“Denyi agbetɔwo ɖekɛ nu yí Yehowa Kunuɖetɔ lɔwo donɔ vivi do o, wodonɔ vivi do anyi vuwo nu hɛnnɛ. Gbeɖekaɔ, Elaine ci yí le te le kekevi lɔ gbɔ na kpɔnnɔvi anyi vuvi amɛve lɔwo. Le yɛ godu, hweɖekpokpuinu ci mìvayikɔ yí gogo fini wonɔnɔɔ, avu lɔwo jinɔ mɔ yewoayi Kunuɖetɔwo gbɔ keŋ axɔ kpɔnnɔvi.

“Ci wleciwo vayikɔɔ, avuvi lɔwo kpɔtɔ yikɔ Kunuɖetɔ lɔwo gbɔ yí xɔkɔ wowo kpɔnnɔvi yí nyɛ can ŋkannɔ seŋ kleŋkleŋwo koɖo wo. Vɔ ŋdejinɔ mɔ makan seŋ sugbɔ koɖo wo o. Hwenɔnuɔ, ŋɖo wu exwe 70 yí ŋdenya enu ciwo ji yí Kunuɖetɔwo xɔ se o. Ci enu ci cɔciwo wakɔ dejɔ ji nɔŋ ɔ, ŋɖui mɔ nakpla Bibla nyɛŋtɔ.

“Hwenɔnuɔ, ŋgbekpɔnɔ Kunuɖetɔ buwo le akpaxwe vovovowo nɔ jugan lɔ yí wonɔnɔ te le kekeviwo gbɔ. Wowo can donɔ vivi amɛ nu. Wosɔ Bibla ɖonɔ anyi nyɔwo ŋci gashiagamɛ, eyi ŋvatɔ kankando wo ji vivivi.

“Gbeɖekaɔ, Elaine biɔŋ se mɔ, ‘Èxɔɛ se mɔ elanwo nyi enunana so Mawu gbɔa?’ Eyi ŋɖo ŋci ni mɔ, ‘Aɛ, ŋxɔɛ se ahan!’ Elaine hlɛn Ezai 11:6-9 nɔŋ. So hwenɔnuɔ, ŋji mɔ manya enu sugbɔ so Bibla nu, vɔ ŋdeji mɔ naxɔ wowo wema ɖe o.

“Le ŋkeke ciwo yí kplɔɛdo mɛɔ, ŋkpɔtɔ kannɔ seŋ kleŋkleŋwo koɖo Elaine koɖo asuɔ Brent yí seŋ lɔwo vivinɔ. Wodo ŋsɛnŋ mɔ nyɛ le hlɛn so Matie yi Edɔwawawo wema ji keŋ akpɔ lé Kristotɔwo ɖo awa nu do. Eyi ŋhlɛn wo. Dejinjin gbɔxwe yí ŋlɔn mɔ Brent koɖo Elaine le kpla Bibla koɖoŋ o. Ci mìle mamamɛ nɔ exwe 2016 yí ŋtɔ Bibla kplakpla.

“Kwɛshila ɖeka duuɔ, kpakpa sɔnɔŋ mɔ makpla nu yí ayi bɔbɔwo le Fyɔɖuxuxɔ mɛ. Ejɔ ji nɔŋ sugbɔ mɔ ŋvanya nyɔ ci teŋ Bibla nu. Xwe ɖeka koɖo ŋɖe goduɔ, ŋwa ʒinʒindoshimɛ yí trɔ Yehowa Kunuɖetɔ. Ecɛyɛɔ, ŋɖo exwe 79 yí eji jɔkɔŋ mɔ ŋkpɔ sɛnsɛn adodwitɔ lɔ. Yehowa cu shi nɔŋ ci ekpedo ŋnu ŋvanyi ɖeka le yi sɛntɔwo mɛ.