মথিয়ে লিখা শুভবাৰ্তা ৫:১-৪৮
৫ যীচুৱে যেতিয়া ভীৰক দেখিলে, তেতিয়া তেওঁ পাহাৰত গৈ বহিল আৰু তেওঁৰ শিষ্যসকলেও তেওঁৰ ওচৰলৈ আহিল।
২ তাৰ পাছত তেওঁ এই কথাবোৰ তেওঁলোকক শিকাবলৈ ধৰিলে:
৩ “যিসকলে জানে যে তেওঁলোকক ঈশ্বৰৰ নিৰ্দেশনাৰ প্ৰয়োজন আছে তেওঁলোক সুখী, কাৰণ তেওঁলোকে স্বৰ্গৰাজ্যৰ যোগ্য।
৪ যিসকলে দুখ কৰে তেওঁলোক সুখী, কাৰণ তেওঁলোকক শান্ত্বনা দিয়া হʼব।
৫ যিসকল কোমল স্বভাৱৰ হয় তেওঁলোক সুখী, কাৰণ পৃথিৱীখন তেওঁলোকক দিয়া হʼব।
৬ যিসকলে ভাল কাম কৰিবলৈ মনে-প্ৰাণে চেষ্টা কৰে তেওঁলোক সুখী, কাৰণ ঈশ্বৰে তেওঁলোকৰ ইচ্ছা পূৰ কৰিব।
৭ যিসকল দয়ালু তেওঁলোক সুখী, কাৰণ তেওঁলোকৰ ওপৰত দয়া দেখুৱা হʼব।
৮ যিসকলৰ মনত কপট নাই তেওঁলোক সুখী, কাৰণ তেওঁলোকে ঈশ্বৰক দেখা পাব।*
৯ যিসকলে আনৰ লগত শান্তি বজাই ৰাখে তেওঁলোক সুখী, কাৰণ তেওঁলোকক ঈশ্বৰৰ লʼৰা-ছোৱালী বুলি কোৱা হʼব।
১০ যিসকলে ভাল কাম কৰিবলৈ অত্যাচাৰ সহন কৰে তেওঁলোক সুখী, কাৰণ তেওঁলোকেই স্বৰ্গৰাজ্যৰ যোগ্য।
১১ যেতিয়া লোকসকলে তোমালোকক মোৰ শিষ্য হোৱাৰ কাৰণে বদনাম কৰিব, অত্যাচাৰ কৰিব আৰু তোমালোকৰ বিষয়ে মিছা কথা আৰু বেয়াকৈ কʼব, তেতিয়া সুখী হʼবা।
১২ তোমালোকে বহুত আনন্দ কৰিবা, কাৰণ স্বৰ্গত তোমালোকক ডাঙৰ পুৰস্কাৰ দিয়া হʼব। তেওঁলোকে আগতে ভৱিষ্যবক্তাসকলকো এইদৰেই অত্যাচাৰ কৰিছিল।
১৩ তোমালোক জগতৰ নিমখৰ দৰে হয়। যদি নিমখে নিজৰ সোৱাদ হেৰুৱায়, তেনেহʼলে তাক আকৌ নিমখীয়া কৰিব পাৰিনে? নোৱাৰি! সেয়া কোনো কামত নাহে, তাক ৰাস্তাত পেলাই দিয়া হয় আৰু লোকসকলে তাৰ ওপৰত খোজ কাঢ়ে।
১৪ তোমালোক জগতৰ পোহৰৰ দৰে হয়, যি চহৰ পাহাৰত থাকে সেয়া লুকাই নাথাকে।
১৫ লোকসকলে চাকি জ্বলাই ইয়াক ঢাকি নাৰাখে,* ইয়াৰ পৰিৱৰ্তে টেবুলত ৰাখে। যাৰ কাৰণে ঘৰৰ সকলোৱে পোহৰ পায়।
১৬ ঠিক সেইদৰে, তোমালোকৰ পোহৰ লোকসকলৰ আগত জিলিকি থাকক, যাতে তেওঁলোকে তোমালোকৰ ভাল কাম দেখি স্বৰ্গত থকা পিতৃৰ* মহিমা কৰে।
