Lucas 23:1-56
23 Ukatsti taqpachaniw sartasipjjäna, Jesusarojj Pilaton ukaruw apapjjäna.+
2 Juparojj akham sasaw juchañchañ qalltapjjarakïna:+ “Aka jaqejj jan walinak lurañapatakiw markasar chʼamañchaskatayna,+ Cesarar* impuesto pagañajj janiw wakiskiti sasaw parlaskatayna, ukhamaruw katjapjjta. Nayajj Cristötwa, mä reyïtwa sasaw parlaraki”+ sasa.
3 Ukatwa Pilatojj jupar akham sasin jisktʼäna: “¿Jumätat judionakan reyipajja?” sasa. Jupajj sarakïnwa: “Juma pachpaw uk sasktajja”+ sasa.
4 Pilatojja jilïr sacerdotenakarusa mayni jaqenakarusa akham sasaw säna: “Janiw nayajj aka jaqen kuna jucha lurataps jikjjatkti”+ sasa.
5 Jupanakajj arsusipkakïnwa, akham sasa: “Aka jaqejj Judea markpachanwa yatichäwinakapamp jaqenakar chʼajjwayaski. Galileat qalltasajj akakamaw ukham luraski” sasa.
6 Uk istʼasasti “¿aka jaqejj galileoti?” sasaw Pilatojj jisktʼäna.
7 Herodesajj apnaqkäna uka cheqankirïtap yatisajja,+ jupan ukaruw apayäna. Uka urunakansti Herodesajj Jerusalén markankaskänwa.
8 Herodesajj Jesusar uñjäna ukhajja, wal kusisïna. Jupat wal parlir istʼasasti, Herodesajj walja tiempow Jesusar uñjañ suyaskäna,+ jupan lurat mä milagro* uñjañs munarakïnwa.
9 Ukatwa jupar wal jisktʼañ qalltäna, ukampis Jesusajj janiw kamskänsa.+
10 Jilïr sacerdotenakasa escribanakasa saytʼasipjjänwa, wali colerataw jupar juchañchapjjäna.
11 Herodesajj soldadonakapamp chikaw jupar jiskʼachäna,+ mä suma isimpi isthapiyasaw jupat burlasïna.+ Ukatjja Pilaton ukaruw kuttʼayjjäna.
12 Herodesampi Pilatompejj enemigöpkchïnsa, uka urpachaw amigöjjapjjäna.
13 Ukjjarusti Pilatojj jilïr sacerdotenakampiru, marka apnaqerinakampiru, markankirinakampiruw jawsthapïna.
14 Ukatjja akham sasaw jupanakar säna: “Aka jaqejj saytʼasipjjañapatakiw markar chʼamañchaski sasaw jumanakajj nayan ukar apanipjjtajja. ¡Jichhajj uñjapjjam! Jumanak nayraqatanwa jupar jisktʼarakta. Kunanaktï jupa contrajj parlapkta ukarjam juchañchañatakejj janiw kuna juchas jupan utjkiti.+
15 Janirakiw Herodesas jupan kuna juchsa jikjjatkiti, ukatwa nanakan ukar kuttʼayani. Jupan jiwañapatakejj janiw kuna jan walsa lurkiti.
16 Ukhamajj jawqʼjasajj antutjjäwa”+ sasa.
17 *——
18 Jaqenakasti taqeniw akham sasin arnaqasipjjäna: “¡Uka jaqerojj jiwayam, antisas Barrabasar antutarapipjjeta!”+ sasa.
19 Barrabasajj autoridadanak contraw saytʼäna, jaqe jiwayarakïna, ukatwa carcelan llawintatäskäna.
20 Jesusar antutañ munasajja, mayampiw Pilatojj jupanakar parläna.+
21 Jupanakajj akham sasaw jachʼat arnaqasipjjäna: “¡Lawar chʼakkatatäpan!* ¡Lawar chʼakkatatäpan!”*+ sasa.
22 Kimsïr kutimpiw Pilatojj jupanakar akham säna: “¿Kunata? ¿Kuna jan walsa aka jaqejj luri? Jupan jiwañapatakejj janiw nayajj kuna juchs jikjjatkti. Ukhamajj jawqʼjasin antutjjäwa” sasa.
