1. ¿Kunjamsa Martajj jikjjatasina, ukat kunatsa?

KAWKHANTÏ Martan jilapajj imatäkäna ukajj mä jachʼa qalamp atkatatänwa, uk janiw Martajj armirjamäkänti, jupan llakipajj mä jachʼa jathi qaläkaspas ukhamänwa. Janipuniw cheqaw sirjamäkänti. Jilapan jiwatapatjja pusi uruw wali llakita jikjjatasïna, visitanakasa ukat chuymachtʼirinakasa jut sarapjjänwa.

2, 3. 1) Jesusar uñjasinjja, ¿kunjamsa Martajj jikjjataspachäna? 2) ¿Kunsa Martan arunakapajj amuytʼayistu?

² Jichhajj khitirutï jilapajj wal munaskäna jupaw Martampiskäna. Jesusar uñjasajja Martajj wasitatwa chuym chʼalljjtayasïna, Oraqpachanjja jupakiw jilaparojj qollaspäna. Betania marka anqäjjan Jesusamp parlasaw chuymachtʼäw jikjjatäna. Jesusajj wali munasiñampi ukat khuyaptʼayasiñamp jupar uñkattʼatapatjja, wali chuymachtʼataw jikjjatasjjäna. Jesusan jisktʼanakapaw jukʼamp iyawsäwinïñapataki ukat jiwatanakajj jaktanipjjaniw siski uka suytʼäwir iyawsañapatak yanaptʼäna. Ukatwa Martajj aka jan armkañ arunak arsüna: “Jïsa Tata, nayajj iyawstwa jumajj Cristötama, Diosan Yoqapa, akapachar jutañapäkän uka” sasa (Juan 11:27).

³ Martajj wali iyawsäwin warmïnwa. Bibliajj jukʼaks jupat parlkchejja, sarnaqäwipajj wali yateqaskañapuniwa, ukaw jukʼamp iyawsäwinïñatak yanaptʼistu. Ukampis kunanaksa jupat yateqassna uka toqet janïr parlkasaw kunjamsa Bibliajj jupat parlañ qallti uk yatjjatañäni.

4. ¿Martan familiapajj kunjamänsa, ukat kunjamsa Jesusampejj apasipjjäna?

⁴ Lazarojj kʼumaraskäna ukhaw utapar Jesusar invittʼäna. Lazarompi, Martampi Mariampisti mä utanakwa Betania markan jakasipjjäna. Ukat yaqhep yatjjattʼatanakajja, Martaw jilïrïpachäna sasaw sapjje, jupaw Jesusar katoqtʼäna ukat Biblianjj juparurakiw nayraqat aytasi (Juan 11:5). Jupanakat maynïris jaqechaschïna  janisa, janiw yatiskiti, ukampis Jesusampejj kunja suma amigöpjjänsa ukaw jukʼamp wakiskirejja. Jesusajj Judea markan yatiykäna ukhajj kunayman jan waltʼäwinakana ukat arknaqataw uñjasïna, ukhaw uka amigonakapamp qorpachayasïna. Cheqas amigonakapajj wali munasiñampiw uñjapjjpachäna.

5, 6. 1) ¿Kunatsa Martajj Jesusar katoqtʼañatak wal irnaqtʼäna? 2) Jesusajj utar purïna ukhajja, ¿kunsa Mariajj luräna?

⁵ Visitanakan sum jikjjatasipjjañapatakisa ukat sum katoqtʼañatakisa walpun Martajj irnaqtʼirïna. Utapanjja kuns lurapunirïnwa, ukat Jesusar katoqtʼañatakejj jukʼampiw irnaqtʼpachäna. Ukatwa walja manqʼañanak phayañatakejj waktʼaypachäna, ukhamat Jesusaru ukat jupamp chik jutapjjañapäkäna ukanakar wali sum katoqtʼañataki. Uka tiemponjja, visitanakar sum katoqtʼañajj wali wakiskiripunïnwa. Mä visitarojj jampʼattʼasaw katoqtʼapjjerïna, wiskhup apstʼasaw kayunakap jareqapjjerïna ukat wali suma qʼapkir aceitempiw ñikʼutap jawsupjjerïna (Lucas 7:44-47 liytʼasiñapawa). Qorpachasiñ utasa ukat manqʼañanakasa suma waktʼayatäñapänwa.

