1. ¿Kunatsa Siló markankirinakajj wal jacharasipkäna?

MÄ URUNAKWA filisteonakajj mä jachʼa chʼajjwäwin 30.000 israelitanakar jiwarayapjjatayna. Ukat uka nayrajj 4.000 israelitanakarakiw yaqha chʼajjwäwin jiwapjjatayna. Siló markankirinakajj walpun jacharasipkäna. Walja wawanakaw jan awkini ukat jan jilanakani uñjasipjjäna, warminakas jan chachani ukat jan yoqanakaniw uñjasipjjäna. Uk uñjasajj Samuel profetajj wal llakisïna (1 Sam. 4:1, 2, 10).

2, 3. ¿Kunatsa Siló markajj armatakëjjañapäna?

² Kunapachatï Elí sacerdoten Ofni ukat Finees sat jan wali yoqanakapajja, Siló cheqat Diosamp Arustʼäwir Mantat Arca campamentor apapjjäna ukhaw jan waltʼäwinakajj qalltäna. Uka Arcajja, Jehová Diosan ukankkatapwa uñachtʼayäna. ‘Nuwaskañäni ukharutï apañänejja, uka chʼajjwäwin atipjañäniwa’ sasaw israelitanakajj amuyapjjäna. Uka qollan cofrejj tabernaculon mä qollan cheqanwa imasïna, janiw jan walinakat jarkʼaqasiñatak illäkaspas ukhamäkänti. Ukampis filisteonakaw uka chʼajjwäwin israelitanakar atipapjjäna, Elí sacerdoten yoqanakaparus jiwayapjjänwa ukat Arcjja katuntasipjjarakïnwa (1 Sam. 4:3-11).

³ Walja maranakaw Arcajj Siló cheqar wali askirjam uñjayäna. Jichhajj janiw ukankjjänti, uk yatisaw 98 marani Elí sacerdotejj sillapat jalaqtasin jiwjjatayna. Ukat viudäjjäna uka yojjchʼapasti ukürpacharakiw wawa ususkasin jiwjjatayna. Ukampis janïr jiwkasajj akham sänwa: “Israelasti jichhajj jiskʼachjatawa” sasa. Jïsa, Diosamp Arustʼäwir Mantat Arcajj jan ukankjjatapatjja, Siló markajj armatakëjjañapänwa (1 Sam. 4:12-22).

4. ¿Kunjamsa aka yatichäwin yateqañäni?

⁴ Taqe ukanakaw Samuelur wal llakisiypachäna. Ukampis jan aynachtʼañataki, Israel markaru Jehová Diosamp sumankthapiyañataki ukat Jupan bendicionap katoqapjjañapataki yanaptʼañatakisa, ¿iyawsäwipajj yanaptʼpachänti? Jichhürunakanjja ukhamarakiw jan walinakan uñjassna ukat chuyma ustʼat jikjjatasiraksna, ukhamajj kunsa Samuel profetat yateqassna uk jichhajj uñjañäni.

5, 6. Samuelut parlkasajja, ¿kuna toqetsa Bibliajj parlañ qalltaraki, ukat kunsa Samuelojj ukäñkamajj luraskpachäna?

⁵ Kuna jan waltʼäwinakansa filisteonakajj Arca katuntasipjjatapat jikjjatasipjjäna ukat kunjamsa kuttʼayapjjäna uka toqetwa Bibliajj parlañ qallti. Ukat 20 maranak pasatatwa Bibliajj Samuel profetat wasitat parljjaraki (1 Sam. 7:2). ¿Kunsa ukäñkamajj luraskpachäna? Bibliaw uk qhanañchi.

⁶ Janïr chʼajjwäwinak qalltkipanwa Samuelojj ‘Tatitun arunakap taqe Israel markarojj yatiyaskakïna’ sasaw Bibliajj qhanañchi, ukhamajj israelitanakaruw Samuelojj yatichaskakpachäna (1 Sam. 3:21). 20 maranak qhepatjja ukham luraskakïnwa. Sapa maraw pachpa kimsa markanakar sarirïna, israelitanakan chʼajjwanakap uñjiri ukat yatichiri. Ukat Ramá markaruw kuttʼjjarakirïna, kawkhankkäntï utapajj ukharu (1 Sam. 7:15-17). Ukhamajj uka 20 maranakanjja, jan inaktʼasaw Samuelojj irnaqtʼaskpachäna.