23 Uk istʼasasti jukʼampiw jupanakajj jachʼat arnaqasipjjäna, jiwayatäpan* sasaw wal mayipjjäna. Ukhamatwa jupanakajj jachʼat arnaqasisin atipapjjäna.+
24 Ukatwa Pilatojj kuntï mayipkäna uk lurasiñapatakejj mä amtar purïna.
25 Khitirutï mayipkäna uka jaqeruw antutjjäna, kawkïritejj autoridadanak contra saytʼatapata ukhamarak jaqe jiwayatapat carcelan llawintatäkäna ukaru. Jesusarusti uka jaqenakaruw katuyjjäna, ukhamat kuntï munapkäna uk jupar lurapjjañapataki.
26 Jesusar apasipkäna ukhajja, Cirene markan nasiri Simonaruw katuntapjjäna, jupajj pampatwa jutaskäna. Tʼaqesiñ lawa* jupar apjjatasasti, Jesusan qhepap apayapjjäna.+
27 Walja jaqenakaw jupar arkapjjäna, warminakas uka taypin utjarakïnwa. Uka warminakajj walpun jupat llakisisajj chuyms leqʼesipjjäna, wararipjjarakïna.
28 Jupanak toqer uñtasasti, akham sasaw Jesusajj säna: “Jerusalenankir imill wawanaka, jan nayat jukʼamp jachapjjamti, antisas jumanakampit wawanakamampit jachapjjam.+
29 Urunakajj jutaskiwa, ukapachaw jaqenakajj akham sapjjani: ‘Jan wawan warminakasa, jan ususir warminakasa, jan ñuñuyir warminakasa kusisipjjpan’+ sasa.
30 Ukatsti akham sasaw qollunakar sapjjani: ‘¡Imjjatapjjeta!’, jiskʼa qollunakarusti: ‘¡Imantapjjeta!’+ sasa.
31 Niyakejjay qoqan* chʼojjñäskipan akanakajj paschejja, ¡qoqajj wañsutäjjani ukhajj kunakïkani!” sasa.
32 Ukatjja jan walinak lurir pä jaqenakaruw apapjjarakïna, jupamp chika jiwayañataki.+
33 Pʼeqe Chʼakha satäki uka cheqar puripjjäna+ ukhajja, ukanwa Jesusarojj lawar chʼakkatapjjäna,* jan walinak lurir jaqenakamp chika, maynirojj kupëjjaparu maynirusti chʼeqäjjaparu.+
34 Jesusajj sänwa: “Alajjpachankir Awki, jupanakar perdonam, kuntï lurapki uk janiw yatipkiti” sasa. Ukjjarusti jupan isinakap jaljasiñatakiw suertenak willtapjjäna.+
35 Jaqenakajj ukan saytʼataw uñchʼukisipkäna. Marka apnaqer jaqenakajj jupatak jan wal uñanaqasaw jiskʼachapjjäna, akham sasa: “Yaqhanakarojj salvarakisä. Jupatejj Diosan Cristopächi, Ajllitarakïchi ukhajj salvaspanaya”+ sasa.
36 Soldadonakas ukhamarakiw jupat burlasipjjäna. Jakʼachasisajj kʼallkʼu vino churapjjäna,+
37 akham sasa: “Jumatï judionakan reyipästajja, salvasimaya” sasa.
38 Mä letrerow jupa patjjan utjarakïna, ukansti akham sänwa: “Jupajj judionakan reyipawa”+ sasa.
39 Uka cheqan warkkatatäkäna uka jan walinak lurir jaqenakatjja, akham sasaw maynejj jupar jiskʼachañ qalltäna:+ “¿Jumätati Cristojja? ¡Ukhamajj juma pachpa salvasim, nanakarus salvapjjarakita!” sasa.
40 Uk istʼasasti akham sasaw maynïrejj jupar toqenoqäna: “Jupjam juchañchatäkasas ¿janipunit Diosar mä akchʼas ajjsarkta?
