¿Pefimi tüfachi pu wentru mülelu ti adentun mu? ¿Iney (iñi) engün piafuymi?... Fey engün Matew, Marku, Luka, Juan, Pedro, Santiaw, Juda, ka Pablo pingeyngün. Kom engün mongelekefuyngün Jesu ñi antü mu, ka kidu engün wirintukuyngün ñi dungu mu. Kom ñi wirintukuel engün Biblia mu müley. Feymu fewla ta kimaiñ kidu engün mu.

Tati pu apostol Matew, Juan, ka Pedro küme weniyefuyngün ta Jesu, ka trür (trir tripa) amuldungukefuyngün.  ¿Pengelafuymi ti adentun mu tüfachi küla wentru?... Matew wirintukuy kiñe lifru pengel-lu Jesu ñi mongen, Juan ka femngechi femi. Kafey wirintukuy Apokalipsi pingechi lifru, ka küla chillka, tüfa ta Juan tañi wüne wirielchi karta, tañi epu puwchi karta, ka tañi küla puwchi karta pingeyngün. Chi apostol Pedro epu chillka wirintukuy: Pedro tañi wünen karta, ka ñi epu puwchi karta pingeyngu. Tañi epu puwchi karta mu, Pedro wirintukuy kiñe falin (manelbalchi) rupan. Kidu allküy Jewba ñi dungun wenu mapu mew nagpalu, feypilu Jesu mew: ‘Fey tüfa iñche ñi fotüm. Müna piwkeyefiñ, ka ayüwülkeenew’.

Kakelu pu wentru adentun mu mülelu ka wirintukuyngün Jesu ñi dungu mu. Marku ta femi, peniepelay nüngelu ta Jesu ñi presungeal. Kangelu wentru wirintukulu, Luka pingey. Kidu lawentuchefengefuy, ka dewma lalu Jesu peno ñi inanieetew ngerpuy.

Jesu ñi epu inan peñi ka wirintukuyngu ñi dungu. ¿Iney pingefuyngu?... Santiaw ka Juda pingefuy tañi üy engu. Ellaka mu feyentukelafuyngu (mupitukelabuyngu) Jesu ñi kimeltun mu, ‘wenche (püchü) wedwedküley’ pikefuyngu ñi rakiduam mu. Welu rupalu chi antü feyentufingu (mupitubingu), ka ñi inanieetew ngerpuyngu.

Ka kiñe wentru wirintukulu Biblia mu Pablo pingefuy, ka chi adentun mu pengelngey. Petu inanofilu Jesu Sawlu pingefuy. Tüfa ta üdekefuy kom pu inayerpufilu Jesu, ka rume (mütre) kutrankayefi. Welu ¿chumngechi Pablo inayerpufi Jesu?... Kiñe antü mu, petu amulelu rüpü mu, allkürumey kiñe dungun wenu mapu nagpalu. ¿Iney am ta dungueyew? ¡Jesu ürke! Ka ramtueyew: ‘¿Chumal am ta fente kutrankamekefimi tati pu feyentulelu (mupitulelu) iñche mu?’. Rupalu tüfachi dungu, Pablo welukünutuy tañi mongen, fey inayerpufi Jesu. Kidu mari meli lifru Biblia mu wirintukuy: Romanu pingechi karta ka Ebrew chi karta puwlu mu.

Fill antü papeltukeiñ chi Biblia. Femngechi fentren dungu kimaiñ Jesu mew. ¿Ayüfuymi tami doy kimafiel ta Jesu?...