŋ yí trɔdo Ʒurdɛn yí nukɔ Mawu nyɔ nɔ amɛwo mɔ, woɖo awa ʒinʒindoshimɛ asɔ dasɛ mɔ yewotrɔ ji mɛ nɔ woasɔ nuvɔnwo ke wo,
4 shigbe lé woŋwli do enyɔnuɖɛtɔ Ezai wema mɛ nɛ mɔ: “Mɛɖeka dodoɔ axwa le zogbeji yí nunuɔ mɔ: ‘Mídra Yehowa* mɔ do! Míwɛ nɔ yi mɔwo ajɔ.
5 Woɖo acu baliwo pleŋ, woɖo agban eto koɖo eto hwɛhwɛwo pleŋ yí woale tawɛ. Emɔ zanzanwo ɖo atrɔ emɔ jɔjɔwo yí emɔ glijaglijawo aza
6 yí agbetɔwo* pleŋ akpɔ hwlɛngan Mawu tɔ.’”*
7 Eyi etɔ nunu nɔ amɛ sugbɔ ciwo yí va mɔ yɛ le ʒin yewo do shi mɛ mɔ: “Zakpata viwo, mi yí nu nɔ mí mɔ míwo le shi nɔ Mawu dɔmɛzi ci yí gbɔgbɔɔ?
8 Nɔ ahan yɔ nɛɔ, mísɛn ku ciwo yí dasɛ mɔ mítrɔ ji mɛ. Míŋgbetɔ nunu le míwoɖekiwo mɛ mɔ, ‘Abrahamu yí nyi mìwo da’ o. Ðo ŋnukɔ nɔ mí mɔ Mawu atɛnŋ ana yí eviwo ato so ekpe cɛwo mɛ nɔ Abrahamu.
9 Le nyɔnɔnwi mɛɔ, efiɔ le aci lɔwo kewo ji vɔ. Eyi taɖo woaso aci ɖekpokpui ci yí desɛnnɔ eku nywi yí adɔɛ ɖaɖa zo mɛ.”
10 Amɛahwa lɔ biɔ Ʒan se mɔ: “Ecɛyɛ ɖe, nyi mìɖo awaɔ?”
11 Éɖo ŋci nɔ wo mɔ: “Mɛ ci yí wa awu amɛve* ɖɛ le na mɛ ci shi eɖe dele o yí mɛ ci yí wa ŋɖuɖu ɖɛ le wɛ ahan hɛnnɛ.”
12 Tagajɔtɔwo ŋtɔkpu va mɔ woaʒin yewo do shi mɛ hɛnnɛ. Eyi wobiɔɛ se mɔ: “Enukplamɛtɔ, nyi mìɖo awaɔ?”
13 Énu nɔ wo mɔ: “Míŋgbexɔ* taga wu ci amɛwo ɖo ana o.”
14 Sɔjawo can biɔɛ se mɔ: “Nyi mìɖo awaɔ?” Énu nɔ wo mɔ: “Míŋgbexɔ nuwo le mɛɖe shi koɖo akpasɛnsin* alo akan ŋsu do nu nɔ mɛɖe o, vɔ enu* ciwo wonanɔ mí le jeŋ nɔ mí.”
15 Jukɔn lɔ le emɔ kpɔkɔ, eyi taɖo wo pleŋ biɔkɔ wowoɖekiwo se so Ʒan nu mɔ, “Alo eyi nyi Kristo lɔa?”
16 Ʒan nu nɔ wo pleŋ mɔ: “Enyɛɔ, eshi mɛ yí ŋʒinkɔ mí do, vɔ mɛ ci yí sɛnŋ wuŋ gbɔgbɔ, ŋdeje acu yi fɔkpakawo o. Yɛazan gbɔngbɔn kɔkɔɛ koɖo ezo asɔ wa ʒinʒindoshimɛ nɔ mí.
17 Jinukufunu yitɔ le alɔ̀ mɛ ni yí akplɔ fini etonɔ yi jinuku le mɛmɛmɛ. Áɖo yi jinuku lɔ ɖɛ, vɔ átɔ zo akpa lɔ yɛ yí wodasɛnŋ aci ezo lɔ o.”
18 Ékpla nu wo mɔ, wo le wa enu sugbɔ buwo hɛnnɛ yí kpɔtɔ dradra eŋɛnywi lɔ nɔ jukɔn lɔ.
