1-3. ¿Kunatsa jan awkin jan ukax jan taykan familianakax wal utji, ukat familiankirinakax kuna jan walinakansa uñjasipxi?

 JAN awkin jan ukax jan taykan familianakaw Estados Unidos markanxa wal mirantasipki sasaw sapxi. Taqi chiqanwa ukhamaxa. Divorciasipxi, jaljtapxi, utat sarxapxi, jan awkin wawanakaw yuripxi, taqi ukanakaw awk taykan jakäwipsa jan ukax wawanakan jakäwip jan walin uñjasiyi.

² Mä sapa taykax akham sasaw säna: “Pä wawani viuda warmïtwa, ukampis 28 maranikïsktwa. Wali llakitaw uñjasta, janiw wawanakajar jan awkini uywañ munkti. Janjamakiw khitis munkituti. Wawanakajax jachir uñjapxitu ukhax wal llakisipxaraki” sasa. Ukham wali llakita, colerataraki, sapakiraki ukhamaw sapa awk taykanakax jikxatasipxi, ukampis irnaqiriw sarapxañaparaki, utansa lurañanakxa phuqapxañaparakiwa. Sapa awkïñas sapa taykäñas wali chʼamawa. Lurañanakax ukhamarakiwa, ukat janirakiw tukuskiti.

³ Awki sapampi jan ukax tayka sapampi uywat wawanakax yaqha jan walinakan uñjasipxaraki. Awk jiwxipan jan ukax sarxipanxa wal llakisipxaspa, tayka jiwxipans jan ukax sarxipansa ukhamaraki. Jan awkinïxasas jan ukax jan taykanïxasas janis kunas askïkaspa ukhamwa amuyapxi.

4. Jan awkin jan ukax jan taykan familianakarux Jehová Diosaw uñjaski, ¿kunatsa ukham sistanxa?

⁴ Uka kasta familianakax nayratpachpunwa utjatayna.  “Wajchanakatsa” “ijma jan ukax viuda warminakatsa” Bibliax parlapuniwa (Éxodo 22:22; Deuteronomio 24:19-21; Job 31:16-22). Jehová Diosax jupanakarux sum uñjäna. “Diosax wajchanakan awkipawa, ijma warminakan arxatiripawa” sasaw salmonak qillqirix satayna (Salmo 68:5). Chiqpachansa Jehová Diosax ukhamwa uka kasta familianakarux uñjaskaraki. Ukat kunjamsa sum jakasipxaspa uka tuqitsa yaticharakiwa.

5. ¿Qalltanxa kuna jan walinakansa uñjasipxi sapa awkis jan ukax sapa taykasa?

⁵ Kunjamsa utax apnaqasiñapa uka tuqit amuytʼañäni. Mä viuda warmix akham sänwa: “Mä chachan yanaptʼapaw walja luräwinakatakix munasi, utax askichañäki ukhaxa, janiw kamachañjamäkisa” sasa. Inas chachax wawanakampi utan qhiparxasax ukham uñjasirakchispa, utanxa kunayman lurañanakaw utji. Janiw kunas apthapitäxaspati, uk uñjasax wawanakax wal llakisipxaspa, janiw sum jakasxapxaspati.

6, 7. 1) Proverbios libron parlki uka ‘suma warmitxa’, ¿kunsa yatiqsna? 2) ¿Sapa awkis jan ukax sapa taykas kunjamsa lurañanakap phuqasax familiapar yanaptʼaspa?

⁶ ¿Kunas yanaptʼistaspa? Proverbios 31:10-31 qillqatan parlki uka ‘suma warmit’ amtañäni. Kunanaktï uka warmix luräna ukax wali muspharkañawa: aläna, aljarakïna, chʼukuñs yatirakïna, phayarakïna, qullqsa thaqharakïna, yapuchiris sararakïna ukhamawa. ¿Kunjamatsa taqi ukanak jikxatäna? Janiw jayrasirïkänti, wali alwat sartasin lurañ qalltirïna, ukat arumkamarakiw irnaqirïna. Ukanak lurañatakix wali sum tiempxa jalanuqtʼasïna; ukampis yanaptʼayasirïnwa, yaqhanakatakis kunsa lurarakirïnwa. Ukatwa wawanakapax jupar wal munasipxäna.

