DIOSAN arunakap jukʼampi yatiyañatakejj kunatï jakañatak munaski ukampik jakasiñ amtir walja wayn tawaqonakar uñjañajj wali kusiskañawa (Mat. 6:22). ¿Jupanakajj kunanaksa lurawayapjje ukat kuna jan walinakarus saykatawayapjje? Uk amuytʼañatakejja, México markar sarapki jupanakat yatjjatañäni.

Estados Unidos markankir Dustin ukat Jassa sat chacha warmejj enero, 2007 maranwa jaqechasipjjäna. Jupanakajja, mä barco alasisin marpacha ukan jakasiñ amtapkäna ukjja, jaqechasipkäna uka qhepatwa phoqhapjjäna. Uka barcojj Astoria (Oregón, Estados Unidos) marka jakʼan saytʼayatänwa, uka suma markajj chʼojjña lomanakampi ukat khunu qollunakampi muyuntatawa, ukajj Pacífico jachʼa lamar qota jakʼanwa jikjjatasi. Dustin jilatajj akham siwa: “Kawk uñtañas wali sumapunïnwa” sasa. Jupanakajja, Jehová Diosar confiyasisa ukat kunatï jakañatak wakiski ukampikis jakasipkaspa ukham amuyasipjjäna. Kunattejj niya 8 metroni barconwa jakapjjäna ukat chika urkamakiw irnaqapjjarakïna. Ukat yaqha aru parlir tamaruw sarapjjäna ukat awisakiw precursor auxiliarjam irnaqtʼapjjäna. Ukampis janiw kunjamtï amuyapkäna ukham jakasipkänti, ukwa tiempompejj amuyasipjjäna. Jilatajj siwa: “Taman yanaptʼañat sipansa barco askichañatakikiw tiempo  apsusipjjerïta. Ukampis Diosarutï nayrar uchañ munapjjstjja jakäwinakaj mayjtʼayapjjañajaw wakisïna” sasa.

Jassa sat kullakajj akham siwa: “Sapakäyät ukhajj México markan jakayäta ukat inglés aru parlir tamaruw sarayäta. Ukanjja, kusisitaw Diosar yupaychayäta ukat wal kuttʼañ munayäta” sasa. Ukat kawkhantï ‘yapu apthapirinakajj’ munaski uka cheqanakar sarir jilatat kullakanakan experiencianakapwa Familiana Diosar Yupaychañataki Aruman liytʼapjjäna (Juan 4:35). Jilatajj akham siwa: “Nänakajj jupanakjam kusisitäñwa munapjjayäta”. Ukat México markan jakasir amigonakapajj jichhak uttʼayat mä tamaw yanap muni sapkäna ukhajja, jilatasa warmipasa irnaqäwip jaytasa ukat botep aljasaw uka markar sarjjapjjäna.

Uka jilat kullakajj Tecomán markanwa utjnoqapjjäna, ukajj Pacífico jachʼa lamar qota jakʼankarakïnwa, Astoria markat niya 4.345 kilometronak aynachana. Jilatajj saskakiwa: “Thaytʼaniri ukat qollunakani markatjja, wali juntʼu ukat walja limonanak achki uka cheqanwa jakjjapjjta” sasa. Qalltanjja janiw irnaqañ jikjjatapkänti ukat jan qollqenïsajja sapa semanaw urun pay kuti arrosampi porotomp manqʼapjjerïna. Kullakajj sarakiwa: “Sapüru uka pachpaki manqʼasajj amjayasjjapjjayätwa ukat Bibliat yateqerinakaw mangonaka, platanonaka, papayanaka ukat limonanakjja bolsa phoq churapjjetäna” sasa. Mä qhawqha tiempotjja, Internet toqew mä escuelatak yaqha aru yatichas irnaqañ qalltawayapjje, ukajj Taiwan markankiwa. Ukat irnaqäwipat apsusipki uka qollqejj kunatï munaski ukatakejj walikiwa.

¿Jichhajj kusisitäpjjeti? Jupanakajj akham sapjjewa: “Akar jutjjañajj nänakatakejj wali askiwa. Chacha warmjamasa ukat Jehová Diosampis jukʼamp sum apasipjjta, ukhamäñap janiw amuyapkayätti. Panpachanejj sapüruw yatiyir sarapjjta, tantachäwinakatak wakichasipjjta ukat kunjamsa Bibliat yateqerinakarojj yanaptʼapjjerista uks parltʼasipjjaraktwa. Ukat janiw nayrjam llakisjjapjjti” sasa. “Kuntï Salmo 34:8 qellqatan siski uka arunak janiw sum amuyapkatätti, ukampis cheqätapwa jichhajj amuyapjjta, ukan akham siwa: ‘Yantʼapjjam, uñjapjjarakim, Tatitun munasir kankañapa’” sasa.