41 Jiwasajj jan walinak luratas laykuw tʼaqesisktanjja, ukampis aka jaqejj janiw kuna jan wals lurkiti” sasa.
42 Ukatsti sarakïnwa: “Jesús, Reinomar* mantjjäta ukhajj nayat amttʼasitätawa”+ sasa.
43 Jupasti sarakïnwa: “Cheqpachapuniw nayajj jichhürun sissma: nayamp chikaw jumajj Paraisonkäta”+ sasa.
44 Ukatjja niya chika uröjjänwa,* ukhampachas taqe uka oraqen chʼamaktʼäna, niya kimsa jaypʼu horaskama,*+
45 intin chʼamaktʼatap layku. Templon cortinapas+ chika taypitwa chʼiyjtarakïna.+
46 Jesusasti akham sasaw jachʼat artʼasïna: “¡Alajjpachankir Awki, amparamaruw espirituj katuyassma!”+ sasa. Uk arsusaw jupajj jiwjjäna.+
47 Kunas pasaskäna uk uñjasajja, ejerciton oficialapajj akham sasaw Diosar jachʼañchañ qalltäna: “Cheqapuniw aka jaqejj cheqapar sarnaqer jaqëskpachäna”+ sasa.
48 Uñjañatak tantachasipkäna uka jaqenakajja, kunanakatejj paskäna ukanak uñjasajj chuyma leqʼesisaw utanakapar kuttʼjjapjjäna.
49 Jupar uñtʼirinakajja taqeniw jaya cheqan saytʼatäsipkäna. Galileat jupamp chik jutapkän uka warminakas ukankapjjarakïnwa, kunanakatï paskäna ukanaks uñjapjjarakïnwa.+
50 Ukatjja José sutini mä jaqew utjäna, Judionakan Jachʼa Tribunalapankiri,* jupajj cheqapar sarnaqer suma jaqënwa.+
51 Janiw uka jaqenakan jan wali amtaparus ni lurataparus apoyañ munkänti. Jupajj Judeankir Arimatea markatänwa, Diosan Reinopwa* suyarakïna.
52 Ukatsti Joseajj Pilaton ukar sarasaw Jesusan cuerpop mayïna.
53 Cuerpo apaqasasti+ suma linot lurat mä telampiw llawuntäna. Qarqar* lurat mä sepulturaruw imjjarakïna.+ Uka sepulturarojj janiw khitis imaskänti.
54 Ukatsti Wakichasiñ Uröjjänwa,+ sábado+ urus niyaw puriniñampïskäna.
55 Galileat Jesusamp chik jutir warminakas ukarojj sarapjjarakïnwa, jupanakajj sepultura uñantapjjäna, kunjamsa Jesusan cuerpop uchapjjäna uks uñjapjjarakïnwa.+
56 Ukatsti suma olorani qollanakampi aceitenakampi wakichiriw kuttʼapjjäna. Ukampis sábado+ urunjja, kunjamtï mandamienton siski ukarjamaw samarapjjäna.
Notanaka
^ Griego arunjja, “mä señal”.
^ Yaqhep nayra qellqatanakanjja, Lucas 23:17 qellqatajj janiw uñstkiti, janirakiw Diosan amuytʼayat Qellqatjam uñtʼatäkiti. Apéndice A3 liytʼäta.
^ Variante: “kʼutkatatäpana”.
^ Jan ukajja, “¡Lawar chʼakkatat jiwayatäpan! ¡Lawar chʼakkatat jiwayatäpan!”.
^ Jan ukajja, “lawar chʼakkatat (kʼutkatat) jiwayatäpan”.
^ “Tʼaqesiñ lawa” siski uk glosarion liytʼäta.
^ Jan ukajja, “arbolan”.
^ Variante: “kʼutkatapjjäna”.
^ Jan ukajja, “Gobiernomar”.
^ Griego arunjja, “niya sojjtïr horasäjjänwa”.
^ Griego arunjja, “llätunkïr horaskama”.
^ Jan ukajja, “Sanedrinankiri”.
^ Jan ukajja, “Gobiernopwa”.
^ Variante: “Jaqher”.