⁷ Sapaki wawanak uywasstan ukhaxa, janiw utan lurañanakasxa apanukuñasäkiti, jan ukasti phuqañasawa.  Taqi chuymaw sum lurañasa, ukhamatwa wawanakax kusisit jakasipxarakispa. Ukatakix janïräkipanwa wali sum amuytʼañasa, taqi kunatakiw tiempo apstʼasiñasa. Diosan Arupax akham siwa: “Suma amuytʼampi kuna amtäwinaka wakichatasa sumakiwa phuqhasi” sasa (Proverbios 21:5). Mä sapa awkix akham sänwa: “Manqʼat awtjitu ukhakiw manqʼañ tuqitxa amuyirïta” sasa. Janïr manqʼa wakichasiñ amtktan ukhaxa wali sumaw manqʼas mistu, munkañarakiwa, ukampis awtjistu ukhaki wakichastan ukhaxa janiw sumäkiti. Kunas utan lurañ wakisi, inas ukanak lurañ yatiqchiñäni. Yaqhip sapa taykanakax pintañsa, utan kun askichañsa yatiqapxarakiwa, ukat yuntamp satañsa yatiqapxarakiwa, yaqhanakar jisktʼasisaw yatiqapxi.

8. ¿Jan awkin jan ukax jan taykan familianakanxa kunjamsa wawanakax yanaptʼapxaspa?

⁸ ¿Wawanakar yanap mayiñax walikïskaspati? Mä sapa taykax akham sänwa: “Awisax awkin lurañanakap yuqall wawanakar lurayañjamawa” sasa. Ukax inas taykatakix waljamächispa, ukampis wawaruw jan waltʼaykaspati. Bibliax qillqaskäna uka tiemponakanxa, kunatix jupanakatakix wakiskäna ukanakwa wawanakax lurapxirïna (Génesis 37:2; Cantar de los Cantares 1:6). Ukhamasti, janis walja lurañanakampi qariyañasäkchixa, lurañanak churañaw wakisispa, inas platonak jaripxchispa, uta apthapipxchispa, ikiñapsa sum apthapipxchispa. Ukampis ¿janit jupamp chika lurañax wakiskarakispa? Ukax wali askïspawa.

9. ¿Sapa warminakatakix kunatsa qullqi jikxatañax wali chʼamäspa?

⁹ Kunatï wawanakataki munaski ukanak alañatakix janiw qullqix utjkiti, walja sapa awk taykanakaw ukhaman uñjasipxi, ukampis khitinakatix tawaqüsipki ukanakatakix wawanak uywañax sinti  chʼamäspawa *. Yaqha chiqanakanxa marka apnaqirinakaw wawani sapa taykanakar yanaptʼapxi, ukanakampiw yanaptʼasipxaspa irnaqäw jikxatañkama. Wakischini ukhaxa ukanakampiw mä cristianox yanaptʼasirakispa, ukax Diosan Aruparjamax walikïskiwa (Romanos 13:1, 6). Ijmanakas ukat divorciatäpki ukanakas ukham jan walinakan uñjasipxaraki. Inas utan walja maranaka irnaqapxchïna, ukampis jichhax qullqit irnaqiriw sarxapxi, ukat niya taqinis jukʼa qullqitakwa irnaqapxi. Yaqhipanakasti kunayman lurañanak yatiqasaw jan ukax cursillonakar sarasaw nayrar sartapxaraki.

10. Sapa taykax irnaqir sarañapawa, ukampis ¿kunjamsa uka tuqit wawanakar amuytʼayaspa?

¹⁰ Ukampis wawanakax janiw mamapan irnaqir sarañapxa munapkaspati, ukat uk uñjasax janiw sapa taykax “nayaw juchanïtxa” sas juchañchasiñapäkiti. Jan ukasti kunatsa taykjamax irnaqañapa ukwa qhanañchañapa, ukat Jehová Diosax awk taykaw familiat llakiñapa siwa, uksa amuytʼayañaparakiwa (1 Timoteo 5:8). Tiempompix taqiniw ukar yatinuqtapxani. Ukampis walja lurañanakanïkasas wawanakatakix tiempo apstʼasiñasapuniwa. Ukhamatwa qullqi tuqit sinti jan waltʼañanakax jan utjkaniti (Proverbios 15:16, 17).

