KIMELÜN 3
¿Rüb küpapi may Chaw Dio mu tati kümeke dungu mülelu Biblia mu?
1. ¿Iñi am dewmay tati Biblia?
Tati küme dungu taiñ abnochi mongeleal (umel mongeleal) Mapu mu müli Biblia mu (Salmo 37:29). Tübachi libru nii 66 püchüke libru, wirintukueyu epe 40 norngechi wentru Chaw Dio tañi ngümintuel. Pu unenke 5 püchüke libru wirintukungi Moise, 3.500 tripantu upalu; inan libru wirintukungi apostol Juan 1.900 tripantu upalu. Pu rakiduam mülelu Biblia mu küpay Chaw Dio mu. Kidu ngütramkakebüy reke pu wirintukulu, tañi newen mu (2 Samuel 23:2). Tübachi pu wentru wirintukuyngün Chaw Dio tañi rakiduam, kiduke engün tañi rakiduam bemlay. Beymu, Jewba dewmay tati Biblia. Papiltunge 2 Timotew 3:16, ka 2 Pedro 1:20, 21.
Pebinge tati video ¿Iñi am dewmay tati Biblia?
2. ¿Chemu maneluwabüiñ Biblia tañi rüb dungu eypiken?
Biblia küpalu am Chaw Dio mu. Rüb mupitukiiñ tüba ¿chemu? Biblia eypiki chem dungu upaay petu tañi upanon. Pu che pepil-lay bemal tüba (Josué 23:14). Chaw Dio kom newen-ngelu müten bemabüy. Papiltunge Isaías 42:9, ka 46:10.
Kiñe libru küpalu Chaw Dio mu, müna manelbalngeabüy. Bentren warangka Biblia wülngeki bentren pataka kewün dungun mu. Kuybi tuwüngi, welu eypile kiñe ciencia dungu, rüb dunguki. Pu 40 wentru tañi wirintukuel welulkadungulay engün. * Itrokom tañi eypin pengeli Chaw Dio tañi piwkeyewün ka nii pepiluwün tañi küme elkünotual pu che tañi mongen. Kom tüba kellukebi bentren warangka che tañi rüb mupitual Biblia, Chaw Dio tañi Dungu ngi. Papiltunge 1 Tesalonisense 2:13.
Pebinge tati video ¿Chemu maneluwabüiñ Biblia tañi rüb dungu eypiken?
3. ¿Chem dungu eypi tati Biblia?
Tati Biblia dunguki kiñe müna küme dungu. Ngütramkakeiñmu Chaw Dio tañi ayükel amatubalchi dungu kom pu che ngelu. Eypi chumngechi tati wentru ñangümi tañi mongelebel kiñe küme mülewe Mapu mu, unen antü mu. Ka kimelkeiñmu chumngechi Mapu küme mülewe wiño ngetuay. Papiltunge Apokalipsi 21:4, 5.
Chaw Dio tañi Dungu nii werkün dungu, rüb dungu ka ngülam. Eypiiñmu Jewba tañi chumkebel pu küme bemkelu ka pu weda bemkelu, beymu pengelngi tañi chumngen. Bemngechi Biblia kellueiñmu taiñ doy kimabel Kidu. Kabey kimelkeeiñmu, chumngechi weniyeabüiñ. Papiltunge Salmo 19:7, 11; Santiaw 2:23, ka 4:8.
4. ¿Chumngechi doy küme kimabüiñ tati Biblia?
Jesu nentukebüy kiñe versikulo Biblia mu ka eypikebüy chem kimelün wülki. Bemngechi kimelelkebüy pu che Biblia tañi dungu. Tübachi papil ka bemngechi bemki, beymu kellueiñmu taiñ doy küme kimal Biblia tañi dungu. Papiltunge Luka 24:27, 45.
Kimülmi tübachi kümeke dungu küpalu Chaw Ngünechen mu, rüb ayüwküleaymi. Welu kiñeke pu che ayüwkelabi tüba, kake lladkütuabüy chi, ngütramkangele engün tübachi dungu mu. Beymu, eluwlaaymi kake che tami katrütuñmaetu tami küme bemün: doy kimabel Chaw Dio tami abnochi mongeleabel (umel mongeleabel). Papiltunge Juan 17:3.
^ parr. 3 Pebinge tati libru La Biblia... ¿la Palabra de Dios, o palabra del hombre? (castellano mu).
