1. Кандый кӧгӱс амадулар тургузарга јараар?

 БИС, Иисустыҥ ӱренчиктери, Иегова Адабысты сӱреен тыҥ сӱӱп јадыбыс. Оныҥ учун ого эҥ артыгын берерге кӱӱнзейдис. Је кӧгӱс јанынаҥ эҥ артыгын берерге, кӧгӱс амадулар тургузар керек b. Темдектезе, христиан кылык-јаҥдарга ӱренерге јараар, темигӱлерди тыҥыдарга јараар, анайда ок улуска болужатан аргалар бедиреп турарга јараар.

2. Нениҥ учун кӧгӱс амадулар тургузар керек? Нениҥ учун бу амадуларга јединерге албаданар керек?

² Бис кӧгӱс јанынаҥ ӧзӧргӧ нениҥ учун албаданып турганыс? Тӧс шылтагы — теҥеридеги Иегова Адабысты сӱӱндирерге кӱӱнзейдис. Ого иштееринде бастыра јайалталарысты ла аргаларысты тузаланып турзаас, оны сӱӱндиредис. Анайда ок кӧгӱс јанынаҥ ӧзӱп турзаас, ака-эјелерге бистеҥ туза кӧп болот (1 Фес. 4:9, 10). Чындыкта јӱргенис удап та калган болзо, биске ончобыска кӧгӱс јанынаҥ ӧзӧр керек. Је мыны канайып эдер?

3. Павел Тимофейди неге кӱӱнзеткен? (1 Тимофейге 4:12—16).

³ Апостол Павел Тимофейге баштапкы самаразын бичип турарда Тимофей јиит те болзо, ченемелдӱ аксагал болгон. Андый да болзо, Павел оны кӧгӱс јанынаҥ оноҥ ло ары ӧссин деп кӱӱнзеткен. (1 Тимофейге 4:12—16 кычырыгар, ЈТ.) Павел Тимофейге эки немеде оноҥ ары ӧссин деп јӧп берген: 1) христиан кылык-јаҥын тыҥытсын деген, темдектезе, «сӱӱште, бӱдӱп јӱреринде ле ару јӱреринде» тем болзын деген, 2) ӱредетен, кычыратан, тӱзедетен темигӱлерин тыҥытсын деген. Кӧгӱс јанынаҥ ӧзӧргӧ, Тимофейдиҥ темин шӱӱжип, кандый амадулар тургузып алзаас јакшы болор деп кӧрӧрис. Анайда ок  Иеговага кӧптӧдӧ иштеерге кандый аргалар бар деп билип аларыс.

4. Иегова Тимофейди нениҥ учун баалаган? (Филиппыдагыларга 2:19—22).

⁴ Иегова Тимофейди нениҥ учун баалаган? Нениҥ учун дезе Тимофей христиан кылык-јаҥга сӱреен јакшы ӱренип алган болгон. (Филиппыдагыларга 2:19—22 кычырыгар, ЈТ.) Павел Тимофейди јобош, иштеҥкей, бӱдӱмјилӱ, чындык кижи деген. Тимофей ака-эјелерди сӱӱген, олорго болужып туратан. Оныҥ учун Павел Тимофейди баалаган, ого јеҥил эмес јакылталар берерге коркыбаган (1 Кор. 4:17). Анайып ла бис христиан кылык-јаҥга ӱрензеес, Иегова бисти оноҥ тыҥ сӱӱр, а јуунга бистеҥ туза оноҥ кӧп болор (Сар. 25:9; 138:6).

5. а) Кандый кылык-јаҥысты тыҥыдатанын канайып билип аларыс? б) Јурукта кӧргӱзилгениле, улусты јакшы оҥдоп турарга, эје нени эдет?

⁵ Амаду тургузыгар. Иеговага мӱргӱп, кандый кылык-јаҥдараарды тӱзедетенин шӱӱп сананыгар, оныҥ кийнинде дезе бирӱзин талдап алыгар. Темдектезе, слер улусты јакшы оҥдоп турарга кӱӱнзеп турганаар, ол эмезе ака-эјелерге болужатан кӱӱнеерди тыҥыдарга турганаар, эмезе улусла ачынышпаска ла ака-эјелердиҥ јастыраларын акту кӱӱнеердеҥ таштаарга кӱӱнзеп јадаар. Мындый сурактар јанынаҥ најыгар нени сананып турганын сурап угыгар (Укаа 27:6).

6. Кажы бир христиан кылык-јаҥга ӱренип аларга, слерге не болужар?