11, 12. ¿Sapa awkinakas jan ukax sapa taykanakas kuna tuqitsa amuyasipxañapa, ukat kunjamsa uk lurapxaspa?

¹¹ Sapa awkis jan ukax sapa taykas wal wawanakapar jakʼachasiñ yatipxi, ukampis amuyasiñasawa, janiw wawanakax kuntï mä awkis jan ukax mä taykas lurañapäki ukxa lurapkaspati. Amuytʼañataki, taykax yuqall wawampi familia apnaqayañ munaspa ukhaxa  janiw walïkaspati, ukat chachjamax kunjamsa sapa awkix jikxatasi ukxa janiw imill wawapar sapa kuti arxayañapäkiti, llakisiyaspawa. Ukhamanak lurañax janipuniw walïkiti, wawanakaruw pantjasiyaspa.

¹² “Janiw llakisipxätati, nayaw sum uñjasipkäma” sasaw awk taykax wawanakapar sapxañapa, ukhamax janiw awk taykanakax wawanakan uywata sarnaqapxañapäkiti (2 Corintios 12:14 uñxatarakïta). Inas wawanakar sapak uywasax yanapsa jan ukax kuna suma iwxtʼanaksa munapxchispa. Ukampis irpir chuymaninakar jan ukax amuytʼan jilat kullakanakar mayiñaw wakisispa, janiw wawar mayiñax walïkaspati (Tito 2:3).

13. ¿Mä sapa taykax wawanakar chiqañchañatakix kuna jan walinakansa uñjasispa?

¹³ Chachatakix wawanakar chiqañchañax janiw  chʼamäkiti, ukampis warmitakix chʼamawa. Mä sapa taykax akham siwa: “Yuqanakajax jachʼäxapxiwa ukat thuru arunïxapxiwa. Awisax payachasiñjamakïxiwa, pisi chʼamäkiristsa ukham amuyasiñjamakïxiwa” sasa. Inas jichhaki chachax jan ukax warmix jiwaskchi, jan ukax inas chacha warmi jan waltʼayasxasax jaljtasin wali llakita, wali colerata ukham jikxatassta. Wawanak panpachani uywañ amtasax inas wawanakaw awkipampi jan ukax taykapamp sarxañ munapxani sas llakisisksta. Ukhamanakan uñjasisaw wawanakar chiqañchañax chʼamäspa.

14. ¿Sapa awk taykanakar kunas yanaptʼaspa wawanakar sum chiqañchañatakixa?

¹⁴ Bibliax akham siwa: “Munañapampi sarnaqiri wawasti taykaparux pʼinqachayiwa” sasa (Proverbios 29:15). Familian kamachinak uchañsa ukat phuqayañsa Jehová Diosaw yanaptʼätamxa, ukhamasti janiw axsarañamäkiti, janirakiw juma pachpas juchañchasiñamäkiti ni llakimpis atipayasiñamäkiti (Proverbios 1:8). Maysa tuqitxa, janipuniw Diosan kamachinakapxa pʼakintayañamäkiti (Proverbios 13:24). Amuyumpiw chiqañchañasa, janiw taqi kunsa munañanakapar lurapxañapäkiti. Tiempompix niya taqiniw sum amuyxapxani. Ukat kunas chuymanakapan utji uk amuyañasarakiwa. Mä sapa awkix akham sänwa: “Niyakixay taykan jiwatapat llakitäsipkchixa, ukhamax ukarjamaw wawanakar chiqañchirïta. Jupanakampix parltʼasipuntwa. Manqʼa phaykasas wali sum parltʼasipxta. Ukharakiw wawanakax kuntï sañ munapkitu ukxa sapxarakitu” sasa.

15. ¿Divorciat awk taykanakax kunsa jan lurapxañapäki?