১৭ মই নিয়ম বা ভৱিষ্যবক্তাসকলৰ বাক্য* নষ্ট কৰিবলৈ আহিছোঁ বুলি নাভাবিবা। মই সেইবোৰ নষ্ট কৰিবলৈ নহয়, কিন্তু পূৰ কৰিবলৈ আহিছোঁ।
১৮ মই তোমালোকক সঁচাকৈ কৈছোঁ, যিদৰে আকাশ আৰু পৃথিৱী কেতিয়াও শেষ নহʼব, ঠিক সেইদৰে নিয়মত লিখা সৰুতকৈ সৰু আখৰ বা বিন্দুও পূৰ নোহোৱাকৈ নাথাকিব। তাত লিখা সকলো কথা আখৰে আখৰে পূৰ হʼব।
১৯ সেইবাবে, কোনোবাই ইয়াৰ সৰু আজ্ঞাবোৰৰ ভিতৰত যদি এটা আজ্ঞাও নামানে আৰু আনকো এইদৰে কৰিবলৈ শিকায়, তেনেহʼলে তেওঁ স্বৰ্গৰাজ্যৰ বাবে যোগ্য নহʼব।* কিন্তু যিসকলে এইবোৰ মানে আৰু আনকো এইদৰে কৰিবলৈ শিকায়, তেওঁলোক স্বৰ্গৰাজ্যৰ বাবে যোগ্য হʼব।*
২০ কিয়নো মই তোমালোকক কওঁ যে তোমালোকৰ বিশ্বাস ফৰীচী* আৰু যিসকলে নিয়ম শিকায়* তেওঁলোকতকৈ বেছি নহʼলে তোমালোকে স্বৰ্গৰাজ্যত যাব নোৱাৰিবা।
২১ তোমালোকে জানা যে পূৰ্বপুৰুষসকলক কোৱা হৈছিল, ‘তুমি হত্যা নকৰিবা, যিজনে হত্যা কৰিব তেওঁ আদালতত উত্তৰ দিব লাগিব।’
২২ কিন্তু মই তোমালোকক কওঁ যে যিজনে নিজৰ ভাইৰ প্ৰতি খং পুহি ৰাখে, তেওঁ আদালতত উত্তৰ দিব লাগিব; আৰু যিজনে নিজৰ ভাইক অপমান কৰিবলৈ বেয়া শব্দ ব্যৱহাৰ কৰে, তেওঁ আটাইতকৈ ডাঙৰ আদালতত উত্তৰ দিব লাগিব। যিজনে নিজৰ ভায়েকক মূৰ্খ বুলি কয়, তেওঁ নাশ হোৱাৰ যোগ্য হʼব।*
২৩ যদি তুমি ঈশ্বৰলৈ বলিদান আগবঢ়াবলৈ গৈছা, তাতে তোমাৰ মনত পৰে যে তোমাৰ কোনো কথাৰ পৰা তোমাৰ ভায়ে দুখ পাইছে,
২৪ তেনেহʼলে নিজৰ বলিদান বেদীৰ ওচৰত এৰি প্ৰথমে গৈ নিজৰ ভাইৰ লগত শান্তি স্থাপন কৰা,ʼ তাৰ পাছত আহি বলিদান আগবঢ়োৱা।
২৫ যদি কোনোবাই তোমাৰ বিৰুদ্ধে মোকৰ্দ্দমা কৰে, তেনেহʼলে লগে লগে তেওঁৰ লগত সমস্যাটো সমাধান কৰা। নহʼলে তেওঁ তোমাক ন্যায়াধীশৰ হাতত দি দিব আৰু ন্যায়াধীশে কৰ্মচাৰীৰ আৰু কৰ্মচাৰীয়ে তোমাক জেলত বন্দী কৰি দিব।
২৬ মই তোমালোকক সঁচাকৈ কৈছোঁ, তুমি গোটেই টকাখিনি নিদিয়ালৈকে তাৰ পৰা কোনোপধ্যেই ওলাই আহিব নোৱাৰিবা।
২৭ তোমালোকে জানা যে কোৱা হৈছিল, ‘তুমি ব্যভিচাৰ* নকৰিবা।’
২৮ কিন্তু মই তোমালোকক কওঁ যে যিজনে কোনো তিৰোতাক বেয়া দৃষ্টিৰে চাই থাকে, তেনেহʼলে তেওঁ নিজৰ মনতে সেই তিৰোতাগৰাকীৰ লগত ব্যভিচাৰ কৰিলে।