⁶ Амадугарга јединерге албаданыгар. Слерге не болужар? Мындый план тургузып аларга јараар. Озо ло баштап тыҥыдарга турган кылык-јаҥыгарды бастыра јанынаҥ шиҥдеп кӧрӱгер. Темдектезе, слерге улустыҥ јастыраларын таштаарга кӱч болуп турган болзын. Недеҥ баштаарга јараар? Агару Бичикте улустыҥ јаманын јеҥил таштаган улустыҥ темдери бар, анайда ок улустыҥ јаманын таштабаган улустыҥ темдери бар. Бу темдерди шӱӱп сананыгар. Је эҥ ле јакшы темди Иисус Христос кӧргӱскен (Лука 7:47, 48). Ол дезе бу улустыҥ јастыраларына эмес, карын озо ло баштап олор канайып солынып каларына ајару эдип туратан. Је фарисейлер улусты эш кереги јок деп кӧрӧтӧн (Лука 18:9). Бу эки чек башка улустыҥ темдерин сананып, бойыгардаҥ сурагар: «А мен озо ло баштап улустыҥ незин кӧрӧдим? Олорды кандый кылык-јаҥду  деп кӧрӧдим?» Слерге та кемниҥ де јаманын таштаарга јеҥил эмес болуп турган болзо, бу кижиниҥ канча ла кире кӧп јакшы кылык-јаҥдарын бичип алала, бойыгардаҥ сурагар: «А ол керегинде Иисус нени сананып турган? Ол оныҥ јаманын таштаар беди?» Бу план слерди ачындырган кижиге чын кӧрӱмдӱ болорго болужар. Је слерге улустыҥ јаманын таштаарга капшай ла јеҥил боло берер деп сананбагар. Андый да болзо, бу план аайынча эдип турзаар, бир эмеш ӧйдӧҥ слерде јакшы келиже берер.

7. Эпчил ишчилер сӱреен јаан иш эдерге, Иеговага канайып болужат? (Укаа сӧстӧр 22:29).

⁷ База бир јакшы амаду — кандый бир тузалу немеге ӱренип алары. Каандыктыҥ Тураларын, Курултайлардыҥ Тураларын, анайда ок Бет-Элдер тудуп турган ака-эјелер керегинде сананып ийзеер де. Олордыҥ кӧбизи туралар эш тудуп билбес болгон, је бу проекттерге келеле, анда ченемелдӱ кӧгӱс ака-эјелерле кӱнӱҥ сайын иштенип, керектӱ немеге ӱренип алган. Анайда ок јурукта кӧргӱзилгениле, кӧп ака-эјелер бистиҥ организацияныҥ тураларын јазаарга ла кичеерге ӱренип јат. «Чактардыҥ Кааны» — Иегова ла «каандардыҥ Кааны» — Иисус мындый иштеҥкей ака-эјелердиҥ колыла сӱреен јаан иш эдип турган! (1 Тим. 1:17; 6:15; Укаа сӧстӧр 22:29 кычырыгар). Бис ченемелисле, јайалталарысла бойысты мактаарга эмес, је акту-јӱрегистеҥ Иегованы мактаарга тузаланарга јадыс (Иоанн 8:54).

8. Кандый темигӱге ӱренерин канайып билип алар?

⁸ Амаду тургузыгар. Слер неге ӱренип алган болзоор, јакшы болор эди? Бу керегинде аксагалдардаҥ ла ол эмезе аймак кӧрӧӧчинеҥ сурап угарга јараар. Темдектезе, олор слерге: «Куучын-эрмек айдатан ла ӱредетен темигӱгерди тыҥыдыгар» — деп айдып берер. Је мында слерге олордоҥ сурап ийер керек, неге ӱренетенин чокумдап айдып берзин деп. Олор чокум, јарт айдып берзе, ого бир эмештеҥ ӱренигер. Бого ӱренерге нени эдер керек?

9. Кандый бир темигӱге ӱренип аларга нени эдер керек?

⁹ Амадугарга јединерге албаданыгар. Темдектезе, слер ӱредетен темигӱлереерди тыҥыдар деп шӱӱп алганаар. Мынайып эдерге, «Кычыратан ла ӱредетен темигӱлериҥди тыҥыт» деген брошюраны ӱзе бӱдӱнге шиҥдеп алзаар, јакшы болор. Оноҥ иштеер кӱндерде ӧдӱп турган туштажуда пунктты ӧткӱрердеҥ озо, ченемелдӱ аканы слердиҥ белетенип јатканаарды кӧрӱп ийзин деп сурагар. Ол слерге нени тӱзедип ийетенин айдып берер. Ака-эјелер слерди јӱк ле темигӱлереерди јакшы тыҥыдып алганаарды эмес, је озо ло баштап иштеҥкей ле бӱдӱмјилӱ кижи деп кӧрзин (Укаа 21:5; 2 Кор. 8:22).

10. Кандый бир темигӱге ӱренерге кӱч болзо не болужар? Тем куучындап беригер.

