TROKIÑ 2
Wemünentungeyngu ti Küme Mülewe mu
Kiñe weda werken püllü ngünenkafi ta Adan Eva engu ñi feyentunoafiel ta Ngünechen. Femngechi wefi ti yafkan ka lan dungu
FÜTRA kuyfi mu, petu ñi mülenon tati pu che, Ngünechen dewmay fentren püllü pengekenolu, pu werken püllü pingekeyngün. Tati malaltukulechi rayen Eden pingekefuy ñi antü mu, kiñe werken püllü wentruwi, tüfa kimngerpungey Satana chi Weküfü, kidu ngünenkafi ta Eva ñi iyafiel ti kiñen anümka ñi katrütuetew Ngünechen ñi iñmanoafiel ñi fün.
Satana filukünuwi ñi dunguafiel ta Eva, ñi kimnieal kidu ka tañi wentru ngünam feyentuafiel Ngünechen ñi duam mew. Ka feypifi ifile engu ti katrütungechi fün, lalayayngu. Femngechi tati Weküfü dallukafi ta Ngünechen ñi koylatukefiel tañi epu yall. Chi Weküfü feyentulfi fey engu feyentunofile (müngeltunobile) ta Ngünechen nürpuayngu kiñe pekan-ngenochi kimün, ka ayüyngu ñi kidu ngünewal müten. Welu kom tüfa re koyla tati, ti wünen koyla feypingelu. Rüfkünu may ayüy tüfachi weda püllü ñi elkünual tüfachi dungu: Chaw Ngünechen müten, ¿müley may ñi ngünenieal itrokom dungu? ¿Norngey tañi ngünenieel? ¿Kümepey may ñi feyentuafiel?
Eva feyentufi (müngeltubi) Weküfü tañi koyla. Eluwi ñi illufiel ti fün, feymu irkefi. Fey wüla ka femngechi elufi tañi füta (afkadi), fey ti wentru kafey irkey ti fün. Newe weda dungu trokiwngelay, welu feyta kiñe wentrukawün reke, kiñe yafkan tati. Tañi dullifiel ñi feyentunoal engu Ngünechen ñi werkün dungu, Adan ka Eva famentufi tañi ngünenieetew tañi Dewmaetew, kidu elukeetew am kom tañi niekefel, tañi engkañngenochi mongen kütu (kenü).
‘Fey pünoñmayaeymew tami longko, fey eymi ünatuñmayafimi ñi rüngkoy namun.’ (Génesis 3:15)
Ngünechen ramtukadungufi tüfachi epu rume weda femlu. Wüne feypikünuy ta küpalechi antü mu küpayay ti feypikünuelchi Choyün (llegi), ka apümkayafi tati filu, Satana. Fey wüla Ngünechen kondenafi Adan Eva engu ñi larpual, welu pürüm (pür) müten larpulayngu, welu kutranpiwkeniefi ñi pu yall choyüngerpual (llegürpual), feymu eluñmay ñi mongeleal engu pichiñma antü mu. ¿Chem maneluwün nieayngün ñi pu yall? Jewba feypikünuy ñi werküal kiñe montulchefe tañi apümkayafiel kom wedake dungu rupalu Eden mu. Welu, ¿iney ngeafuy tüfachi Montulchefe, ka chumngechi wechurpuafuy kom tañi werküetew Ngünechen? Mülen antü mu, petu amulelu ñi wirintukungen chi Biblia, tüfachi dungu kimngerpuy.
Af mew, Ngünechen wemünentufi Adan Eva engu tati Küme Mülewe mu. Wekun ti malaltukulechi rayen mu, fey engu müley ñi rume (mütre) küdawtuael ti mapu tañi nieal iyael. Feymew wüla Eva püñeñi tañi wünen püñeñ, Kain pingey. Fey wüla Adan Eva engu nieyngu fentren pu yall, wentru ka domo, fey engün mu mülefuy Abel ka Set pingeyngu, Noe ñi kuyfi tuwün.
(Tuwlu Génesis kapitulo 3 ka puwlu 5, ka Apokalipsi 12:9.)