19 Vɔ Ʒan gbe nyɔ nɔ ejujikpɔtɔ Erodi do Erodiasi ci yí nyi fofoɔ shi koɖo nuvwin ciwo pleŋ ewa ŋci.
20 Eyi taɖo Erodi gbewa nuvwin bu sɔ ta nɔ ŋcɛwo pleŋ ci ewa yí cu Ʒan do gakpa mɛ.
21 Hwenu woʒinkɔ amɛwo pleŋ do shi mɛɔ, woʒin Yesu can do shi mɛ hɛnnɛ. Eyi ci edodoɔ gbe ɖaɖaɔ, jeŋkwi hun.
22 Eyi gbɔngbɔn kɔkɔɛ le shigbe hwanlin nɛ yí je ji. Egbe ɖeka ɖyi so jeŋkwi mɛ hɛnnɛ yí mɔ: “Eo yí nyi Vinyɛ ci kɔ ŋdelɔnnɔ nu le o. Ao nu kpenɔ nɔŋ.”
23 Exwe 30 han yí Yesu ɖo yí tɔ yi dɔ lɔ ji yí shigbe lé amɛwo jeshi ɖɛ do nɛɔ,ényi Ʒozɛfu vi,Ʒozɛfu nyi Heli vi,
24 Heli nyi Matati vi,Matati nyi Levi vi,Levi nyi Mɛlki vi,Mɛlki nyi Ʒanayi vi,Ʒanayi nyi Ʒozɛfu vi,
25 Ʒozɛfu nyi Matatiasi vi,Matatiasi nyi Amosu vi,Amosu nyi Naxum vi,Naxum nyi Esili vi,Esili nyi Nagayi vi,
26 Nagayi nyi Maat vi,Maat nyi Matatiasi vi,Matatiasi nyi Semɛ vi,Semɛ nyi Yosɛki vi,Yosɛki nyi Yoda vi,
27 Yoda nyi Yoana vi,Yoana nyi Reza vi,Reza nyi Zorobabɛli vi,Zorobabɛli nyi Salatiɛli vi,Salatiɛli nyi Nɛri vi,
28 Nɛri nyi Mɛlki vi,Mɛlki nyi Adi vi,Adi nyi Kosamu vi,Kosamu nyi Elimadamu vi,Elimadamu nyi Ɛr vi,
29 Ɛr nyi Yesu vi,Yesu nyi Eliezɛ vi,Eliezɛ nyi Yorimu vi,Yorimu nyi Matati vi,Matati nyi Levi vi,
30 Levi nyi Simeɔn vi,Simeɔn nyi Ʒudasi vi,Ʒudasi nyi Ʒozɛfu vi,Ʒozɛfu nyi Yonamu vi,Yonamu nyi Eliakimu vi,
31 Eliakimu nyi Melea vi,Melea nyi Mɛna vi,Mɛna nyi Matata vi,Matata nyi Natan vi,Natan nyi Davidi vi,
32 Davidi nyi Ʒɛse vi,Ʒɛse nyi Obɛdi vi,Obɛdi nyi Boazi vi,Boazi nyi Salumɔ vi,Salumɔ nyi Nasɔn vi,
33 Nasɔn nyi Aminadabu vi,Aminadabu nyi Arni vi,Arni nyi Hɛzrɔn vi,Hɛzrɔn nyi Perɛzi vi,Perɛzi nyi Ʒuda vi,
34 Ʒuda nyi Ʒakɔbu vi,Ʒakɔbu nyi Izaki vi,Izaki nyi Abrahamu vi,Abrahamu nyi Tera vi,Tera nyi Naɔr vi,
35 Naɔr nyi Serugi vi,Serugi nyi Rewu vi,Rewu nyi Pelɛgi vi,Pelɛgi nyi Ebɛ vi,Ebɛ nyi Shela vi,
36 Shela nyi Kayinamu vi,Kayinamu nyi Arfaxadi vi,Arfaxadi nyi Sɛmu vi,Sɛmu nyi Nowe vi,Nowe nyi Lamɛki vi,
37 Lamɛki nyi Metusala vi,Metusala nyi Enɔki vi,Enɔki nyi Yerɛdi vi,Yerɛdi nyi Mahalɛli vi,Mahalɛli nyi Kayinamu vi,
38 Kayinamu nyi Enɔsi vi,Enɔsi nyi Sɛti vi,Sɛti nyi Adamu vi,Adamu nyi Mawu vi.
Gɔnmɛnuŋwlɛnŋwlɛn
^ Eyi nyi Erodi Antipasi. Kpɔ Enyɔgbe Veviwo mɛ Ðeɖe.
^ Yi gɔnmɛɖeɖe tiin: “Tetraki.” Ahan woyɔnɔ efyɔ ci yí kpɔkpɔ eju ɖe ji nɔ Rɔma Cɛkpatɔ lɔ nɛ.
^ Kpɔ Enumɛɖeɖewo A5.
^ Yi gɔnmɛɖeɖe tiin: “ŋcilanwo.”
^ Alo “lé Mawu ahwlɛn amɛ gan do.”
^ Alo “awu bu.”
^ Alo “Míŋgbejɔ.”
^ Alo “Míŋgbetafu mɛɖe o.”
^ Alo “fɛncu.”