7, 8. 1) ¿Kunsa Samuelojj 20 maranak wal irnaqtʼasajj israelitanakar säna? 2) ¿Samuelun arunakaparojj israelitanakajj istʼapjjpachänti?

⁷ Elí sacerdoten jan wali ukat qʼañu lurir wawanakapar uñjasajja, jaqenakajj janiw iyawsäwinëjjapjjänti. Ukatwa waljanejj kʼari diosanakar yupaychapjjäna. Samuel profetajj 20 maranak wal irnaqtʼasajja, akham sasaw israelitanakar säna: “Jumanakatejj taqe chuymampi Tatitur kuttʼanjjapjjäta ukapachajja, uka yaqha diosanakamsa, Astarté diosanakamsa apanukjjapjjañamawa, ukatsti jakañanakamjja jupa saparukiw churjjapjjañamaraki, jupa saparukirakiw yupaychapjjañama. Ukapachakiw jupajj taqe filisteo jaqenakan amparapatjja qhespiyapjjätam” sasa (1 Sam. 7:3).

⁸ Filisteonakajj jan khuyaptʼayasisaw israelitanakar tʼaqhesiyapjjäna. Niyakejjay israelitanakan ejercitopajj tʼunjatäjjchïnjja, janis khiti arjjatirinïpkaspa ukhamwa jupanakajj amuyapjjäna. Ukampis Samuel profetaw Diosar jakʼachasipjjañapataki ukat filisteonakat qhespiyasipjjañapataki israelitanakar arjjayäna. ¿Istʼasipjjpachänti? Jïsa, idolonakap tʼunjasajj Jehová Diosarukiw yupaychjjapjjäna. Ukat profetajj wali kusisitaw Mizpa sat cheqaru taqenir tantachthapïna, ukajj Jerusalenat alay toqenkänwa. Ukanwa ayunapjjäna ukat yaqha diosanakar yupaychapjjatapat wal arrepentisipjjäna (1 Samuel 7:4-6 liytʼasiñapawa).

9. ¿Kun lurañsa filisteonakajj amtapjjäna, ukat kunsa israelitanakajj lurapjjäna?

 ⁹ Uk yatisaw filisteonakajj Diosan servirinakapar tukjir sarapjjäna. Uk amuyasajj wal israelitanakajj sustjasipjjäna, ukatwa Samuelurojj Jehová Diosar yanap mayim sasin sapjjäna. Iyaw sasaw jupajj mä ofrenda loqtasajj Diosar mayisïna. Janïr ofrenda loqtañ tukuykipanwa, filisteonakajj markar tʼunjañatak muyuntapjjäna. Diosajj markapan achiktʼasitap istʼänwa. Ukat ukspachaw alajjpachat “mä jachʼa qʼejjoqʼejjo” filisteonak contra apayanïna (1 Sam. 7:7-10).

10, 11. 1) ¿Kunatsa filisteonakajj qʼejjo qʼejjonak istʼasajj wal sustjasipjjpachäna? 2) Mizpa cheqan chʼajjwäwi utjkän uka qhepatjja, ¿kunjamäjjänsa Israel markajja?

¹⁰ Filisteonakajj janiw aleq qʼejjo qʼejjo istʼasakejj mä wawar uñtat jaltapkasapänti, jupanakajj jan sinttʼasiri ukat jan ajjsarir jaqenakäpjjänwa. Ukampis qhespiyasiñatakiw jaltjjapjjäna. ¿Kunatsa wal sustjasipjjpachäna? Inas qʼejjo qʼejjonakajj mä qollut mä qollukam wal istʼaschïna, jan ukajj inas alajjpachan qenayas jan utjkchïnti, ukatwa sustjasipjjpachäna. Ukhamächi janisa, jichhajj filisteonakakiw arknaqat uñjasipjjäna. Israelitanakajj Mizpa cheqat mistusaw filisteonakar arktapjjäna, Jerusalenat Inti jalanta aynach toqekama (1 Sam. 7:11).

¹¹ Uka qhepatjja, Israel markajj janiw nayrjamäjjänti. Samuelojj taripirjam irnaqtʼaskäna uka tiemponwa israelitanakajj mayat maywa filisteonakat markanak kuttʼayasjjapjjäna (1 Sam. 7:13, 14).

