Ata etip eyi obe ebilene meluk ire mgbọ geelek me inyọn̄ ijọn̄ ire eyi egebe me emen Baibul. (Okwa Itọn̄ 37:29) Baibul ikaan̄ akọp ibot ikpa gweregwen mè gweregwen. Awaji isa mkpọ obet let akọp ene ini, ebi igbegbe utoon̄-ejit isa ige Baibul. Ire Mosis oge adasi ibot ikpa go okup me Baibul, me mkpọ obet lek obop acha ita mè efit go oraraka. Ire ogwu ikwaan̄ Jọn oge ota ibot ikpa me mkpọ obet lek obop acha mè efit onaan̄ge. Nkeek ekene ke ebi igege Baibul ege isibi ni? Jioba igọọk ebi ige Baibul ikpa usem sa me ekwukwu mbuban kan̄. (Samien Eyi Òso Iba 23:2) Ema ege nkeek Awaji, ikare nkeek kiban̄. Eya orọ ire Jioba okaan̄ Baibul.—Fuk Timọti Eyi Òso Iba 3:16; Pita Eyi Òso Iba 1:20, 21.

Ikpọ fidio Who Is the Author of the Bible?

Eji miriọọn̄ ibe ke Baibul inan̄a me ubọk Awaji bak lek mfufuk kan̄ ogbaan̄ me lek mgbo okup me isi irọriọọn̄ ubọk itat. Kpunu ene geege obokọt irọ eya. (Josuwa 23:14) Ire gaalek Awaji, ogwu okakaan̄ unye ichit obokọt imun̄ itat mgbọ okup me isi eyi bọn ebilene.—Fuk Asaya 42:9; 46:10.

Igbe ibe ikpa onan̄a me ubọk Awaji isibi esese, ire ubọk irebe reya si. Ego ego Baibul ire echi egonbe isibi me esese esese ida usem mè iche ikana. Ikere ibe ikup ifiin̄, Baibul ije ikike me lek iriọọn̄-inu linyọn̄ echi otatat. Isọkọ me lek, inu ebi akọp ene ini cha egebe, ge ikaje ikeme ge. * Itatap isọkọ si, otutuuk inu Baibul otumube ikijeen̄ ibe kè Awaji, ire  Awaji eyi ima, Baibul ikaan̄ unye si inwenwene ene mè irọ ibe ugwem ene inwọn. Atikọ chi irọ inyi efie efie ebi ene enechieek ibe ke Baibul ire usem Awaji.—Fuk Ebi Teselonaika Eyi Adasi 2:13.

Ikpọ fidio How Can We Be Sure the Bible Is True?

Ge melek ibot inu okup me emen Baibul ire ata etip ibe ke Awaji ikaan̄ ata nkeek me lek ebilene. Baibul ikpa ubọk irek ebilene iluluk me Paradais me inyọn̄ ijọn̄ osabe ichep me ibebene mè ike Paradais oboyaka inu.—Fuk Ichichili 21:4, 5.

Usem Awaji iben ikan si, onineen̄, mè nteme. Isọkọ me lek si, mfufuk ofolek ubọk Awaji osabe igọọk ebilene irọ inu omowa me Baibul—inan̄a me lek mfufuk cha ke eji eniriọọn̄ mbet lek ene Awaji orebe. Eya orọ, Baibul mokọt itap ubọk irọ inyi owu oriọọn̄ Awaji. Ikpa si ubọk obokọt inikana ogwu unene kan̄.—Fuk Okwa Itọn̄ 19:7, 11; Jemis 2:23; 4:8.

Jisọs isa nkeek ene isi lek inu egebe me Baibul mè ikikpa iwele ge ge “inu ere Baibul ya osibibe.” Ikeya si, Broshọ yi motap ubọk irọ inyi ogobo Baibul otet.—Fuk Luk 24:27, 45.

Ikawa inu echi okitop me lek ene kubọk ata etip onan̄a me ubọk Awaji. Ire, usini ene ekikpọ chieen̄ ilọ me lek, usini ene ekinanaan̄ ejit me lek. Kachieek ibe efuuk ita owu me owot. Ifuna okọt onwọọn̄ ugwem ikakaan̄ge itata, omokween̄ Baibul mè iniriọọn̄ Awaji ijaan̄.—Fuk Jọn 17:3.