২৯ যদি তোমাৰ চকুৱে তোমাক পাপ কৰাইছে, তেনেহʼলে তাক কাঢ়ি পেলাই দিয়া, কাৰণ গোটেই শৰীৰ নাশ* হোৱাতকৈ তোমাৰ এটা অংগ হেৰুৱাটোৱেই ভাল।
৩০ যদি তোমাৰ হাতে পাপ কৰাইছে, তেনেহʼলে তাক কাটি পেলাই দিয়া, কাৰণ গোটেই শৰীৰ নাশ* হোৱাতকৈ তোমাৰ এটা অংগ হেৰুৱাটোৱেই ভাল।
৩১ এয়াও কোৱা হৈছিল যে ‘যিজনে নিজৰ পত্নীক তালাক দিয়ে, তেওঁ পত্নীক তালাকৰ প্ৰমাণ পত্ৰ দিয়ক।’
৩২ কিন্তু মই তোমালোকক কওঁ যে যিজনে অনৈতিক শাৰীৰিক সম্পৰ্কৰ* বাহিৰে আন কিবা কাৰণত নিজৰ পত্নীক তালাক দিয়ে, তেনেহʼলে তেওঁ নিজৰ পত্নীক এনে পৰিস্থিতিত পেলায়, যাৰ বাবে তেওঁ ব্যভিচাৰ কৰিব পাৰে আৰু যিজনে এনে তালাক লোৱা তিৰোতাক বিয়া কৰে, তেনেহʼলে তেওঁ ব্যভিচাৰ কৰে।
৩৩ তোমালোকে জানা যে পূৰ্বপুৰুষসকলক কোৱা হৈছিল, ‘তুমি এনে শপত নাখাবা, যিটো তুমি পূৰ কৰিব নোৱাৰিবা, কিন্তু যিহোৱালৈ* কৰা নিজৰ প্ৰতিজ্ঞা পূৰ কৰিবা।’
৩৪ কিন্তু মই তোমালোকক কওঁ যে তোমালোকে কেতিয়াও শপত নাখাবা, স্বৰ্গৰ নামেৰে নাখাবা, কিয়নো সেয়া ঈশ্বৰৰ সিংহাসন,
৩৫ পৃথিৱীৰ নামেৰেও নাখাবা, কিয়নো সেয়া তেওঁৰ ভৰি-পীৰা; যিৰূচালেমৰো* শপত নাখাবা, কিয়নো সেয়া মহা-ৰজাৰ* নগৰ।
৩৬ তুমি নিজৰ মূৰত ধৰি শপতো নাখাবা, কিয়নো তুমি এডাল চুলিও বগা বা কʼলা কৰিব নোৱাৰিবা।
৩৭ তোমালোকৰ ‘হয়’ মানে ‘হয়’ হওক আৰু ‘নহয়’ মানে ‘নহয়’ হওক, কাৰণ তোমালোকে যি কৰিম বুলি কোৱা, কিন্তু নকৰা, তেনেহʼলে তোমালোকে চয়তানৰ দৰে কাম কৰিছা।
৩৮ তোমালোকে জানা যে কোৱা হৈছিল, ‘চকুৰ সলনি চকু আৰু দাঁতৰ সলনি দাঁত।’
৩৯ কিন্তু মই তোমালোকক কওঁ যে দুষ্ট লোকসকলৰ লগত কাজিয়া নকৰিবা, ইয়াৰ পৰিৱৰ্তে যদি কোনোবাই তোমাৰ এখন গালত চৰ মাৰে, তেনেহʼলে সিখন গালো পাতি দিবা।
৪০ যদি কোনোবাই তোমাৰ ওপৰত মোকৰ্দ্দমা কৰি তোমাৰ চোলা লʼব খোজে, তেনেহʼলে তেওঁক বাকী কাপোৰবোৰো দি দিবা।
৪১ আৰু যদি কোনো অধিকাৰীয়ে তোমাক কিবা কাম কৰিবলৈ কয়, তেনেহʼলে তেওঁ যিমান কৈছে, তাতকৈ বেছি কৰি দিবা।