¹⁵ Jumax divorciatästa ukhaxa inas wawanak jakʼat jan walinak chachat jan ukax warmit parlirïsta, ukampis ukanak lurasax janiw kuna asksa jikxatkätati. Awk taykax tuqisipxi ukhaxa wawanakaw jan walin uñjasipxi, ukat tiempompix janiw maynirus respetxapxiti.  Ukhamax janiw “¡tatamjamätawa!” sasa wawar tuqiñax wakiskiti. Chachax inas sinti jan walinak lurchi, ukampis wawaman awkipawa, uka wawarux panpachaniw munasipxañama, yatichapxañama ukat uñjapxañamaraki *.

16. ¿Wawanakar sum yatichañatakix kunsa sapa awk taykanakax lurapxañapa?

¹⁶ Kunjamtï akhakam yatiqktanxa, yatichasaw wawanakarux chiqañcharaksna, janiw jawqʼañasakïkiti. Ukatxa Diosat yatichasarakiw walja jan walinakat jarkʼaqsna (Filipenses 3:16). Tantachäwinakarus sarañasarakiwa (Hebreos 10:24, 25). Ukat familiamp Bibliat yatiqañax wali askirakiwa. Chiqpachansa sapa kuti yatiqañax chʼamawa. Ukampis amuytʼasir mä warmixa akham sasaw säna: “Utar qarit purisax samartʼañ munañjamawa. Ukampis kunjamsa wawarux yatichäxa ukxa lupʼipunirïtwa, ukwa phuqarakirïta. Phuchajatakix Bibliat familian yatiqañax wali sumapuniwa” sasa.

17. Timoteorux sum yatichapxäna, ¿kunsa ukat yatiqsna?

 ¹⁷ Pablomp chika sarir Timoteo waynarux mamapampi awichapampiw Bibliat yatichapxatayna, janiw awkipax yatichkänti. Ukampis Timoteox wali suma cristianünwa (Hechos 16:1, 2; 2 Timoteo 1:5; 3:14, 15). Ukhamasti, Jehová Diosar iyawsapxañapataki chiqapar yatichasina sum wawanakasar uywapxañäni ukhaxa, ukhamarakiw jilsupxaspa (Efesios 6:4).

18, 19. 1) ¿Mä sapa awkirus jan ukax mä sapa taykarus kunjamsa llakix atipaspa? 2) ¿Jañchin munañanakap atipañatakix kuna iwxanakas yanaptʼistaspa?

¹⁸ Mä sapa warmix akham sasaw säna: “Utar purisax sapakiw utan uksa aksa uñanaqasta, wawanakax ikiratäxapxi ukhaxa walpun llakix apxattitu” sasa. Ukhaman uñjasisax awk taykanakax llakimpiw atipayasipxi. Kunjamatï nayrax chacha warmjam wali sum jakasipkäna ukax wali munañjamawa. Ukampis ¿jan ukham llakisiñatakix kun lurañas walikïskaspati? Pablon urunakapanxa yaqhip viuda tawaq warminakax ‘pachpa amtäwinakapampi Cristot jayarstʼayataw jikxatasipxäna’ (1 Timoteo 5:11, 12). Ukhamax jañchin  munañanakapampi apayasis Diosat jithiqtañax janiw walïkiti (1 Timoteo 5:6).

¹⁹ Mä cristianox akham sänwa: “Kunjamtï chacha warmjam sarnaqañäki ukax wali munañjamawa, ukampis uka amuyunakampi jan atipayasiñatakix amuytʼasiñjamäskiwa. Ukham amuyunakax utji ukhaxa janiw uka tuqit lupʼiñäkiti. Jankʼakiw uka amuyunakarux janiw saña. Wawanakat amtañaw yanaptʼasiraki” sasa. Diosan Arupax akham siwa: ‘Jañchipan munañanakapax jan jumanakan utjxpanti’ sasa (Colosenses 3:5). Sañäni, alcohol umirïkasin jan umañ munxsna ukhaxa, ¿kawkintï jaqinakax umañ yatipki uka chiqanakar saraskaksnati jan ukax umañ tuqit parlir jaqinakampi chikachassnati? Janiwa. Ukhamarakiw jañchin munañanakapampixa.

