Eclesiastés 3:1-22
3 Taqe kunatakiw mä señalat tiempojj utji,aka oraqenjja sapa luräwitakiw mä tiempojj utji:
2 nasiñatak mä tiempo, jiwañatak mä tiempo;satañatak mä tiempo, sataskäna uk jikʼsuñatak mä tiempo;
3 jiwayañatak mä tiempo, qollañatak mä tiempo;allinukuñatak mä tiempo, saytʼayañatak mä tiempo;
4 jachañatak mä tiempo, laruñatak mä tiempo;warariñatak mä tiempo, thoqoñatak* mä tiempo;
5 qalanak jaqtʼañatak mä tiempo, qalanak montontʼañatak mä tiempo;qhomantañatak mä tiempo, jan qhomantañatak mä tiempo;
6 thaqañatak mä tiempo, chhaqjjew sañatak mä tiempo;imañatak mä tiempo, jaqtjjañatak mä tiempo;
7 chʼiyjañatak mä tiempo,+ chʼukuñatak mä tiempo;amuktʼañatak mä tiempo,+ parlañatak mä tiempo;+
8 munañatak mä tiempo, uñisiñatak mä tiempo;+guerratak mä tiempo, sumankañatak mä tiempo.
9 ¿Kunarak mä trabajirejj wali chʼam tukutapat jikjjataspasti?+
10 Kuna lurañanaktï Diosajj jaqenakan wawanakaparojj ocupatäpjjañapatak churkäna ukwa nayajj uñjta.
11 Diosajj tiempoparuw taqe kunsa wali sum* luri.+ Jaqen chuymaparusa wiñay jakañ munañwa uchäna,* ukhampachasa jaqenakajj janiw cheqpach Diosan luratanakapat taqpun amuyapkaniti.
12 Ukatjja nayajj ak amuyta, jaqenakan kusistʼapjjañapasa jakäwinakapan kunatï walïki uk lurapjjañapas wali sumawa, ukat sipansa janiw jukʼamp sumajj utjkaspati,+
13 jaqenakan taqeni manqtʼasipjjañapasa, umtʼasipjjañapasa, wali chʼam tukus trabajipjjatapat kusistʼapjjañapasa wali sumarakiwa. Ukasti Diosan mä regalopawa.+
14 Taqe kuntï cheqpach Diosajj lurki ukajja wiñayatakiwa, ukwa nayajj yateqta. Jaqenakajj janiw kunsa luratanakapar yaptʼapkaspati, janirakiw kunsa apaqapkaspati. Cheqpach Diosaw ukham luri, ukhamat jaqenakajj jupar ajjsarapjjañapataki.+
15 Kunatï pasaski ukajja pasawayjjänwa, kunatï utjkani ukajja utj-jjapunïnwa,+ ukampis cheqpach Diosajja kuntï jaqenakajj thaqapkäna ukwa thaqe.
16 Aka oraqenjja* akwa uñjarakta: justicia lantejja jan wali lurañanakaw utjäna, kunatï cheqapäki uka lantejja jan wali lurañanakaw utjäna.+
17 Ukatwa nayajj chuymajan akham sayäta: “Cheqpach Diosaw cheqap sarnaqer jaqerusa jan wali jaqerus juzgani,+ kuna laykutejj sapa luräwitakisa sapa trabajotakisa mä tiempow utji” sasa.
18 Akham sasaw chuymajan sarakiyäta, cheqpach Diosaw jaqenakan wawanakaparojj yantʼani, ukatjja animalanakjamäpjjatapwa jupanakarojj uñachtʼayani,
19 kunatï jaqenakan wawanakaparojj paski ukajja animalanakarojj pasarakiwa, taqenis mä pachpa tukuyanikïpjjewa.+ Kunjamtï animalajj jiwkejja ukhamarakiw jaqejj jiwi, taqeniw mä pachpa espiritunïpjje.+ Ukhamasti jaqejj janiw animalanakat sipansa jilankkiti, kuna laykutejj taqe kunas inamayakiwa.
20 Taqeniw mä pachpa lugarar sarapjje.+ Taqeniw laqʼat jutapjje,+ taqenirakiw laqʼar kuttʼapjje.+
21 ¿Jaqenakan espiritupajj alayar makatatapsa animalanakan espiritupajj oraqer saraqatapsa khitirak yatisti?+
22 Nayajj akwa uñjta, jaqejj trabajopampi kusisitäñapajj wali sumawa, ukat sipansa janiw jukʼamp sumajj utjkiti,+ ukaw jupan pagopajja. Kuna laykutejj jupajj jiwjjani ukhajj ¿khitirak kunatï paskani uk uñjayaspasti?+
Notanaka
^ Hebreo arunjja, “thoqnaqañatak; tʼisknaqañatak”.
^ Jan ukajja, “suma ordentʼata”.
^ Jan ukajja, “wiñayäki ukwa uchäna”.
^ Hebreo arunjja, “Inti aynach toqenjja”.