৪২ যিজনে তোমাক কিবা খোজে তেওঁক দিবা আৰু যদি ধাৰ* খোজে, তেনেহʼলে নিদিওঁ বুলি নকʼবা।
৪৩ তোমালোকে জানা যে কোৱা হৈছিল, ‘তুমি নিজৰ চুবুৰীয়াক প্ৰেম কৰিবা আৰু তোমাক হানি কৰিব বিচৰা লোকক ঘিণ কৰিবা।’
৪৪ কিন্তু মই তোমালোকক কওঁ যে তোমাক হানি কৰিব বিচৰা লোকসকলক প্ৰেম কৰি থাকা আৰু তোমাৰ লগত বেয়া ব্যৱহাৰ কৰা লোকসকলৰ বাবে প্ৰাৰ্থনা কৰি থাকা।
৪৫ এইদৰে তোমালোকে স্বৰ্গত থকা পিতৃৰ লʼৰা-ছোৱালী হয় বুলি প্ৰমাণ কৰা, কিয়নো তেওঁ ভাল আৰু বেয়া দুয়োজনকে ৰʼদ দিয়ে আৰু ভাল কাম কৰা আৰু বেয়া কাম কৰা দুয়োজনৰ ওপৰতে বৰষুণ পেলায়।
৪৬ কাৰণ যিসকলে তোমালোকক প্ৰেম কৰে কেৱল তেওঁলোককে প্ৰেম কৰিলে, তোমালোকে কি পুৰস্কাৰ পাবা? যিসকলে কৰ লয়, তেওঁলোকেও জানো এইদৰে নকৰে নে?
৪৭ আৰু তোমালোকে যদি কেৱল ভাইসকলক নমস্কাৰ কৰা, তেনেহʼলে কি ডাঙৰ কাম কৰিছা? যিসকল ইস্ৰায়েলী নহয় তেওঁলোকেও জানো এইদৰে নকৰে নে?
৪৮ সেইবাবে, স্বৰ্গত থকা পিতৃয়ে তোমালোকক যিদৰে সম্পূৰ্ণৰূপে প্ৰেম কৰিলে, ঠিক সেইদৰে তোমালোকেও সম্পূৰ্ণৰূপে প্ৰেম কৰা।
Footnotes
^ দেখা পোৱাৰ অৰ্থ কেৱল চকুৰে দেখা নহয়, কিন্তু মনৰ চকুৰে দেখা আৰু বুজাও হʼব পাৰে।
^ বা “ইয়াক টুকুৰীত ঢাকি নাৰাখে।”
^ অৰ্থাৎ যিহোৱা।
^ এয়া মোচি আৰু ভৱিষ্যবক্তাসকলে লিখা শাস্ত্ৰ হয়।
^ আক্ষ., “তেওঁ স্বৰ্গৰাজ্যত সকলোতকৈ ‘সৰু’ বুলি প্ৰখ্যাত হʼব।”
^ আক্ষ., “তেওঁ স্বৰ্গৰাজ্যত সকলোতকৈ ‘মহান’ বুলি প্ৰখ্যাত হʼব।”
^ শব্দকোষ চাওক।
^ আক্ষ., “লেখক।” শব্দকোষ চাওক।
^ আক্ষ., “তেওঁ জ্বলি থকা গেহেনাৰ যোগ্য হʼব।” গেহেনা যিৰূচালেমৰ এনে এক ঠাই আছিল, যʼত জাৱৰ জ্বলোৱা হৈছিল।
^ ব্যভিচাৰৰ অৰ্থ হৈছে নিজৰ স্বামী বা পত্নীৰ বাহিৰে আন কাৰোবাৰ লগত শাৰীৰিক সম্পৰ্ক ৰখা।
^ আক্ষ., “গেহেনা।”
^ আক্ষ., “গেহেনা।”
^ গ্ৰীক ভাষাত পৰনিয়া। শব্দকোষ চাওক।
^ অতি. ক৫ চাওক।
^ যিৰূচালেমক পবিত্ৰ নগৰ বুলি বিশ্বাস কৰা হৈছিল।
^ অৰ্থাৎ যিহোৱাৰ।
^ অৰ্থাৎ সুত নিদিয়াকৈ ধাৰ খোজে।