¹⁰ Кезик темигӱлерге ӱренерге јеҥил эмес болордоҥ айабас. Нениҥ учун дезе бӱткен бӱдӱмистеҥ улам кезик немени эдерге кӱч болот. Алдырбас, санааркабагар! Темдектезе, Гэри акага тӱрген кычырарга коркышту кӱч болгон. Оныҥ учун јуунныҥ туштажуларында ого Агару Бичикти кычыратан јакылта берзе, ол уйалганынаҥ улам јердиҥ алдына арай кире бербей туратан. Је ол бойынаҥ чӧкӧбӧгӧн, кычырарында оноҥ ло ары тазыктырынган. Эмди дезе ол ченемелдӱ акалардыҥ, анайда ок бистиҥ бичиктерде берилген јӧптӧрдиҥ болужыла сценада  уйалбай јат, керек дезе аймак ла регионныҥ курултайларында куучын-эрмектер айдат.

11. Биске агару ишке Тимофей чылап кӧп туружарга не болужар?

¹¹ Тимофей улу ӱредӱчи, ол эмезе куучын-эрмектерди сӱреен јакшы айдар кижи болуп калган ба? Бу керегинде Агару Бичик нени де айтпай јат. Је Тимофей Павелдиҥ берген јӧптӧрин тузаланып, јуунныҥ иштерин јакшы бӱдӱрерге ӱренип алган (2 Тим. 3:10). Оныҥ учун бистер де кӧп темигӱлерге ӱренип алзаас, Иегова бисти агару иште кӧп тузаланар.

12. Ака-эјелер биске канайып болушкылайт?

¹² Биске ака-эјелердиҥ болужы сӱреен керектӱ. Темдектезе, эмденип турган ака-эјелер больницаларла колбожор комитеттеги акаларга, анайда ок оору улусты кӧрӱп турган бӧлӱктиҥ акаларына быйанын айдат. Анайда ок бистиҥ јӱрӱмисте улай-телей кӱчтер боло берзе, бир де ӧйин кысканбай, бисти лаптап угуп турган ла токунадып турган аксагалдарыска быйанду болуп јадыс. Бого коштой ченемелдӱ пионерлер јок болгон болзо, не болор эдис не? Андый ака-эјелер бистиҥ ӱредӱлериске барып, јӧптӧр берип болушкылайт. Бу ончо ака-эјелер јуунныҥ улузына болужарга јаантайын белен. Бис те олордый ок кӱӱн-санаалу болорго албаданып турзаас, олор ло чылап сӱӱнчи аларыс. Оныҥ да учун Иисус мындый сӧстӧр айткан: «Алып турганы эмес, берип турганы оноҥ артык ырысту» (Ап. ижи 20:35, ЈТ). Је ака-эјелерге јаан болуш болорго нени эдер керек?

13. Амаду тургузып турзаас, нени ундыбас керек?

¹³ Бис кандый амаду тургузып турганысты јап-јарт оҥдоп турар учурлу. Темдектезе, слер јуунга кӧп болужарга амадап јадаар. Је бу амадуга једерге нени эдетени бойоорго јарт болор бо? Ол эмезе амадугарга јединип алганаарды канайып билип ийереер? Оныҥ учун нени эдерге турганаарды слер бойоор јап-јарт оҥдоп турар учурлу. Амадугарды чаазынга бичип алала, оны канай бӱдӱретенине план тургузып алзаар, сӱреен јакшы болор эди.

14. Амадугысты солыырга нениҥ учун белен болор керек?

¹⁴ Кезикте айалгалар солына берзе,  тургузып алган амадуны солыырга келижип јат. Апостол Павелдиҥ темин кӧрӱп ийектер. Оныҥ шылтузынаҥ улам Фессалоникада јуун тӧзӧлгӧн. Оныҥ учун Павел бу јуунда артып калала, јаҥы ака-эјелерге болужарга амадаган. Је истежӱлер боло берерде, ого бу каланаҥ качарга келишкен (Ап. ижи 17:1—5, 10). Оноҥ ӧскӧ, ондогы ака-эјелер јеткерлӱ айалгада болуп калар эди. Је Павел планы солына берген де болзо кунукпаган. Ол Фессалоникада ака-эјелерге болуш эдип Тимофейди аткарган (1 Фес. 3:1—3). Ака-эјелер дезе Тимофейдиҥ мындый болужы учун јаан быйанду болгондор.

15. Айалга солына берзе, амадуларла не боло берет? Тем куучындап беригер.