⁶ Martampi Mariampejj walja lurañanakanïpjjänwa. Mariajj wali sinttʼasiri ukat amuytʼasirïnwa sasaw awisajj jupat qhanañchasi. Qalltanjja, Martar yanaptʼpachänwa, ukampis Jesusan purinitapatjja janiw yanaptʼjjänti. Jesusajj ukar sarasajj wali sumwa yatichäna. Uka urunakanjja kʼari yatichäwinakan pʼeqtʼirinakapajja, janiw warminakarojj respetapkänti, ukampis Jesusajj wali respetompiw uñjirïna ukat Diosan Apnaqäwipatsa yaticharakïnwa. Mariajj wali kusisitaw Jesusan kayup jakʼar qontʼasïna ukat taqe kuntï siskäna uk istʼäna.

7, 8. ¿Kunatsa Martajj colertʼaspachäna, ukat Jesusar kamsänsa?

⁷ Martajj visitanakapatak phaykasasa ukat taqe kun sum waktʼaykasasa, wali llakitaw jan tiempon irnaqtʼpachäna. Ukat kullakapar ukham qontʼata, jan yanaptʼatap uñjasajja, walpun colerpachäna, ajanupas mayjtʼpachänwa. ¡Janiw jupa sapakejj taqe ukanak lurkasapänti!

⁸ Ukat colerap jan imtʼirjamäsajj akham sasaw Jesusar säna: “Tata, ¿walikiti jumatakejj kullakajjan nayaru sapak taqe lurañamp aptʼatapajja? ‘Yanaptʼitpan’ sarapitaya” sasa (Luc. 10:40). Mariar cheqañchañapataki ukat jupar wasitamp yanaptʼañapatakiw ukham Jesusar sispachäna.

9, 10. 1) ¿Kamsänsa Jesusajj Martarojja? 2) Kuntï Martajj luraskäna ukajj Jesusatakejj walikïskänwa sasajja, ¿kunatsa sissna?

⁹ Kuntï Jesusajj Marta warmir siskäna ukajja inasa jupar  muspharaychïna, kunjamtï Biblia liytʼirinakajj muspharapjje ukhama. Jesusajj munasiñampiw akham säna: “Marta, Marta, walja lurañanakamp mayjtʼatäsktawa. Ukampis mayaw wakisejja. Mariajj sumïrïkis ukwa ajllisi, janirakiw ukjj khitis apaqkaniti” sasa (Luc. 10:41, 42). ¿Kunsa Jesusajj sañ munpachäna? ¿Mariajj akapachankirinakjam amtanïkaspas ukat suma manqʼa phayañajj janis kuna chʼamäkaspa ukhamti sañ munpachäna?

¹⁰ Janiwa. Martajj wali munasiñatwa uk luraskäna uk Jesusajj amuyänwa. Ukat ukham wali sum katoqtʼañataki taqe kuntï luraskäna ukanakajj jupatak walikïskänwa, uka nayrakiw Mateojj “mä jachʼa manqʼañ” jupatak wakiykäna ukarojj saräna (Luc. 5:29). Martan manqʼa wakichatapajj walikïskänwa, ukampis kunatï nayrankañapäki ukanakatwa Martajj armtʼasiskäna, ukaw jan walïkänti. ¿Kunanakas nayrankañapäna?

11, 12. ¿Kunjamsa Jesusajj Martar wali munasiñamp cheqañchtʼäna?

¹¹ Diosan sapa Yoqapa, Jesusaw Martan utaparojj cheqa yatichäwinak yatichir saräna. Ukhamasti, taqe kuntï Martajj wakichkäna ukanakatsa ukat suma manqʼañanakat sipansa, uka yatichäwinak istʼañaw wali wakiskirïnjja. Martan uka yatichäwinaka jan istʼatapatjja Jesusajj wal llakispachäna, ukampis kunatï wakiskirïki uk jupa pachpa ajlliñapatakiw jaytäna. * Ukhamajj kunatï wali wakisirïki uk jaytañapatakejj janiw Jesusajj Mariar khitkaspänti.

¹² Jan jukʼamp colerasiñapatakejja, Jesusajj wali suma arunakampiw “Marta, Marta” sasin pay kuti sutip arsüna. Ukat janiw ukham ‘walja lurañanakamp mayjtʼatäñamajj’ wakiskänti, sasaw sarakïna. Cheqas maya jan ukajj pä manqʼanakajj walikïskasapänwa. Ajay toqet suma manqʼañanakäkaspas ukhamwa Jesusajj wali sum yatichaskäna. Ukampis kuntï Mariajj ajllkäna uk janiw Jesusajj apaqkasapänti.

