•   ¿Nüngaituqueimi caquelu ñi feipial pecanca dungu?

  •  Femlan, huimtulen tañi allcütuquen.

  •  Mai, pichi nüngaituquefiñ, huelu ¿chumafun cai?

  •  Rume nüngaituquefiñ.

•   ¿Feipiqueimi chi pecanca dungu?

  •  Turpu femquelan.

  •  Quiñeque mu.

  •  Rume feipiquen.

•   ¿Chem pimi? ¿Rume huesa dungu am ñi feipial pecanca dungu?

  •  Femlai, huesa dungu no tati.

  •  Mai, rume huesa dungu tati.

 ¿Chem pimi? ¿Pecanca dungual fei ta huesa dungu? Raquiduamafuimi chi, ‘huesa dungu no tati, com che ta feipiqueingün’. Huelu, ¿rüfngei?

 Afmatuafuimi chi, huelu fentren che feipiquelai pecanca dungu. ¿Chumngelu? Peafiyiñ quiñeque dungu.

•  Chumngechi taiñ dunguquen pengeli chem ñi mülen taiñ piuque mu. Feipilmi pecanca dungu, pengelaimi tami duamtuquenofiel tati pu che. ¿Femngechi chengeimi?

   Biblia feipi: “Tati tripaquechi dungun ta hun meu, che tañi piuque meu tripaquei” (Mateo 15:18).

•  Huesa pecanca dungulmi, pu che huesa raquiduamafui eimi mu. Quiñe lifru feipi: “Chumngechi tami dunguquen, quimaimi chem che tami hueniyeafeteu. Cafei quimaimi tami pu compañ cüdau mu ca quisu tami pu che tunte tami yamnieaeteu. Chumngechi yehuaimi caquelu che engu, chumngechi quelluafimi caque che. Cafei quintulmi quiñe hue cüdau ca chem raquiduamai pu che tami quimnoeteu” (Cuss Control). Ti lifru ca feipi: “Ramtuunge: ‘Feipihuenoli pecanca dungu, ¿doi cümeque hueni nieafun?’”.

   Biblia feipi: “Famentuafimün [...] ti huesaque pihun” (Efesios 4:⁠31).

•  Re feipilmi pecanca dungu, doicülelaimi caquelu che mu. Quiñe lifru mu, ti doctor Alex Packer feipi: “Pu che allcütulu re pecanca dungu, cansaquei. Quiñe che feipile pecanca dungu, cüme raquiduamquelai ca duamtuquelai caquelu che. Entulmi pichin cümeque dungu tami hun mu, ca nieaimi pichin cümeque dungu tami lonco mu” (¡Qué maleducado!).

   Biblia feipi: “Nütramcaquelayaimün ta huesaque dungu” (Efesios 4:29).

•  Chem femaimi. Quiñe cüyen mu nehuentuaimi tami feipinoal pecanca dungu. Quiñe cuaderno mu cam quiñe calendario mu, marcacünuafuimi chum amulei tami feipicünun. Huelu ayülelmi tami feipihuenoal pecanca dungu, caquelu dungu mülei tami femal. ¿Chuchi am?

•  Famentuafimi chem rume nielu pecanca dungu. Biblia feipilei: “Tati huesaque compañ huesalcaquefi tati cüme huimtun” (1 Corintios 15:33). Tüfachi versiculo feipilu “huesaque compañ” ca coneltulei tati musica, videojuego ca tati pelicula. Kenneth 17 tripantu nielu, feipi: “Allcütulu quiñeque musica, ayüquefiñ ñi ritmo. Feimu raquiduamlan ñi huesa feipin chi ülcantun, fei ülcantuquefiñ müten”.

•  Pengelnge tami quim chengen. Quiñeque hueche pecanca dunguquei ñi pengelal tami trem chengen. Huelu trem chengelu “quimniei chem dungu ñi cümen cam ñi cümenon” (Hebreos 5:14). Pu quim chengelu pecanca dungu mu conquelai tañi afmatungeal.

 Pecanca dunguyaulu che, puhui ñi lonco mu re huesaque raquiduam. Ca femngechi podümquefi reque caquelu che tañi raquiduam. Com huall Mapu meu apolei reque femngechi che mu, feimu ¡reyüconquilnge! Quiñe lifru ngülamtuqueiñmu taiñ inayentunoafiel tati pecanca dunguyaulu chi che. “Feipinolmi pecanca dungu, quelluafuimi ñi entual cümeque nütram. Femülmi, cüme duamaimi ca cüme duamelafimi ta caquelu che” (Cuss Control).