12. ¿Kunatsa cheqaparjam apnaqerinakat parlkasajj Samuelut parlasiraki, ukat kunas ukhamäñapatak yanaptʼäna?

¹² Walja maranak qhepatwa apóstol Pablojj ‘cheqaparjam apnaqeri’ taripirinakata ukat profetanakat parlkasajja, Samuel profetat parlarakïna (Heb. 11:32, 33, NM). Samuelojj kunatï Jehová Dios nayraqatan cheqapäki ukwa luräna ukat ukham lurapjjañapatakiw yaqhanakarus yanaptʼäna. Jan walinakansa jikjjataskchïnjja, janiw llakimp aynachtʼkänti, jan ukasti Diosaw uñjaskani sasaw kuntï lurañapäkän uk luraskakïna. Ukat yuspärasirïtapsa uñachtʼayarakïnwa, chʼajjwäwit kuttʼanisaw Mizpa cheqan mä altar luräna, ukhamat kuntï Diosajj jupanak layku lurawayki uk jan armañataki (1 Sam. 7:12).

13. 1) Samuel profetjamäñ munstan ukhajja, ¿kunjam jaqëñatakis wal chʼamañchasiñasa? 2) Samuel profetjamäñatakejja, ¿kunatsa wayn tawaqotpach chʼamachasiñajj askïspa?

¹³ Kunatï Jehová Dios nayraqatan cheqäki uk lurañ munstanjja, Samuel profetjamarakiw paciencianïñasa, llampʼu chuymanïñasa ukat yuspärasirïñasa (1 Pedro 5:6 liytʼasiñapawa). ¡Taqeniw  ukhamäñatak chʼamachasiñasa! Samuelutakejj waynatpacha ukham jaqëñajj wali askipunïnwa, kunjamtï yatjjatkañänejja, jilirëjjän ukhajj kunayman jan waltʼäwinakaruw saykatawayi.

14, 15. 1) Samuelojj chuymanëjjäna ukhajja, ¿kunas wal llakisiyäna? 2) ¿Kunatsa Samuelojj Elí sacerdotet mayjänwa sasin sissna?

¹⁴ Wasitat Samuelut Bibliajj parli ukhajja, jupajj sinti chuymanëjjänwa. Ukatwa israelitanakar sum uñjañatakejj Joel ukat Abías sat pä yoqaparojj taripirjam yanaptʼapjjañapatakejj uttʼayäna. Ukampis uka yoqanakapajj janiw kunjamtï awkipajj sarnaqkäna ukhamapkänti, ‘jan ukasti taqe kun muniriw tukjjapjjäna, qollqe chilltayasipjjäna ukat janirakiw taqe kunsa cheqaparjam uñjapkänti’ (1 Sam. 8:1-3).

¹⁵ Mä urojja, markankir jilïrinakaw Samuelur akham sapjjäna: “Yoqanakamasti janirakiw jumjama sarnaqapkiti” sasa (1 Sam. 8:4, 5). ¿Kuntï yoqanakapajj lurapkäna uk janit Samuelojj yatkpachäna? Bibliajj janiw uk qhanañchkiti. Elí sacerdotejj Diosat sipansa wawanakapar jukʼamp munasitapata ukat jan sum cheqañchatapatjja, kunsa Diosajj luräna uk sum yatïna, ukatwa yoqanakapar sum uywañatak wal chʼamachaspachäna (1 Sam. 2:27-29). Cheqas Diosajj janiw Samuelun kuna jan wali luratapsa jikjjatkänti.

16. Jan istʼasir wawanïpki uka awk taykanakajja, ¿kunjamsa jikjjatasipjje, ukat kunjamsa Samuelun sarnaqäwipajj yanaptʼaspa ukat chuymachtʼarakispa?

 ¹⁶ Yoqanakapan jan wali luratanakapat yatisajj kunjamsa Samuel profetajj jikjjatasïna uk janirakiw Bibliajj siskiti. Ukampis ukanak yatisajj kunja chuyma ustʼatas maynejj jikjjatasispa ukat kunja phenqʼasa uk sumwa awk taykanakajj yatipjje. Jichhürunakanjja, wawanakajj janiw awk taykaparojj istʼjjapjjeti ni respetjjapjjesa (2 Timoteo 3:1-5 liytʼasiñapawa). ¿Ewjjanak jan katoqasiri ukat cheqañchatas jan istʼasir wawanïtam laykut llakista? Ukhamächejja, ukhaman jikjjatasisajj kunsa Samuelojj luräna uk yatiñaw yanaptʼätam ukat chuymachtʼarakïtam. Yoqanakapajj jan walinaksa lurapkchïnjja, jupajj janipuniw Diosat jitheqtkänti. ¡Arunakamajj amuytʼayaspawa, ukampis luräwinakamaw sum sarnaqañataki chʼamañchtʼaspa! Ukhamajj Diosat jan jitheqtas yupaychatamaw wawanakamar wal yanaptʼaspa. Ukat Samueljamarakiw Jehová Diosar kusisiyarakisma.

