Supayajj kʼarisiñ qalltäna ukhaw jan walinak lurañajj aka Oraqen qalltawayi. Jupajj jan pantjasiri suma chuyman angelänwa, ukampis ‘janiw cheqa parlañan achtʼkänti’ (Juan 8:44, MT). Taqe kun Luriri Diosarukiw yupaychasiñapäna, ukampis Supayakiw yupaychayasiñ munäna, uka amtajj jukʼat jukʼatwa chuymapan jiltäna. Ukat Diosar istʼañat sipansa jupar istʼañapatakiw mä kʼarimp Eva warmir engañäna. Ukat Adán chachapas ukhamarakiw Diosar jan istʼjjänti. Ukatwa tʼaqhesiñanakasa, jiwañasa aka Oraqen utjawayi. Génesis 3:1-6, 19 liytʼäta.

Diosar jan istʼañapataki Eva warmir amtayasajja, Supayajj Diosan Apnaqäwip contra saytʼasiñwa qalltäna ukat janiw Taqe Kunjjar Munañani Diosarjam uñj-jjänti. Niya taqe jaqenakaw Diosan Apnaqäwip contra saytʼasisajj Supay toqet saytʼasiwayapjje, ukatwa jupajj ‘akapachan apnaqeriparu’ tukuwayi. Juan 14:30 ukat 1 Juan 5:19 liytʼäta.

Jehová Diosan luratanakapajj janiw pantjatäkiti. Jaqenakasa, angelanakasa taqe kunanwa Diosar istʼapjjasapäna (Deuteronomio 32:4, 5). Cheqansa, sapa mayniw kunatï walïki, jan walïki uk lurañ ajllispajja, Diosaw ukham lurawayistu. Ukatwa Jupar munasitas laykojj Jupar istʼsnajja. Santiago 1:13-15 ukat 1 Juan 5:3 liytʼäta.

¿Kunatsa Diosajj apnaqäwip contra saytʼasipjjañap mä qhawqha tiempo jaytawayi? Jaqenakajj Diosamp jan yanaptʼatäsajja, jani jaqe masipar sum apnaqapkaspati, ukwa Diosajj uñachtʼayañ munäna (Eclesiastés 7:29; 8:9). Jichhajj janiw  khitis “janiw ukhamäkiti” siskaspati, Supayan kutkatasitapatjja, 6.000 maranakaw pasawayjje, jichhakamajj janiw khiti apnaqeris tʼaqhesiñanaka, jan walinaka, guerranaka ukat usunaka chhaqtaykiti. Jeremías 10:23 ukat Romanos 9:17 liytʼäta.

Diosamp apnaqayasiñäni ukhajja, walja askinakwa jikjjatañäni (Isaías 48:17, 18). Diosajj niyaw gobiernonakar chhaqtayjjani. Ukat Jupan apnaqäwip toqe saytʼasipki, ukanakakiw aka Oraqen jakasipjjani (Isaías 11:9). Daniel 2:44 liytʼäta.

¿Kunatsa Diosajj tʼaqesiñanak jan chhaqtaykpacha? sat video uñtasma.

Jaqenakajj jupanakan askip thaqhasakiw Diosar servipjje, sasaw Supayajj säna. ¿Kunjamsa ukajj kʼarïtap uñachtʼaysna? Diosajj wali pacienciampiw jaqenakar suytʼaski, ukäñkamaw jiwasajj suma sarnaqatasampi Diosan Apnaqäwipat saytʼasitas uñachtʼaysna. Job 1:8-12 ukat Proverbios 27:11 liytʼäta.

Nayraqatjja, kunjamsa Diosajj yupaychayasiñ muni uk yatjjatañasawa, ukat Biblian yatichäwinakaparjamaw yupaychañasaraki (Juan 4:23). Ukat Jesusat yateqasisin politicaru ukat guerranakaru jan mitisiñäni ukhajja, Supayan apnaqäwip contra saytʼasitaswa uñachtʼayañäni. Juan 17:14 liytʼäta.

Jan wali qʼañu luräwinak lurañajj walikïskaspas ukham jaqenakajj amuyapjjaspa, ukwa Supayajj muni. Ukat maynejj ukanak jan lurjje ukhajja, familiaranakapasa, amigonakapasa jupa contraw saytʼapjjaspa, jan ukajj sawkasipjjaspa (1 Pedro 4:3, 4). Jumatï ukhaman jikjjatasïtajja, Diosar munasipki ukanakampiw chikachasiñama ukat Diosan leyinakaparjam sarnaqañatakiw chʼamachasiñama. Ukhamatwa Supayan kʼarïtap uñachtʼayäta, jupasti, jaqenakajj jan waltʼäwin jikjjatasisajj janiw Diosar istʼapkaspati sasaw säna. 1 Corintios 6:9, 10 ukat 15:33 liytʼäta.

Diosajj sapa mayniruw munasistu, ukhamajj jan walinaksa, tʼaqhesiñanaksa chhaqtayaniwa. Ukat Diosar atinisipjjatap uñachtʼayapjje ukat Jupan Apnaqäwip toqe saytʼasipki ukanakajja, wiñayatakiw Oraqen jakasjjapjjani. Juan 3:16 liytʼäta.