RIWIɄKWEYNA 5
Niwipawri Kaʼgʉmʉseʼri azi nikʉngwa aʼzanʉn nuga nanʉnno
1. Niwipawri iari Kaʼgʉmʉ gowna nanʉnno
Kaʼgʉmʉseʼri ikʉ kwʉngwasi Jeuwaseʼ gow una ni. Kʉtʉkʉnʉn ʉnkachwi winkwana Adán awiri Ewa gawi nareʼri, kuʼnawa kwʉngwasi neki nanuʼ nʉnna ni; eymékʉri ánugwe ɉina kwʉngwasi gow anawaki nuʼnameʼ (Job 38:4, 7). Jeuwari eʼ ikʉ gow uyeʼri, du zʉnaʼba Edén ayʉn kwʉngwasi kaʼchwa una ni (Génesis 2:15-17). Ey awi nʉ́nkʉri, Adán awiri eymi pari windeneysi winzweingwari, Kaʼseʼ du aʼzari wichuʼ nari kukwéy nʉngwa reʼgow una ni. Salmo 37:29; 115:16 aʼgwa ú.
Ey ʉweʼki, Edenri awʉ́ʼn neʼki zanuʼ nʉnna ni. Adán awiri Ewa gʉmʉsinʉ kʉnari windeʼneysi Kaʼseʼ koʼ zanika awʉngwa nʉnna ni. Ey unari gunti, ingiti paraísu zákusi zweingwa nʉnna ni (Génesis 1:28). Kaʼgʉ́mʉri tikumuʼ nari, íkʉri ey kinki kwey zweingwa nʉnna ni. Salmo 104:5 aʼgwa ú.
Widew Niwipawri iari Kaʼgʉmʉ gowna nanʉnno chwa ú
2. Íwari Kaʼgʉ́mʉseʼ iari paraísu zanuʼ nanʉnno
Adán awiri Ewa Niwipáw aʼnoʼkuʼ nʉn una ni. Ey ʉwameʼ, Edenseʼ pari anawite una ni. Eʼ Paraísu zʉnnari anizátikuma una ni, awiri iʼngwiseʼ kineki du zákusa awkwéy kʉnanuʼ nari nakʉn nuga ni. Kaʼgʉ́mʉri ikʉ du arunhuʼ neykaseʼ ipʉnhakumana ni Bibriaseʼ kingwi yeyka ni (Job 9:24). Génesis 3:23, 24 aʼgwa ú.
Jeuwari ikʉ eyméy gwʉn nanʉndi aʼzari, ʉnchusa zʉʼn anawʉnʉngwa aʼzanʉn nuga ki nanʉnno. Auʼ nʉngwa ni. Ari pinnazey nari ɉumamʉ kʉnariri, aseʼ yeyka ayéy ʉnchunha ʉwa nameʼ (Isaías 45:18). Tʉkin pari Niwipawseʼ eʼ ikʉ du aʼzari kwanʉndi aʼzʉnna neykari ayéy anʉnchunha awʉngwa ni. Salmo 37:11, 34 aʼgwa ú.
3. Azi nari Paraísu zanika awʉngwa nanʉnno
Jesuri Niwipawseʼ Sakuku nʉngwasi ʉnkaʼguna nameʼ, Kaʼgʉ́mʉseʼ paraísu zákusa awʉngwa ni. Jesuri, ánugwe ɉina Niwipáw zʉgunámʉsin, ikʉ Niwipáw aʼnoʼkuʼ neykari Armagedón awga ɉwinseʼ kʉchunha awʉngwa ni. Ey unáyuri, Ikʉnusi iʼngwi mir kʉgi nánʉkin uʼ iɉa awʉngwa ni. Niwipáw zʉgunámʉri kʉchunhákumuʼ nanʉngwa ni, Jesuseʼ eyméy níkʉkwa key ikwa awʉngwa nameʼ. Ey unigeʼri, Kaʼseʼ Paraísu zʉnaʼba du aʼzari áʼkwakin winkwʉngwa ni. Apocalipsis 20:1-3; 21:3, 4 aʼgwa ú.
4. Bin zanʉngeʼ chʉwi zanámʉri kʉchona uniko
Niwipawri bin zanʉngeʼ du zanuʼ neykari kʉchunha uniko. Bin neki kauʼ nʉngeʼ zanʉngwa neyka Jesuseʼ wasey una ni. Iwa eyméy du zanuʼ nari waʼmʉ niwinpasi nakʉn nugari, akowna ɉwía akwʉn nugameʼ ey zʉna ni. Luka 21:7, 10-12, 31 aʼgwa ú.
Iʼngwi mir kʉgi nánʉkin Jesú kuʼnawa pari Kaʼgʉ́mʉseʼ reʼgukʉnpana unigeʼri, chʉwi meʼkúsʉkwa neykari kʉchunhʉnpana keywʉ awʉngwa ni (Isaías 9:6, 7; 11:9). Íwari sakuku nʉnní awiri saserdoti umʉ́n aʼzʉna kinʉngwi awʉngwa nameʼ, ikʉ Niwipáw kaʼmʉkari zoyari kʉzanukuʼ nanʉngwasi ipin awʉngwa ni. Wichamʉ, achʉna anisi awiri awichi zoya neykari, Niwipáwseʼri Jesuseʼ kʉchunha awʉngwa reʼgow awʉngwa ni. Isaías 25:8; 33:24 aʼgwa ú.
5. Paraísu zanʉngeʼri ínʉri kwʉngwa nanʉnno
Jeuwá sí gaʼyeyka ɉina Ʉnniʼkumʉyékʉri ikʉ Niwipáw aguzari aseʼ aguzʉnáy zoya awʉn aʼɉúnʉya nʉɉwaʼsa awʉngwa ni
Ikʉ Niwipáw yay aʼnoʼsi zoya ʉwari Paraísu zʉnaʼba kwʉngwa ni (1 Juan 2:17). Jesú agunamʉ ɉina kʉyanari, ikʉ Niwipáw sí riwía awʉn aʼɉúnʉya tákʉkwa, ikʉ́nhari eméy nisi Niwipáw kaʼmʉkánʉkwa ná aʼzanʉngwasi, kʉyana. Jeuwari ikʉ Paraísuseʼ kukwéy kʉnanʉngwasi aʼzawín nuga ni (Sofonías 2:3). Jeuwá sí gaʼyeyka ɉina Ʉnniʼkumʉyekʉ zoya ʉwari, Niwipáw kaʼmʉkari ʉnkachwi neykari du dinhuzoya awiri gʉmʉsinʉ du aʼzawí zweingwasi riwía awkwéy kʉnʉna ni, awiri Bibriaseʼ duna gaʼkʉnamʉ wásʉya neyka ʉnkaʼmʉkanʉngwaʼsʉkwéy kʉnʉna ni. Miqueas 4:1-4 aʼgwa ú.