17. Markankir jilïrinakajja, ¿kunsa Samuelur mayipjjäna, ukat uk yatisajj kunjamsa jupajj jikjjatasïna?

¹⁷ Munañaparjam sarnaqasajja, kuna jan waltʼäwinaksa utjayapjjaspa uk janiw Samuel profetan yoqanakapajj amuyasipkänti. Markankir jilïrinakajj wawanakapat jan walinak yatiyasajja, akham sasaw mayipjjäna: “Mä rey uttʼayam nanakar apnaqañapataki, kunjamatejj taqe markanakanjja utjki ukhama” sasa. ¿Juparus jan walit uñjapkaspa ukhamti Samuelojj amuyaspachäna? Jupaw Jehová Diosan uttʼayatajj Israel markar walja maranak uñjaskäna. Ukampis uka markajj janiw mä profetampiki apnaqatäñ munapkänti, jan ukasti mayni markanakjamarakiw mä reyimpi apnaqatäñ munapjjäna. Ukajj ‘Samuelutakejj jan walipunïnwa’ sasaw Bibliajj qhanañchi (1 Sam. 8:5, 6, NM).

18. Kuntï israelitanakajj mayipkäna uka toqetjja, ¿kunsa Diosajj Samuelur qhanañchäna?

¹⁸ Samuelojj Jehová Diosar uka jan waltʼäwit yatiyäna ukhajja, akham sasaw Diosajj säna: “Kuntejj markajj maykätam ukjja jaysaskakim, janiw jumaruti jiskʼachapktamjja, jan ukasti nayaruw jiskʼachasipkitu, jan nayan jupanakaru apnaqañajj layku” sasa. Ukhamwa Diosajj Samuelur amuytʼayäna. Cheqansa taqe chʼamani Diosaruw jiskʼachasipkäna. ¡Ukham jan wali amtanïpjjatapastï! Rey mayipjjatapatjja, kuna jan walinakansa israelitanakajj uñjasipjjaspa ukwa Samuel toqejj yatiyäna. Ukampis akham sasaw mayisipkakïna: “Nanakajj mä reyinïñ munapjjta” sasa. Ukatwa Diosajj mä rey ajllïna, ukat uttʼayañapatak Samuelur khitäna ukhajja, jupajj iyaw sasaw saräna (1 Sam. 8:7-19).

19, 20. 1) Saular reyjam uttʼayañapatak Diosajj khitäna ukhajja, ¿kunjam chuymampis Samuelojj saräna? 2) ¿Kunjamsa Samuelojj israelitanakar yanaptʼaskakïna?

 ¹⁹ ¿Pä chuymakit Samuelojj sarpachäna? Jan ukajj ¿chuyma ustʼayasisach aynachtʼpachäna? Cheqas waljaniw ukhaman jikjjatasisajj chuyma ustʼayasipjjaspa, ukampis Samuelojj janiw chuyma ustʼayaskänti. Jan ukasti, Jehová Diosaw Saularojj marka apnaqañapatak ajlli sasaw amuyäna, ukat aceitemp pʼeqepat warjjatkäna ukhajj jampattʼarakïnwa, ukhamatwa wali kusisit katoqtʼatapa ukat jupampiskatap uñachtʼayäna. Ukat akham sasaw israelitanakar säna: “¿Jichhajj kawkïrirutejj [Jehová] Tatitojj reyit ajllki ukarojj uñkatjjapjjtati? ¡Janiw mayni israelitas jupjamajj utjkiti!” sasa (1 Sam. 10:1, 24).