¹⁵ Апостол Павелдиҥ бу учуралынаҥ биске јаан ӱредӱ бар. Кезик кӧгӱс амадуларыска айалга солына бергенинеҥ улам једип болбостоҥ айабазыс (Эккл. 9:11). Андый айалга слердиҥ јӱрӱмигерде болгон болзо, једингедий ӧскӧ амаду тургузып алыгар. Тед ле Хайди деп эш-нӧкӧрлӧрдиҥ учуралын кӧрӱп ийектер. Олорго уйан су-кадыгынаҥ улам Бет-Элдеги ижин артыргызарга келишкен. Је олордыҥ Иеговага сӱӱжи тыҥ болгоны учун олор иштейтен ӧскӧ аргалар бедирегилеген. Озо баштап олор текши пионерлер болгон. Оноҥ олорды специальный пионерлер эдип кӧстӧгӧн, а Тед дезе аймак кӧрӧӧчиниҥ ордынчызына ӱренип алган. Бир эмеш ӧйдӧҥ аймак кӧрӧӧчилердиҥ некелтелерин солып ийерде, олордыҥ јажы келишпей калган. Оныҥ учун бу да амадузын солыырга келишкен. Амадуларыҥ мынайып келишпей турза ачу эмей, је Иеговага иштейтен ӧскӧ дӧ аргалар бар деп, олор бир де алаҥзыбай јат. Тед ака куучындайт: «Бис мындый немеге ӱренип алдыс, бир ле ишке ӧйинеҥ ӧткӱре ӱренишпес керек».

16. Галаттарга 6:4-тӧ кандый ӱредӱ бар?

¹⁶ Кезик айалгаларды бис солып болбозыс. Оныҥ учун Иегова слерди кӧп молјулар бӱдӱрип турганаар учун баалап турган деп сананбас керек. Анайда ок бойысты ӧскӧ улусла тӱҥдештирбей јадыс. Хайди эјениҥ айтканыла болзо: «Бис бойысты ӧскӧ улусла тӱҥдештирип турзаас, сӱӱнчис јылыйар». (Галаттарга 6:4 кычырыгар, ЈТ.) Оныҥ учун агару ишке туружарга, кӱчигер јеткедий ӧскӧ аргалар бедирегер c.

17. База да ӧскӧ молјулар аларга турган болзоор, слерге эмдештеҥ ле ала нени эдер керек?

¹⁷ Слер база да ӧскӧ молјулар аларга турган болзоор, тегин јӱрӱм јӱрӱгер, тӧлӱлерге  кирбегер. Анайда ок јаан амадуларга јединерге, кичинек амадулар тургузып тураар. Темдектезе, јарчы текши пионер болорго турган болзын. Ого бу амадузына јединерге эмди ле подсобный пионердиҥ ижин баштаарга јараар. А болушчы ишчи болорго турган карындаш эмдештеҥ ле ала јажы јаанап калган ла ооруп турган ака-эјелерге болужып, кӧптӧдӧ јарлаар аргалу. Анайып слердиҥ ченемелеер кӧптӧп, слерде Иеговага иштееринде кӧп-кӧп аргалар ачылар. Оныҥ учун слерге кандый ла јакылталар берилзе, олорды бастыра кӱчигердеҥ јакшы эдерге албаданыгар (Рим. 12:11).

18. Јурукта Беверли эје биске кандый тем кӧргӱзет?

¹⁸ Бис канча да јашту болзоос, амадулар тургузып, олорго јединер аргалу. Мында биске 75 јашту Беверли эјебис тем кӧргӱзет. Уйан су-кадыгынаҥ улам эјебис јазап базып болбой јат. Је ол Кайраканныҥ Эҥирине улусты кычырар кампанияга туружарга кӱӱнзеген. Оныҥ учун чокум, јарт амадулар тургузып алган. Амадуларына јединип, сӱреен јаан сӱӱнчи алган. Оныҥ андый кӧрӱми јуунныҥ ӧскӧ дӧ улузына кӧчӧ берген. Иегова бистиҥ јажы јаан ака-эјелердиҥ, айалгазы јеҥил эмес те болзо, эткен ижин сӱреен тыҥ баалап јат (Сар. 71:17, 18)

19. Бис кандый кӧгӱс амадулар тургузар аргалу?

¹⁹ Айдарда, нени-нени эдерге амадап турзаар, амадугар чокум, јарт болзын. Иеговага јарап турган кылык-јаҥдарды тыҥыдыгар, темигӱлереерди оноҥ ло ары тыҥыдыгар. Ол тушта Иеговага ла оныҥ организациязына јаан болужыгарды јетиререер. Ака-эјелерге болужатан аргаларды бедиреп туругар d. Тимофей Иегованыҥ болужыла мындый једимдерге јединген болордо, слер де амадулараарга јединер аргалу. Мынайып слердиҥ «кӧгӱс једимдереерди ончо улус кӧрӧр» (1 Тим. 4:15).