20. 1) ¿Jan iyawsirinakamp sarnaqasax kuna jan walinakarus pursna? 2) ¿Jan chachan kullakanakax kunjamsa nayra pachas jichhas sapaki jikxatasisin llakisiñar atipapxi?

²⁰ Yaqhip cristianonakax Diosar jan iyawsirinakampiw sarnaqapxi (1 Corintios 7:39). ¿Uk lurasax jan walinak askichapxaspati? Janiwa. Divorciat mä kullakax akham sänwa: “Sapaki jikxatasiñat sipansa yaqha jan waliw utji. Pantjasisin yaqhampi jaqichasiñax janipuniw walïkiti” sasa. Nayra patak maranakanxa ijma warminakax sapakiw awisax jikxatasipxpachäna, ukampis khitinakatix chʼikhïpkäna ukanakax ‘utaparuw tumpirinakar katuqtʼapxirïna, taqi aski kankañampiw jilat kullakanakar yanaptʼapxirïna, ukat tʼaqhisitanakarus yanaptʼapxarakirïnwa’ ukhamatwa jan inaktʼas irnaqapxäna (1 Timoteo 5:10). Jichhürunakanxa ukhamarakiw yaqhip kullakanakax walja tiempo suyapxi mä Diosar yupaychir jikxatañkama, ukampis ukäñkamax jan inaktʼasawa irnaqapxi. Mä ijma kullakax sapaki jikxatasir yaqha ijma warminakaruw tumptʼir sarirïna, jupax 68 maranïxänwa. Ukatxa akham sänwa: “Ukham yaqhanakar tumptʼir sarasasa, utan  lurañanak lurasasa, ukat Diosatak irnaqasasa janiw sapaki jikxataskti” sasa. Diosan Apnaqäwipat jaqinakar yatiyañaxa wali askipuniwa (Mateo 28:19, 20).

21. ¿Jan sapaki llakisiñatakix kunjamsa Diosar mayisiñasa ukat aski jaqinakamp sarnaqañasa yanaptʼistaspa?

²¹ Llakisiñ apaqir qullax janiw utjkiti. Ukampis Jehová Diosan chʼamapampix llakisiñar atipjsnawa. Cristianonakax ‘arumay uru achikañanakampi Diosar oración lurasaw’ uka chʼamxa katuqapxi (1 Timoteo  5:5, MT). Maynix Diosar achiktʼasi ukhaxa taqi chuymaw Diosar mayisi, inas jachtʼasisa ukham mayischispa (Hebreos 5:7 uñxatarakïta). “Arumay uru” Jehová Diosar taqi chuyma mayisiñäni ukhaxa wali askïniwa. Ukatxa jilat kullakanakampi sarnaqasaw jan sapakix llakisksnati. Kunjamtï Proverbios 12:25 jiskʼa tʼaqan siskixa, khitinakatix aski jaqïpki ukanakax ‘suma arunakampiw’ yanaptʼistaspa.

22. ¿Awisax llakix apxattistani ukhaxa kuna tuqinakat amtañas yanaptʼistani?

²² Ukampis awisax sapaki jikxatasïta ukhaxa ak amtañamawa: janiw khitis kuntï munki ukxa jikxatkapuniti, taqiniw jan walinakan uñjastanxa. Chiqpachansa, ‘walja jilat kullakanakaw taqi chiqan’ kunayman jan walinakan tʼaqhisipxi (1 Pedro 5:9). Jan walinak armxañasawa (Eclesiastés 7:10). Kuna askinakas utjistu ukanakat amuytʼasiñasawa. Ukampis Jehová Diosaruw taqi chuyma kusisiyañasa, ukaw taqi kunat sipansa wali askixa (Proverbios 27:11).

23. ¿Cristianonakax kunjamsa tama taypin utjki uka sapa awkin jan ukax sapa taykan familianakarux uñjapxañapa?

