Femllei mai, Chau Dios allcütuquefi pu che ñi llellipun. Huelu mülei ñi llellipual Ngünechen tañi piel mu. Biblia mu huiriconcülei fentren che llellipuquefi ta Ngünechen tañi quelluaeteu. Ngüneduamliyiñ feichi pu che ñi llellipuel, doi eluucüleafuiñ taiñ llellipuafiel ta Chau Dios, turpu llellipunofuliyiñ rume cuifi mu. Quiñe huentru feipi tañi llellipun:

•   “Chau Ngünechen Jehová, montulen tami nor piuqueyechen meu” (Salmo 109:26).

 Ca femngechi llellipui:

•   ‘Iñche quisulen ca chem no rume nielan. Chau Ngünechen, alüñma rupaquilpe tami huiñoldungun’ (Salmo 70:5).

 Ti huentru femngechi ngillatulu, rüf maneluuquefui Chau Dios mu. Huelu fente maneluunoliyiñ Chau Ngünechen meu, ca allcütuafeiñmu, huelu mülei taiñ ngillatual rüf piuque meu. Biblia feipi Jehová allcütuquefi “com pu hueñancülelu ñi piuque” ca “com pu huesa duamcülelu” (Salmo 34:18).

 Quiñeque mu raquiduamafuiñ chi: “Rume alü camapulei Ngünechen, feimu duamniepeafeiñmu iñchiñ”. Huelu tati Biblia feipi: “Jehová alüpüralei rume tañi mülen mu, quisu ngüneduamniefi tati ñom piuquengelu, huelu ayüquelai ñi pülleconcüleal tati mallma piuquengelu mu” (Salmo 138:6). Jesús feipifi tañi pu inanieteu: “Eimün tamün cal lonco cütu ta raquinieñmaeimünmeu re quiñeque” (Mateo 10:30, 31). Iñchiñ pepi raquiquelaiñ taiñ cal lonco, huelu Chau Ngünechen femquei llemai. ¡Doyelchi mai allcütuñmaqueiñmu taiñ feipiquefiel! (1 Pedro 5:7).