²⁰ Khitirutï Diosajj ajllkäna ukan pantjasitanakap uñchʼukiñat sipansa aski luräwinakapwa uñjäna. Munañapar sarnaqer israelitanakajj janis jupar yäqapkchïnjja, Samuelojj qawqha maranakas Diosar taqe chuyma yupaychäna uk amtasaw nayrar sartaskakïna (1 Sam. 12:1-4). Ukat kuntï lurañapäkäna uk phoqhaskakïnwa, kuna jan walinakasa Diosar yupaychañ toqet utjaspa ukwa qhanañchtʼäna ukat Jehová Diosat jan jitheqtapjjañapatakiw israelitanakar chʼamañchtʼarakïna. Jupanakajj pantjasipjjatap amuyasisaw Diosar mayiñapatak Samuelur achiktʼapjjäna. Ukat akham sasaw jupajj säna: “Nayasti Tatitu contrajj janik juchañchasïti, jumanakataki mayiñ apanukusajja. Ukampisa nayajj yatichapjjämawa, sumana ukhamarak cheqapana sarnaqapjjañamataki” sasa (1 Sam. 12:21-24).

21. Kuna aski luräwtï katoqañ suyaskayätan uk yaqhar katoqer uñjsna ukhajja, ¿kunjamsa Samuelun sarnaqäwipajj jan aynachtʼañatakejj yanaptʼistaspa?

²¹ ¿Kuna aski luräwtï katoqañ suyaskayäta uk yaqhar katoqer uñjirïtati? ¿Kunjamsa jikjjatasirïta? Samuel profetattï yateqasiñänejja, janipuniw chuymasan uñisiñajj utjkaniti ni llakimpsa aynachtʼkañäniti (Proverbios 14:30 liytʼasiñapawa). Ak amtapuniñäni, Jehová Diosaw jupat jan jitheqtiri yupaychirinakaparojj walja kusiskañ luräwinak churi.

22. ¿Kuna askinaksa Samuel profetajj Saúl waynat uñjäna?

²² Saúl reyejj aski jaqepunïnwa. Jachʼa tansa, jan ajjsariri ukat wali chʼikhiraki. Qalltanjja, suma chuymani ukat mayninakan  askip thaqerïnwa (1 Sam. 10:22, 23, 27). Ukat taqe jaqenakjamarakiw amtaparjam sarnaqer luratäna, mä arunjja, kunsa jakäwipan lurani uk jupaw amtjjañapäna (Deu. 30:19). ¿Ukarjamat sum sarnaqpachäna?

23. ¿Saulajj kunjam jaqëjjänsa, ukat kunjamsa jachʼa jachʼa tuküna?

²³ Kunapachatï maynejj jukʼamp autoridadanëjje ukhajja, awisajj janiw llampʼu chuymanëjjeti. Mä qawqha tiempotjja Saúl reyejj jachʼa jachʼaw tukjjäna. Ukat Samuelojj yatiykäna uka Diosan kamachinakapsa janiw istʼjjänti. Mä kutejj jan suytʼañ munasaw Diosar mä sacrificio loqtäna, ukampis Samuel profetaw uk loqtañatak saraskäna. Ukatwa Samuelojj jupar cheqañchäna ukat wawanakamat janiw khitis reyjam uttʼayatäkaniti sasin yatiyarakïna. Ukampis cheqañchäw istʼañat sipansa, jukʼampikiw Diosan kamachinakap pʼakintäna (1 Sam. 13:8, 9, 13, 14).

24. 1) Amalecitanakampi nuwaskasajja, ¿kunjamsa Saúl reyejj Diosan arsutapar jan istʼatap uñachtʼayäna? 2) ¿Cheqañchatajj kamachänsa Saúl reyejja, ukat kunsa Diosajj amtäna?

²⁴ Jehová Diosajj Samuel toqew amalecitanakar mä chʼajjwäwin jiwarayañapataki, taqe yänakap tukjañapataki ukat Agag sat ñanqha reyipar jiwayañapatak Saular khitäna. Ukampis Saulajj janiw reyir jiwaykänti ukat taqe kunatï wali valoranïkäna ukanaksa jiltʼayarakïnwa. Samuelojj Saular cheqañchäna ukhaw kunjam reyëjjänsa uk amuyäna. Cheqañchäw llampʼu chuymampi katoqasiñat sipansa, profetaruw kutkatasïna ukat pantjasitapajj janis kuna jachʼa juchäkaspa ukham amuyayañwa munäna. ¡Markar kunakiw juchañchjjäna! Jehová Diosar sacrificion loqtañatakiw uka suma uywanak apantjja sasaw arjjatasïna. Uk istʼasajj akhamwa profetajj säna: “Jupar istʼañaw sumajja, sacrificiot loqtañat sipansa” sasa. Ukat jan ajjsartʼasaw kuntï Diosajj jupatak amtkäna uk yatiyäna: ‘Tronomat apaqatayätawa ukat kawkïritejj jumat sipansa jukʼampi askïki ukaruw juma lantejj churasini’ sasa (1 Sam. 15:1-33). *