13. Kuntï Jesusajj Martar siskän uka toqetjja, ¿kunsa yateqsna?

¹³ Taqe kunatï uka utan paskäna ukanakajj jiwasan yateqasiñasatakiwa. Janipuniw kunäkipansa Diosar yupaychañ toqet yateqañjja apanukuñasäkiti (Mat. 5:3). Visitanak katoqtʼasajja,  Martjam wali wajjtʼasiri ukat wali irnaqtʼirïñsa munkstanjja, janipuniw kunatï jan añcha wakiskirïki ukanakat sinti llakisiñasäkiti, kunatï wakiskirïki ukanakwa aptʼassna. Jilat kullakanakasampi tantachtʼasktan ukhajj janiw manqʼañatakik tantachasktanti, jan ukasti maynit maynikama chʼamañchtʼasiñasataki ukat ajay toqet yanaptʼasiñasatakiw tantachastanjja (Romanos 1:11, 12 liytʼasiñapawa). Kun manqtʼasisasa jilat kullakanakasampejj chʼamañchtʼataw jikjjatassna.

14. Martajj Jesusan cheqañchäwip katoqtʼasïnwa sasajja, ¿kunatsa sissna?

¹⁴ ¿Martajj Jesusan cheqañchäwip katoqaspachänti? Jïsa. Apóstol Juanajj Lazarot qellqañ qalltäna ukhajja, akham sänwa:  “Jesusajj Martarusa kullakaparusa, ukhamarak Lazarorusa, wal muna[sïna]” sasa (Juan 11:5). Betania mark qhep qhepa visittʼatapatjja walja phajjsinakaw pasjjäna, Martajj janiw Jesusatakejj chuyma ustʼatäkänti ni coleratäkänsa. Jan ukasti taqe chuymaw ewjjtʼanakap katoqasïna. Uka toqensa, Martajj wali yateqaskañapuniwa, awisajj taqeniw ukham cheqañchatäñasajj wakisi.

15, 16. 1) Lazarojj usuntkäna ukhajja, ¿kunsa Martajj luräna? 2) ¿Kunatsa Martampi Mariampejj jukʼamp llakisipjjpachäna?

¹⁵ Lazarojj usuntkäna ukhajj Martaw jupar uñjaskäna. Jupan kʼumaraptañapatakejj taqe kunwa luräna; ukampis janipuniw waliptkänti. Sapürusa ukat sapa horasasa, sumpunwa kullakanakapajj uñjapjjäna. ¡Martajj qawqha kutik tʼukharstat jilapar uñkattʼasajj kuna kusiskañanakansa ukat kuna llakinakansa uñjasipjjäna ukanak amtaspachäna!

¹⁶ Lazaror jan waliptirjam uñjasajja, kullakanakapajj akham sasaw Jesusar yatiyapjjäna: ‘Tata, khitirutï jumajj munaskta ukajj usutawa’ sasa. Jesusajj yaqha markanwa yatiyaskäna, Betania markat pä uru sarañankänwa (Juan 11:1, 3, MT). Jesusajj Lazaror wal munasitapjja sum yatipjjäna, ukat “yanaptʼañatakejj kuns lurapuniniw” sasaw amuyapjjäna. Janïr jilap jiwkipanwa Jesusan puriniñap suyapjjäna, ukampis jan purinitapatjja chuymas qʼala kawkstʼatapuniw jikjjatasipjjpachäna, mä qawqha tiempotjja Lazarojj jiwjjänwa.

17. ¿Kunatsa Martajj chuymas kawkstʼat jikjjataspachäna, ukat Jesusan puriniñap yatisinjja kunsa luräna?

¹⁷ Martampi Mariampejj jilapan jiwatapat walpun jachapjjäna, paniparakiw imtʼayjjañatak wakichapjjäna, Betania markankirinakaru ukat uka marka jakʼankir visitanakarus katoqapjjänwa. Jesusajj janiw purinkänti. Ukatwa Martajj jukʼamp chuymas kawkstʼat jikjjataspachäna. Lazaron jiwatapat pusi uru qhepatwa Jesusan puriniñampïskatap yatïna. Martajj wali llakitas jikjjataskchïnjja, Mariar jan yatiyasaw jankʼaki tʼijsuwayasin Jesusar jikjjatir saräna (Juan 11:18-20 liytʼasiñapawa).

