01 YATICHÄWI
¿Kunjamsa Bibliajj sum jakasiñatak yanaptʼiristam?
Jichhürunakan kunatsa tʼaqestan, jiwañajj kunatsa utji, jutïrin kunjamas jakasjjañäni uka toqet waljaniw yatiñ muntanjja. Sapürurakiw llakinakajj utjistu. Sañäni, taqeniw qollqe jikjjatañatsa familian kusisit jakasiñatsa llakistanjja. Ukampis Bibliaw uka jisktʼanakar qhanañchi, jakäwin sum sarnaqañatakis suma ewjjtʼanakaniwa, waljaniw ukhamätap amuyapjje. Ukhamasti taqeniruw Biblian yatichäwinakapajj yanaptʼistaspa.
1. ¿Kuna jisktʼanakarus Bibliajj qhanañchi?
Bibliajj aka wakiskir jisktʼanakaruw qhanañchi: ¿kunjamatsa jakañ vidajj utjawayi? ¿Kuna amtamp luratätansa? ¿Kunatsa suma jaqenakajj tʼaqesipjje? ¿Maynejj jiwjje ukhajj jakaskakiti? Jaqenakajj suman jakasiñsa munkstanjja, ¿kunatsa walja guerranakajj utji? ¿Kunas aka oraqerojj pasani? Bibliaw uka jisktʼanakarojj qhanañchi. Walja waranqa waranq jaqenakajja, jisktʼanakapan qhanañchäwip Biblian jikjjatasajj wali kusisitäpjjewa.
2. ¿Kunjamsa Bibliajj kusisit jakasiñatakejj yanaptʼistu?
Bibliajj suma ewjjtʼanakaniwa. Sañäni, familian cheqpach kusisit jakasiñatakiw yatichistu. Maynejj llakimp aynachtʼata jan ukajj estresata uñjaski ukhajj kunsa lurañapa, kunjamatsa maynejj trabajopampejj kusisitakïspa uksa yaticharakistuwa. Aka qellqatat yatjjatkasajja, Bibliajj uka toqenakatsa yaqha toqenakatsa kamsisa ukwa yateqäta. Ukatjja kuntï “taqpach Qellqatajj” siski, mä arunjja kuntï Bibliajj siski taqe ukanakajj sumätapwa amuyarakïta (2 Timoteo 3:16).
Aka qellqatajj janiw Biblia lantïkiti, antisas Bibliat sum yatjjatañatakiw yanaptʼätam. Ukatwa yatichäwinakan uñstki uka textonak taqpach liytʼañamatak chʼamañchtʼapjjsma. Textonakan qhanañchaski ukanakjja, kunanaktï yateqkäta ukamp igualtʼayañamatakiw chʼamañchtʼapjjaraksma.
JUKʼAMP YATJJATAÑÄNI
Bibliajj kunjamsa yaqhanakar yanaptʼawayi, Biblia liyiñ wal munañatakejj kunsa lursna, maynejj Biblia amuytʼañatak yanaptʼistu ukhajj kuna askinakas utji ukanakatwa jichhajj yatjjatañäni.
3. Bibliajj suma thaknamaw irpistu
Bibliajj mä suma qhanar uñtatawa, kawki thaknamtï sarañasäki uk sum qhantʼistu. Suma amtanakar puriñatakisa jutïrin kunanakatï paskani uk yatiñatakisa Bibliaw yanaptʼistaspa.
Salmo 119:105 liytʼasajja aka toqetwa parltʼapjjäta:
-
¿Kunsa uka salmo qellqerejj Bibliat amuyäna?
-
¿Kunsa jumajj Bibliat amuyarakta?
4. Bibliajj jisktʼanakasaruw qhanañchi
Mä warmejj kunayman jisktʼanakanïnwa, walja maranakarakiw ukanak yatiñ munäna. Jupajja Biblianwa uka jisktʼanakan qhanañchäwip jikjjatäna. VIDEO uñtasajja aka toqetwa parltʼapjjäta:
-
¿Videon uñtawayktan uka warmejj kuna jisktʼanakanïnsa?
-
¿Kunjamsa Bibliat yatjjatañajj jupar yanaptʼäna?
Bibliajj jisktʼanak lurañasatakiw invittʼistu. Mateo 7:7 liytʼasajja aka toqetwa parltʼapjjäta:
-
¿Bibliajj jisktʼanakamar qhanañchaspati? ¿Kawkïr jisktʼanakamarus qhanañchaspa?
5. Biblia liyiñajj gustistaspawa
Biblia liyiñajj waljaniruw gusti, walja sumanakwa Bibliat yateqapjjaraki. VIDEO uñtasajja aka toqetwa parltʼapjjäta:
-
¿Videon uñstki uka wayn tawaqonakajj liytʼañ toqet kamsapjjesa?
-
¿Kunatsa Biblia liyiñajj jupanakar gusti?
Biblian yatichäwinakapajj chuymachtʼistuwa, mä suytʼäwinïñatakis yanaptʼarakistuwa. Romanos 15:4 liytʼasajja aka toqetwa parltʼapjjäta:
-
Bibliajj chuymachtʼistuwa, kuntï Diosajj jutïrin churkistani uk suytʼañatakis yanaptʼarakistuwa, ¿uka toqet jukʼamp yatjjatañ munasmati?
6. Biblia entiendiñatakejj maynimpiw yanaptʼayassna
Mayni pachpa Biblia liytʼañajj wali sumawa, ukampis waljanirojj maynin yanaptʼapamp Bibliat yateqañaw jukʼamp yanaptʼawayi. Hechos 8:26-31 liytʼasajja aka toqetwa parltʼapjjäta:
-
¿Kunas Biblia entiendiñatakejj yanaptʼistaspa? (Hechos 8:30, 31 uñjjattʼapjjäta).
Etiopía markankir chachajj maynin yanaptʼataw Qellqatanak sum amuytʼäna. Jichhürunakanjja waljanejj maynin yanaptʼapampirakiw Biblia jukʼamp sum amuyapjje.
YAQHEPANAKAJJ AKHAM SAPJJEWA: “Bibliat yateqañajj tiempo apaqakiwa” sasa.
-
¿Jumajj uka toqet kamsasmasa? ¿Kunatsa ukham amuyta?
¿KUNSA YATEQAWAYTAN?
Bibliajj sum jakasiñatak ewjjtʼanakaniwa, wali wakiskir jisktʼanakaruw qhanañcharaki, ukatjja chuymachtʼistuwa, kuntï Diosajj jutïrin churkistani uk suytʼañatakiw yanaptʼarakistu.
Amtañataki
-
¿Kuna ewjjtʼanakas Biblian utji?
-
¿Kawkïr jisktʼanakarus Bibliajj qhanañchi?
-
¿Bibliat kun yatjjatañsa jumajj munasma?
JUKʼAMP YATJJATAÑAMATAKI
Kunjamsa Biblian ewjjtʼanakapajj jichhürunakan yanaptʼistaspa uk yatjjatam.
“Biblian ewjjanakapajj wiñayatakiwa” (Yatiyañataki mayïri 2018)
Mä chachajj wawatpachaw llakinakamp aynachtʼat jakasïna, kunjamsa juparojj Bibliajj yanaptʼawayi uk videon uñtam.
Familian kusisit jakasiñatakejj Biblian kuna suma ewjjtʼanakas utji uk yatjjatam.
“Familian sum jakasiñataki 12 yanaptʼanaka” (¡Sartapjjañäni!, payïri 2018)
Aka oraq khitis apnaqe uka toqet jaqenakajj kamsapjjesa, Bibliajj kamsarakisa uk videon uñtam.
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