25, 26. 1) ¿Kunatsa Samuelojj Saulat wal llakisïna, ukat kunjamsa Diosajj amuytʼayäna? 2) Jesé chachan utapar sarasajja, ¿kunsa Samuelojj yateqäna?

²⁵ Samuelojj wali llakitapuniw Saulan jan wali luratanakapat jikjjatasïna ukat arum paqarapuniw Diosat mayisïna, uka qhepatjja, wali llakitaw Saúl laykojj sarnaqäna. Ukham jachʼa jachʼa tukutapata  ukat Diosar jan istʼatapat walpun Samuelojj chuym ustʼayaspachäna. Uñtʼkäna ukhajj kunja aski jaqënsa uk amtasajj janiw Saularojj mayampsa uñjañ munjjänti. Diosajj Samuelur ukham llakita uñjasajja, akham sasaw amuytʼayäna: “¿Kunapachkamas ukham llakitaki sarnaqäta uka Saúl reyi laykojja? Janiw nayajj munkjjti jupan Israel markjjaru reyikïskañapjja. Jichhajj sartasim, ukat uka wajjraru aceitempi phoqhantam, ukatsti Isaí [‘Jesé’, NM] chachan utapar sarañamwa munta, Belén cheqaru, nayasti mayni wawaparuw ajllista reyïñapataki” sasa (1 Sam. 15:34, 35; 16:1).

²⁶ Amtanakap phoqhañatakejj Jehová Diosajj janiw pantjasir jaqenakaruk atiniskiti. Awisajj mä jaqejj taqe chuymaw Diosar servispa ukampis tiempompejj janiw ukhamäjjaspati. Mä ajllitapatï Jupa contra saytʼasjjanejja, yaqharuw Diosajj jupa lant uchani. Ukhamasti, Samuelojj janiw Saúl laykojj llakisjjänti ukat kunjamtï Diosajj siskänjja, Belén cheqaruw machaq reyir uttʼayañatak Jesé chachan utapar saräna. Jesé chachan yoqanakapar uñjasajja, akapunïpachaw Diosan ajllitapajj sasaw amuyäna. Ukampis Diosajj akham sasaw amuytʼayäna: “Jan jumajj uñnaqapataki, ukhamarak jachʼa tansätapataksa ajllimti” sasa (1 Samuel 16:7 liytʼasiñapawa). Ukat David sat sullka yoqaruw irptanipjjäna ukat jupaw reyïñapatak ajllitäna.

27. 1) Qhepa maranakan jakkäna ukhajja, ¿kunas Samuelur jukʼamp iyawsäwinïñatak yanaptʼäna? 2) Samuelun sarnaqäwipatjja, ¿kamsasmasa?

²⁷ Diosaw Davitarojj Saúl lanti uttʼayäna, ukajj wali askïtapwa Samuelojj qhepa maranakan jakkäna ukhajj amuyäna. Saulajj jukʼamp jan wali jaqeruw tuküna, Diosaruw kutkatasïna ukat Davitarus jiwayañwa munäna, ukampis Davitajj janiw ukhamäkänti, taqe chuyma ukat jan jitheqtasaw Diosarojj servïna ukat jan ajjsarirïnwa. Samuel profetan iyawsäwipajj jukʼampiw jiljjattäna. Kunjamsa Jehová Diosajj chuymachtʼistaspa ukat jan walinakan jikjjatastan ukhas kunjamsa ukanakat mistuñ yanaptʼistaspa ukat bendicirakistaspa uk sumwa Samuel profetajj uñjäna. Jan walinakansa jikjjataskchïnjja, niya patak maranakaw Dios nayraqatan kunatï cheqäki uk luräna. Ukatwa jiwjjäna ukhajja, markpachaw jupat jachapjjäna. Diosan servirinakapjamajj akham jisktʼasiñasawa: “¿Nayajj Samuel profetjamti sarnaqarakëjja?” sasa.