²³ Cristiano jilat kullakanakamp sarnaqañasa ukat jupanakamp yanaptʼayasiñas wali askipuniwa. Santiago 1:27 jiskʼa tʼaqax akham siwa: “[Kunatix] qʼumäki chiqapäkaraki Dios Awki nayraqatan ukax akanakawa: Wajchanakaru, ijmanakaru, llakitanakaru yanaptʼaña” sasa. Ukhamawa, cristianonakax sapa awkin jan ukax sapa taykan familianakarux yanaptʼapxañapawa. ¿Kunjamsa yanaptʼapxaspa?

24. ¿Kunjamsa sapa awkin jan ukax sapa taykan familianakarux yanaptʼsna?

²⁴ Qullqimpi ukat yänakampi yanaptʼañaw wakisispa. Diosan Arupax akham siwa: “Maynitix [akapachan yänakanïki, MT] ukat, jilapan pistʼayasitapa yatisina  jan jupat khuyaptʼayaskchixa, ¿kunjämarak Diosan munasiñapax chuymapan utjaspasti?” sasa (1 Juan 3:17). “Yatisina” siski uka aruxa janiw mä jukʼa uñjaña sañ munkiti, jan ukasti sum yatxatañ sañ muni. Ukhamasti, uka familiax kunjamsa jikxatasi ukxa sumwa khuyaptʼayir cristianox yatiñapa. Inas qullqix munaschispa. Awisax utapaw askichañarakïspa. Jan ukax manqʼtʼasiñataki jawstʼañaw wakisirakispa, ukat munat masinakampi tantachasktan ukar jawstʼañas askirakïspawa.

25. ¿Sapa awk taykanakarux kunjamsa cristiano masinakapax yanaptʼapxaspa?

²⁵ Ukat 1 Pedro 3:8 jiskʼa tʼaqax akham siwa: “Jumanakax suman sarnaqapxam, khuyapayasipxarakim jumanakkamaxa jilapurjama munasisa” sasa. Suxta wawan mä sapa taykax akham sasaw säna: “Wali chʼamawa, awisax wali llakitaw jikxatasta. Ukampis jilat kullakanakax akham sapxituwa: ‘Joan, walik ukham lurasktaxa. Ukax wali askipuniwa’ sasa. Yaqhanakax janiw nayat armasipkituti, uk yatiñax wali askipuniwa ukat yanaptʼarakituwa” sasa. Jilïr kullakanakax khitinakatix sapaki wawanakap uywasipki uka tawaq kullakanakaruw yanaptʼapxarakispa, jan walinakan uñjaski ukhaxa istʼasakiw yanaptʼapxaspa, mä chachar arxayañax wali chʼamäspaw jupanakatakixa.

26. ¿Amuytʼan jilatanakax kunjamsa wajchanakar yanaptʼapxaspa?

²⁶ Jilatanakax maysa tuqitwa yanaptʼapxarakispa. Job tatax wali suma jaqïnwa, ukat akham sänwa: “Nayasti [...] wajcharusa, pobrerusa yanaptʼarakïyätwa” sasa (Job 29:12). Ukhamarakiw jichhürunakanxa yaqhip jilatanakax wajchanakar yanaptʼañ munapxi, ukat “qʼuma chuymat jutki uka munasiñ[wa]” uñachtʼayapxi, janiw yaqha amtanix uk lurapkiti (1 Timoteo 1:5). Jupanakamp chikaw awisax Diosan arunakap yatiyirix sarapxi, ukat janirakiw pachpa familiapatsa armasipkiti,  familian Bibliat yatiqapki ukarusa kusistʼañax utjki ukarus jawstʼapxarakiwa. Ukham munasiñampi uñjataw mä wajchax nayrar sartaspa.

27. ¿Sapa awk taykanakarux khitis yanaptʼaspa?

²⁷ Ukampis awk taykanakaw ‘luräwinakapxa phuqapxañapa’ (Gálatas 6:5). Jilat kullakanakamp sum apasisa, ukat pachpa Jehová Diosamp munasitaw sum jakasipxaspa. Bibliax akham siwa: Jehová Diosaw “wajchanakampir ijma warminakampiru[x] uywi” sasa (Salmo 146:9). Jupan yanaptʼatax sapa awkin jan ukax sapa taykan familianakax sumwa jakasipxarakispa.