México markan kawkhantï Diosan Reinopat yatiyirinakajj munaski uka cheqanakarojja, soltero ukat casado jilat kullakanakat 2.900 jilaw sarapjje, jupanakat waljanejj 20 maranit niya 40 maranakanïpjjewa. ¿Kunatsa Diosan Qhanañchirinakapat waljanejj sarapjje? Ukham jisktʼatajj yaqhepajj aka kimsa toqetwa arstʼapjje.

 Jehová Diosaru ukat jaqe masijar munasitaj layku. Leticia kullakajj akham siwa: “Jehová Diosar katuyasisajja, Jupar taqe chuymampi ukat almajampi yupaychañajwa amuyayäta. Jupar jukʼamp yupaychañatakejja, chʼamsa ukat tiempsa jukʼampiw apstʼasiñ munayäta, ukhamat Diosar munasitaj uñachtʼayañataki” sasa (Mar. 12:30). Jupajj 18 maraniw bautisasïna. Hermilo jilatajj kawkhantï yatiyirinakajj munaski uka cheqar sarkäna ukhajja, 20 jila maranïnwa, jichhasti Leticiamp jaqechatawa. Jilatajj akham siwa “Diosar uñtʼañ yanaptʼasakiw jaqe masijar munasitaj uñachtʼayirista ukwa amuyasiyäta” sasa (Mar. 12:31). Ukatwa Monterrey sat jachʼa markan sum jakaskäna ukat mä bancon irnaqkäna ukhat mä jiskʼa markar saräna.

Cheqpacha ukat wiñay kusisitäñataki. Bautisasjjäna uka qhepatjja, Leticia kullakajj experienciani mä kullakamp chikaw mä phajjsi yatiyañatak mä markar saräna. Leticiajj akham siwa: “Walpun muspharta. Jaqenakajj Diosan arunakap sum istʼapjjatap uñjasajj wal kusisiyäta. Ukat phajjsejj tukuyjjäna ukhajja, akham sistwa: ‘¡Ukpun lurañ muntjja!’” sasa. Essly kullakampejj niya ukhamarakiw pasäna, jupajj 20 jila maraniwa. Mayninakajj kunja kusisitäpjjesa uk uñjañaw kawkhantï yatiyirinakajj munaski uka cheqar sarañatak yanaptʼäna. Tawaqöjjäna ukhajja, ukham cheqanakar sarir jilat kullakanakaruw uñtʼäna. Jupajj akham siwa: “Jupanakar kusisit uñjasajja, jupanakjam jakañ munayäta” sasa. Walja kullakanakaw Essly kullakjam lurawayapjje. Cheqansa, México markanjj kawkhantï yatiyirinakajj munaski uka cheqanakanjja 680 soltera kullakanakaw loqtasipki. ¡Wayn tawaqonakatakisa jilïr jilat kullakanakatakis yateqaskañapuniwa!

Mä amtampi kusisit jakasiñataki. Essly kullakajj colegio tukuyjjäna ukhajja, jachʼa yateqañ utar sarañapatakiw mä beca churañ munapjjäna. Mayni wayn tawaqonakajj ukar sarañapatakiw chʼamañchtʼapjjäna ukat mä profesionanïñatak yateqam, auto alasim ukat yaqha markanak uñtʼir saram sasaw sapjjäna. Ukampis jupajj janiw istʼkänti. “Diosar yupaychiri walja amigonakajajj ukanakwa lurapjjäna ukat Diosar yupaychañ janiw nayrar uchjjapjjänti. Ukat ukanakaruk chuym churjjasajj jukʼampikiw aynachtʼjjapjjäna ukat llakitäjjapjjänwa uk amuyayäta. Ukampis nayajj tawaqökasaw Jehová Diosar jukʼamp loqtañ munayäta” sasaw jupajj saraki.

Essly kullakajj janiw jachʼa yateqañ utar sarkänti, jan ukasti kunatï precursorjam irnaqtʼañatak yanaptʼkaspa ukakwa yateqäna ukat kawkhantï yatiyirinakajj munaski uka cheqaruw sarjjäna. Ukatjja otomí ukat tlapaneco arunakwa yateqäna. Jaya cheqan kimsa mara yatiyatap amtasajj akham siwa: “Kawkhantï yatiyirinakajj munaski uka cheqanakan  Diosar yupaychañajj kusisit jakasiñatakiw yanaptʼitu. Ukampis taqe kunat sipansa, Jehová Diosampi sum apasiñatakiw yanaptʼitu” sasa. Estados Unidos markat jutiri Phillip ukat Racquel chacha warmejj ukhamarak amuyapjje, jupanakajj 30 jila maranïpjjewa. Akham sapjjewa: “Akapachan jukʼamp jan walir saraskatapatjja, waljaniw ajjsarayasjjapjje. Ukampis Biblian yatichäwinakap istʼañ munir jaqenak jikjjatasajja, kusisitaw jikjjatasipjjta. Cheqansa, ¡uk lurañajj janiw inamayäkiti!” sasa.

