Müte cuifi no, tati pu chau doi pepi nütramcaquefui tañi pu yall cudumuhun dungu mu, ca quimelelquefui tañi pu pichiqueche tüfachi dungu mu tunte tañi tremcülen engün.

Feula caletui tüfa. “Famülque mu doi pichicalu rume pengelelngequei ñi peal cudumuhun dungu, ca ti programa ñi adcünungeel pichiqueche ñi peal ca quimelngei cudumuhun dungu” feipi ti lifru The Lolita Effect. ¿Chumngechi huesalcayafeyu tüfa pu pichiqueche?

Ti cudumuhun dungu mülei fill püle. “Nütramcan meu, pelicula, lifru meu, ülcantun, ñi pengelngequeel television meu, ñi huercüngequeel redes sociales mu, ti aucantun, ti publicidad meu, ti telefono ca ti computador ñi pengelqueel apolei com feichi dungu meu. Alün huechequeche ca pichiqueche cütu raquiduamquepelai ti cudumuhun dungu doi falin-ngei, adümnolu rume tüfa”, femngechi huirintucui Deborah Roffman, huirintuculu tañi lifru Talk to Me First.

Ti publicidad ca quelluntucuquei tüfa meu. Fentren empresa fendequeingün tacun pu pichiqueche ñi doi peufaluhual tañi cuerpo. Tüfa raquiduamelquefi pu pichiqueche ñi doi falin-ngen femngechi ñi tucutuhual. “Pu comerciante quimnieingün pu pichiqueche ayüquei ñi cüme troquiaeteu tañi pu compañ, feimu allmalltuqueingün. Com ñi femquen ca ñi pengelqueel deumaquelai ñi feipiafiel pu pichiqueche ñi cudumuhual, doi mai pu pichiqueche ñi ngillacalerpual hueque chemcün” pi tati lifru So Sexy So Soon.

Ngelai ñi quimal müten. Raquiduamnge tüfa: quiñe che re quimle chum amuquei quiñe auto, huelu quim manejanole, turpu cüme amul-layafui ti auto. Ca femngechi duamfalngelai quimal müten cudumuhun dungu meu, doi mai duamfali cüme adümafiel feichi quimün, femngechi ñi cüme dullial cudumuhun dungu meu.

Quimeltun: Famülque mu doi duamfali tamün quelluafiel pu yall ñi ‘pepicantual tañi raquiduam’, femngechi ñi ‘quim ngüneduamal chem ñi cümen ca chem ñi cümenon’ (Hebreos 5:⁠14).

Nütramcafinge tami pu pichiqueche. Cüdaungele rume tami nütramcayal cudumuhun dungu tami pu pichiqueche engün, mülei tami femal. ¡Yafüluunge! (Biblia ñi ngülam: Proverbios 22:6).

Pichiquentu ngülamtuafimi. Ngelai tami alüntu nütramcayafiel, doi mai cheu rume miyahulmi, auto mu cam cüdahülmi ruca meu, nentuaimi tiempo tami ngülamtuafiel. Fillque dungu ramtuafuimi tami pichiqueche, fei tami quelluafiel ñi entudungual. Huelu ramtulayafimi: “¿Ayüfimi feichi anuncio tami pequefiel?”, doi mai ramtuafimi: “¿Chemu pengelngequei feichi adentun ñi fendeal tañi chemcün?”. Deu tami allcütufiel ñi huiñoldungun, ramtuafuimi: “¿Chem raquiduamimi?” (Biblia ñi ngülam: Deuteronomio 6:6, 7).

Raquiduamnge tunten tripantu niei tami yall. Pu pichiqueche petu connole colegio mu, quimeltuafimi chumngechi üitungequei tati organos sexuales ca chumngechi cuñiutucuhual tañi nüntucangenoal. Amulele ñi tremcülen doi quimelafimi cudumuhun dungu meu, femngechi huechengele engün doi cüme quimaingün cudumuhun dungu ca chem raquiduamquei Chau Dios tüfachi dungu mu.

Quimeltufinge chem ñi cümen ca chem ñi cümenon. Hunelu mu, petu pichicalu quimeltulelfinge ñi nor chengeal ca ñi yamchefengeal, femngechi doi cüdaungelayai tami nütramcayafiel cudumuhun dungu mu. Cafei quimelelfimi tami raquiduam, chem dungu cümelu cam cümenolu troquifimi. Por ejemplo, raquiduamülmi “cümelai ñi cudumuhual epu che petu ñi nieunon engu”, cüme feipiafimi tami pu pichiqueche. Ca feipifinge chumngelu cümelai ca cuñihun-ngei tüfa. “Tati pu huechequeche doi ngünehuafui chi cudumuhun dungu mu, quimle tañi pu chau ñi piquenon feichi dungu” feipi tati lifru Beyond the Big Talk.

Inayentufalngeaimi. Yenienge tami mongen chumngechi tami quimeltuqueel. Ramtuhuafuimi chi: “¿Ayüquefiñ allcütual ti podngechi nütramcan cudumuhun dungu mu? ¿Tucutuuquen ñi pengelal ñi cuerpo? ¿Ayüquen ñi daquelcantucheal?”. Inayentufalngenolmi, tami pu pichiqueche ca inalayaingün feichi ngülam tami cüpa quimeltuqueel (Biblia ñi ngülam: Romanos 2:21).

Tati cudumuhun quiñe regalo Ngünechen mu cüpalu. Ngünechen elufi tati pu curehuen ñi cudumuhual engün, femngechi ñi ayüucüleal engün (Proverbios 5:18, 19). Feipifinge tami pu yall deu nieule engün llohuai feichi regalo, fei contulayafeyu huesaque dungu ñi nien pu che femquelu cudumuhun dungu petu ñi nieunon (1 Timoteo 1:18, 19).