Proverbios 1:1-33
1 Salomón chachan yatiñamp arsut arunakapa,+ jupajj Davidan yoqapänwa,+ Israel markan reyiparakïnwa.+
2 Yatiñamp arsut uka arunakajja mä jaqejj yatiña jikjjatañapataki,+ cheqañchäwi katoqañapataki,yatiñamp arsut arunak amuytʼañapatak qellqatawa.
3 Yatiñamp arsut uka arunakajja mä jaqerojj sum amuytʼasiñatak yanaptʼki uka cheqañchäwi katoqasiñapataki,+cheqapar sarnaqañapataki,+ cheqapar amtañapataki,+ cheqapar uñjañapatak* qellqatawa.
4 Uka yatiñamp arsut arunakajja jan experienciani jaqen sum amuytʼasiñapataki,+wayn tawaqonakajj yatiñanïpjjañapataki ukhamarak sum amuytʼasirïpjjañapatak qellqatawa.+
5 Yatiñan mä jaqejja istʼiwa, jukʼampwa yateqaraki,+amuytʼasir mä jaqejja yatiñan jaqempiw yatichayasi,+
6 ukhamat yatiñamp arsut arunaka, jan amuytʼañjam arunaka,*yatiñan jaqenakan arsutanakapa, jan amuytʼkañ arunakap amuyañataki.+
7 Jehová Diosar ajjsarañajja* uñtʼañan qalltapawa.+
Jan amuytʼasir jaqenakakiw yatiñarusa cheqañchäwirus jiskʼachapjje.+
8 Nayan wawaja, awkiman cheqañchäwiparojj istʼam,+taykaman yatichäwinakap* jan apanukumti.+
9 Ukanakasti pʼeqematakejj wali munkañ mä coronawa,+kunkamatakis mä suma collarawa.+
10 Nayan wawaja, jucharar jaqenakatï jan walinak lurayañ munapjjätam ukhajja, jan jupanakampejj apayasimti.+
11 Inas jupanakajj akham sapjjchïtam: “Nanakamp jutam.
Mä akatjamat maynir jiwayañatak suyjjatañäni.
Jan juchan jaqen pasañapkamajj imantataw suyañäni.
12 Jiwasajj jakkirpachwa jupanakarojj manqʼantañäni, kunjamtï Sepulturajj* lurki ukhama,jupanakajj qʼala manqʼantatäpjjaniwa, kunjamtï pʼiyar saraqapki ukanakajj qʼala manqʼantatäpki ukhama.
13 Taqpach suma utjirinakapwa aparañäni,kunanaktï aparankañäni ukanakampiw utanakasarojj phoqtʼayañäni.
14 Jumajj nanakampiw mayachtʼasjjañama,*kunanaktï lunthatkañäni ukanakjja, taqeniw mä igualkam jaljasiñäni”* sasa.
15 Nayan wawaja, jan jupanakar arkamti,jupanakan thakipat jitheqtam,+
16 jupanakan kayunakapajj jan wal lurañatakiw tʼijupjje,wila wartañatakis jankʼakïpjjewa.+
17 Jamachʼin uñjkata mä trampa uchañajj inamayakiwa.
18 Ukatwa uka jucharar jaqenakajj wila wartañatakejj suyjjatapjje,jupanakajj mayninakan jakañ vidap apaqañatakiw imantasipjje.
19 Khitinakatï qamiriptañatak yaqhanakar lunthatapki uka jaqenakan luratanakapajj ukhamawa,kunanaktï jikjjatapki ukanakajja pachpa jakañ vidapwa jupanakar apaqani.+
20 Cheqpach yatiñajj+ callenakanwa jachʼat arnaqasi.+
Plazanakanjja jachʼatwa arnaqasiski.+
21 Wali sarnaqat callenakan esquinanakapanwa arnaqasi.
Markar mantañ punkunakapanjja akham sarakiwa:+
22 “Jan experiencian jaqenaka, ¿kunapachkamarak jan amuytʼasis sarnaqañar munasipjjätasti?
Burlasir jaqenaka, ¿kunapachkamarak yaqhanakat burlasisin kusisipjjätasti?
Jan amuytʼasir jaqenaka, ¿kunapachkamarak yatiñarojj uñisipjjätasti?+
23 Cheqañchäwij-jja katoqasipjjam.*+
Ukatsti nayajj espiritujwa jumanakar churapjjäma,arunakajsa uñtʼayapjjarakïmawa.+
24 Nayajj jawsayätwa, ukampis jumanakajj nayar jan istʼas sarnaqasipkakiyätawa,nayajj amparajwa churayäta, ukampis janiw maynis yäqkitänti.+
25 Kutin kutiniw taqpach ewjjtʼanakajarojj jan phoqapkayätati,cheqañchäwijsa apanukupjjtawa.
26 Jan waltʼäwin uñjasipkäta ukhajja nayajj larusirakïwa,kunanakatï wal ajjsarayapktam ukanakajj jumanakjjar jutkani ukhajj burlasirakïwa,+
27 kunapachatï wal ajjsarayapktam ukanakajj mä jachʼa thayjam jutkani,jan waltʼäwinakajj mä jachʼa thayjam purinkani,llakinakasa problemanakas jumanakjjar purinkani ukhajja burlasirakïwa.
28 Uka tiemponjja jupanakajj jawsasipkakitaniwa, ukampis janiw nayajj jayskäti.
Jupanakajj wal thaqapjjetani, ukampis janiw jikjjatapkitaniti,+
29 kuna laykutejj jupanakajj yatiñar uñisipjjänwa,+Jehová Diosar ajjsarañsa janiw munapkänti.+
30 Ewjjtʼaj-jja jupanakajj apanukupjjänwa,taqpach cheqañchäwijsa jupanakajj jiskʼachapjjänwa.
31 Ukatwa jupanakajj luratanakaparjam jan walinakan uñjasipjjani,*+pachpa ewjjtʼanakapamp sistʼayatäpjjaniwa.
32 Kuna laykutejj jan experiencian jaqenakajja kutkatasirïpjjatap laykuw jiwapjjani,jan amuytʼasir jaqenakajja jan yäqasirïpjjatap laykuw tukjatäpjjani.
33 Ukampis khititï nayar istʼkitani ukajj jan ajjsarasaw jakasini,+janirakiw kuna jan waltʼäwirus ajjsarkaniti”.+
Notanaka
^ Jan ukajja, “jan khitir yaqhachas uñjañapatak”.
^ Jan ukajja, “parabolanaka”.
^ Jan ukajja, “wali respetomp uñjañajja”. “Diosar ajjsaraña” siski uk glosarion liytʼäta.
^ Jan ukajja, “leyip”.
^ Jan ukajja, “Jumajj nanakamp chik suerte willtam”.
^ Jan ukajja, “mä bolsatak compartiñäni”.
^ Jan ukajja, “Nayajj cheqañchkta ukhajj kuttʼanipjjam”.
^ Hebreo arunjja, “achunakapat manqʼapjjani”.