Diosan Reinopat yatiyirinakajj munaski uka cheqankañajj chʼamakiwa. Kunattejj yanaptʼasiñatak qollqe jikjjatañas chʼamakïspawa. Jan aynachtʼañatakejja, kawkharutï sarkäta ukan kunjamtï jakasipki ukaruw yatinoqtañama. Verónica, experienciani precursora kullakajj akham siwa: “Mä cheqanjja manqʼa phayasaw iraqtʼatar aljayäta; yaqha cheqanjja isirak aljayäta ukat nikʼuts khuchhurakiyätwa. Jichhajj mä utanwa qʼomachirit irnaqta ukat jichhak awk taykäpki ukanakaruw kunjamsa wawanakapamp parltʼasipjjaspa uk yatichta” sasa.

Yaqha costumbrenakani ukat mayja sarnaqäwini cheqanakan yatinoqtañajj chʼamakïspawa, yämas jachʼa markat jaya cheqan jakasiñajj jukʼamp chʼamäspawa. Ukhamanwa Phillip ukat Racquel chacha warmejj uñjasipjjäna, jupanakajj kawkhantï náhuatl aru parlapki uka cheqaruw sarapjjäna. Jilatajj akham siwa: “Uka cheqan jakañajj wali mayjänwa” sasa. ¿Kunjamsa yatinoqtapjjäna? “Náhuatl aru parlirinakan aski luräwinakapwa uñjapjjayäta. Jupanakajj familian mayachtʼataw jakasipjjäna, qhana arunïpjjänwa ukat maynit maynikamaw khuyaptʼayasipjjäna” sasa. Racquel kullakajj sarakiwa: “Ukan jakasajj waljanak yateqapjjta ukat uka cheqankir jilat kullakanakampi Jehová Diosar yupaychañs yateqapjjaraktwa” sasa.

Inas jumajj yaqha cheqar sarañ munaraksta, ¿kunsa lurasma? Ukham sarapki uka jilat kullakanakajj akham ewjjtʼapjje: janïr sarkasajja, wakiski ukampik jakasiña ukat kunatï utjktam ukampik kusisit jakasiñwa yateqañama (Fili. 4:11, 12). ¿Kunampsa lurasma? Leticia kullakajj akham siwa: “Kuna irnaqäwiti mä cheqanak walja tiempo qheparaykitaspa uk janiw katoqasirïkti. Jan ukasti kawkharusa ukat kuna pachasa sarañatak yanaptʼkitaspa ukak katoqasirïta” sasa. Hermilojj akham sarakiwa: “Isi tʼajjsuña, planchaña ukat manqʼa phayañwa yateqta” sasa. Veronicajj akham sarakiwa: “Familiajampïkasajja qʼomachañanwa yanapayäta ukat iraqtʼatar aljañatak manqʼa phayañ yateqawayta. Qollq imasiñs yateqawayaraktwa” sasa.

Levi ukat Amelia jilat kullakajj Estados Unidos markatäpjjewa ukat kimsaqallqo maraw jaqechatäjjapjje. Kuntï amtapkayäta uk Diosar qhan mayisiñaw México markar yanaptʼir sarañatak yanaptʼawayapjjetu sasaw jupanakajj sapjje. Levi jilatajj akham siwa: “Yaqha markan yatiyirinakajj munaski uka cheqan mä mara yanaptʼañatakejj qhawqha qollqes munasi ukwa amuytʼapjjayäta ukat ukha qollqe jikjjatañatakejj Jehová Diosaruw yanaptʼa mayisipjjayäta” sasa. Qhawqtï munapkäna uk mä qhawqha phajjsin jikjjatasajja jankʼakiw sarjjapjjäna. Levi jilatajj saskakiwa: “Mayipkayäta uk istʼasajja, Jehová Diosajj phoqhänwa. Jichhajj nänakaruw amtanakajj phoqhañajj waktʼapjjetäna” sasa. Ameliajj sarakiwa: “Mä mara qheparañakwa amtapjjayäta, ukampis paqallq maraw akankjjapjjta, janiw kuttʼañ amtapkti. Akanjja, Jehová Diosan yanaptʼap qhan uñjapjjta. Sapürupuniw khuyaptʼayasiñap uñjapjjta” sasa.

Adam ukat Jennifer jilat kullakatakejj Diosar mayisiñajj ukham askirakïnwa, jupanakajj Estados Unidos markatwa kawkhantï México markan inglés arut yatiyapki uka cheqaruw sarapjjatayna. Ukat akhamwa ewjjtʼapjjaraki: “Taqe kunas jakäwiman sumäñap jan suyamti. Yaqha cheqar yanaptʼir sarañ munatam Jehová Diosar yatiyam ukat ukarjam lurarakim. Wakiski ukampik jakasim, kawkïr markarutï sarañ munkta uka sucursalapar qellqtʼam ukat ukar sarañatakejj qhawqha qollqtï munapkäta uk jakstʼasisajj ukarjamaw lurañama” sasa. * Ukhamtï lurätajja, sum jakasiñatakisa ukat Diosar jukʼamp yupaychañatakis mä punkus jistʼartkaspa ukham uñjäta.