18, 19. ¿Kuna suytʼäwirus Martajj taqe chuym iyawsäna, ukat kunatsa iyawsäwipajj yateqaskañajja?

¹⁸ Jesusar uñjasajja, kunas jupanakarojj llakisiyäna ukjj akham sasaw yatiyäna: “Tata, jumatejj akankasamänjja jilajjajj janiw jiwkasapänti” sasa. Ukhamsa jikjjataskchïnjja, iyawsäwinïskakïnwa. Kunattejj akham sänwa: “Nayajj yattwa kuntejj Diosaru maykäta ukjja churätamwa” sasa. Jesusasti ukjjarojj sarakïnwa:  “Jilamajj jaktaniwa” sasa. Ukaw jukʼamp iyawsäwinïñatak yanaptʼäna (Juan 11:21-23).

¹⁹ Jesusajj jutïrit parlaskpacha sasaw Martajj akham säna: “Jïsa, jiwatanakan qhepa urun jaktañapjja yattwa” sasa (Juan 11:24). ¡Wali iyawsäwinïnwa! Uka urunakanjja, saduceonakajj janiw jaktañajj utjkiti sasaw yatichapjjäna, ukampis kuntï Qollan Qellqatanakajj uka toqet yatichkäna ukaruw Martajj taqe chuym iyawsäna (Dan. 12:13; Mar. 12:18). Jiwatanakajj jaktanipjjaniw sasin Jesusajj yatichkäna ukat kunjamsa mä qawqhanir jaktayäna uk sum yatïna, ukampis ukürkamajj janiw Lazarjam walja urunak jiwatäpkäna ukanakar maynirus jaktaykänti. Kunas jichhajj paspachäni sasaw Martajj jisktʼaspachäna.

20. ¿Kuntï Jesusajj Juan 11:25-27 qellqatan arskän ukajj kamsañsa munäna, ukat Martan arunakapajj kamsañsa munarakïna?

²⁰ Ukatsti jan armkaña wali muspharkañ arunakwa Jesusajj  arsüna: “Nayätwa jaktañasa, jakañasa” sasa. Uka arunakampejj jutir urunakan taqe jiwatanakar jaktayañataki Awkipat chʼam katoqatapwa uñachtʼayäna. Ukatwa Martar akham jisktʼäna: “¿Iyawstati ukjja?” sasa. Ukjjarojj kuntï aka yatichäw qalltan yateqaniwayktanjja, ukwa Martajj arsüna. Jupajj Jesusan Cristötapsa, Diosan Yoqapätapsa ukat kunjamtï profetanakajj sapkäna ukham aka Oraqer jutatapsa iyawsänwa (Juan 5:28, 29; Juan 11:25-27 liytʼasiñapawa).

21, 22. 1) Maynin jiwatapat kunja llakitas maynejj jikjjatasispa ukjja, ¿kunjamsa Jesusajj uñachtʼayäna? 2) ¿Kunjamsa Lazarojj jaktanïna?

²¹ Martajj wali iyawsäwinïnwa, ¿Jehová Diosasa ukat Jesucristosa ukham iyawsäwinïpki ukanakarojj wali askirjamat uñjapjjpacha? Kuntï Martajj uñjkäna ukanakaw wali askirjam uñjapjjatap uñachtʼayistu. Martajj jankʼakiw kullakapar jawsir tʼijüna. Mariajj chuymachtʼir walja jaqenakampïskänwa, ukat jupamp parlkasajj kunjamsa Jesusajj chuyma chʼalljjtayasïna ukwa Martajj uñjäna. Yatichiripar jachaqtʼasirsa uñjarakïnwa, maynin jiwatapat kunja llakitas maynejj jikjjatasispa uk uñachtʼayañjja janiw Jesusajj ajjsarkänti. Ukat kawkhantï jilapajj imatäkän ukar purisinjja, uka qal ateqapjjam sasin Jesusajj säna uksa istʼarakïnwa (Juan 11:28-39).

²² Ukatwa Martajj ‘tata, pusüröjjchejjaya, niya thujstatäjjpachawa’ sasin Jesusar säna. Ukampis Jesusajj akham sasaw amtayäna: “¿Janit nayajj sisksma, jumatejj iyawsäta ukajja, Diosan jachʼa chʼamapjja uñjätawa, sasajja?” Martajj iyawsatap laykuw Diosan jachʼa chʼamap uñjäna. Ukspachaw Jehová Diosajj Lazaror jaktayañapatakejj Yoqapar chʼam churäna. Taqe kuntï Martajj uñjkäna ukanakjja, jiwañapkamapuniw amtaspachäna: Jesusajj Lazaror mistunim säna uksa; chʼoqañanakamp ñachʼantata jilapar sartir istʼkäna uksa; mistunirsa ukat jararapjjam sasin Jesusajj säna uksa, ukat kimsanpach qhomantasipjjäna uksa janipuniw armkpachänti (Juan 11:40-44 liytʼasiñapawa). Martajj janiw llakitäjjänti.

23. ¿Jehová Diosampi ukat Jesusampejj kunsa lurañ munapjje, ukat bendicionanakap katoqañatakejj kunsa jiwasajj lurañasäspa?

²³ Aka sarnaqäwejja, jiwatanakan jaktanipjjañapajj cheqapun utjatapwa uñachtʼayistu, janiw mä samkakïkaspas ukhamäkiti, jan ukasti Biblian chuymachtʼkiri cheqa yatichäwipawa (Job 14:14, 15). Jehová Diosasa ukat Yoqapasa kunjamtï Martaru, Mariaru ukat Lazaror iyawsäwipat bendicipkänjja ukhamarakiw iyawsäwipat servirinakapar bendiciñ munapjje. Jiwasatï  iyawsäwinïñäni ukhajja, Jehová Diosajj wal bendicistani.

24. ¿Kunapachas Bibliajj wasitat Martat parli, ukat jupat wasitat parlasirakiti?

²⁴ Bibliajj may kutimpiw Martat parli. Jesusan jiwañapatak mä semana faltkäna ukhaw akajj pasäna. Kuna jan waltʼäwinakansa jikjjatasiñapäna uk yatisajja, Jesusajj wasitatwa Betania markankir amigonakapan utapar sum jikjjatasiñatak saräna. Uka cheqatjja, Jerusalén markakamajj kimsa kilometronakwa kayuk sarañapäna. Jesusamp Lazarompejj leproso sat Simonan utapan manqʼasipkäna ukhajja, ‘Martajj serviskänwa’ sasaw Bibliajj qhanañchi, ukat janiw mayampsa jupat parljjeti (Juan 12:2).

25. ¿Kunatsa tama taypin Martjam wali irnaqtʼir kullakanakan utjatapajj wali askejja?

²⁵ ¡Martajj wali irnaqtʼir warmipunïnwa! Biblian nayraqat jupat liytʼktan ukhajja, irnaqtʼirwa jikjjattanjja ukat jupat qhep qhepa parlki ukhajj ukham irnaqtʼaskirirakwa qhanañchi. Jupajj jaqenakar yanaptʼañatakipuniw chʼamañchtʼasirïna. Jichhürunakanjja, cristiano tamanakan Marta warmjam wali khuyaptʼayasiri ukat mayninakar yanaptʼañatak chʼamachasir kullakanakan utjatapajj wali askipuniwa, luratanakapampiw iyawsäwinïtap uñachtʼayapjje. ¿Martajj ukham iyawsäwinïtap uñachtʼayaskakpachänti? Ukhamäpachänwa, ukaw kunayman jan waltʼäwinakaru jakäwipan saykatañatak yanaptʼäna.

26. ¿Kunjamanakan uñjasisas iyawsäwipajj Martar yanaptʼawayi?

²⁶ Mä qawqha urunak qhepatjja, munat Yatichiripajj jan wali jaqenakan jiwayataw uñjasïna, uka llakiruw jichhajj saykatañapäna. Ukat Jesusar jiwayapkäna uka jan sinttʼasir jaqenakarakiw Lázaro jilapar jiwayañ munapjjäna. Kunattejj jupar jaktayatapatwa walja jaqenakajj Jesusar iyawsjjapjjäna (Juan 12:9-11 liytʼasiñapawa). Cheqas jupanakarojj jiwañaw jaljtaypachäna. Kunapachasa ukat kunjamsa ukajj pasäna uk janiw yatktanti, ukampis iyawsäwipaw Martarojj qhepakam aguantañatakejj yanaptʼpachäna. ¡Jupan iyawsäwipajj wali yateqaskañapuniwa!