SYDNEY (Australia) markanwa Choong Keon jilatampi Julie kullakampejj precursor regularjam servisipkäna. Jichhajj niya phesqa maraw Taiwán markan servjjapjje. Jupanakajj niya 35 maranakanïpjjewa. Choong Keon jilatajj akham siwa: “Chika urukamakiw trabajipjjayäta, ukat jan kuna llakiniw sum qamasipjjayäta. Jakapkayäta uka cheqajja, janiw sinti thayäkänsa, ni sinti juntʼükänsa, wali sumapunïnwa. Ukhamarusa, familia jakʼana, amigonak jakʼanwa jakasipjjarakiyäta” sasa. Ukampis mayaw jupanakar llakisiyäna. ¿Kunänsa? Jehová Diosarojj jukʼampwa servipjjaspäna, ukampis janïraw amtanakap phoqañatakejj chʼamachasipkänti.

Mä jachʼa tantachäwinwa, 2009 maran mä suma discurso istʼapjjatayna, ukaw chuymanakaparojj purtʼatayna. Arstʼir jilatajja, jukʼamp serviñataki chʼamachasirinakarojj sänwa: “Mä autojj sartjje ukhakiwa, mä auto apnaqerejj chʼeqarus kupirus autjja sarayaspa. Jiwasatï niya ukar uñtasita sartañäni ukhajja, mä arunjja, wal chʼamachasiñäni ukhajja, Jesusaw amtanakas phoqañatakejj irpistani ukat yanaptʼarakistani” sasa. * Choong Keon jilatampi Julie kullakampejja, arstʼir jilatan arunakapajj jupanakatakïkaspas ukhamwa amuyasipjjäna. Ukatsti uka jachʼa tantachäwinjja, Taiwán markan misionerjam servir mä chacha warmiruw entrevistapjjäna. Uka misioneronakajj kunjamsa uka markan wali kusisita yatiyasipki ukat qawqha yanaptʼas wakisi ukanakwa arstʼapjjäna. Uka arunakajj ukhamarakiw Choong Keon jilatana Julie kullakan chuymaparojj purtʼäna.

Julie kullakajj siwa: “Jachʼa tantachäwi qhepatjja, jan ajjsarasa Taiwán markar sarjjañatakiw Jehová Diosar mayisipjjta. Ukhampachas ajjsarayasisipkakiyätwa, mä jachʼa piscinaru thoqontañsa munapkirista ukham amuyasipjjayäta” sasa. Eclesiastés 11:4 qellqataw “thoqontañ” yanaptʼäna, ukanjja siwa: “Thayar uñchʼukirejja, janiw  yapuchkaniti, ukhamarak qenayar uñchʼukirisa, janiw achunak apthapkaniti” sasa. Choong Keon jilatajj siwa: “Aleq ‘uñchʼukirïñat’ sipansa, ‘yapuchañataki’ ukat ‘apthapiñatakiw’ chʼamachasipjjayäta” sasa. ¿Kunjamsa uk lurapjjäna? Walja kutiw Diosar uka toqet mayisipjjäna, misioneronakan sarnaqäwinakapatsa liyipjjarakïnwa, ukat Taiwán markar sarir jilat kullakanakaruw walja kuti Internetnam qellqapjjarakïna. Autonakapsa mueblenakapsa aljawayapjjänwa. Ukhamatwa, kimsa phajjsi qhepat Taiwán markar puripjjäna.

Taiwán markanjja, kawkïr tamanakatejj yanaptʼa wal munapki ukanakanjja, 100 jilaniw yaqha markat saririnakajj servisipki, 21 maranit 73 maraninakkama. Uka jilat kullakanakajja, Australia, Canadá, Corea, España, Estados Unidos, Francia, Gran Bretaña, Japón uka markanakatwa puripjje. 50 jilaw soltera kullakanakäpjje. ¿Kunas yaqha markar servir sarapjjañapatakejj yanaptʼawayi? Uk yatjjatapjjañäni.

Canadá markankir Laura kullakajja, precursorjamaw Taiwán markan inti jalanta toqen serviski. 10 mara nayrajja, janiw kusisit yatiyir misturïkänti. Jupajj siwa: “Yatiyirejj misturiyätwa, ukampis janiw kusisit jikjjatasirïkayätti” sasa. Mä kutejja, Canadá markankir amigonakapampiw México markar yatiyiri mä phajjsi sarapjjäna. Laurasti siwa: “Ukhapuniw walja tiempo yatiyirejj mistta. Wali kusisitarakiw yatiyaniwaytjja” sasa.

Ukatwa Canadá pachpan yaqha aru parlir tamar sarañ amtäna. Kullakajj chino aru parlañwa yateqäna, mä qawqha tiempojj uka aru parlir mä gruponwa yanaptʼarakïna. Qhepatjja, Taiwán markar sarañwa amtäna. Septiembre 2008 maranwa Taiwán markar sarjjäna. Laurasti siwa: “Niya mä marat aka markan yatinoqtta. Jichhajj janiw Canadá markar kuttʼañ amtjjti” sasa. ¿Kunjamas yatiyir mistusajj jikjjatasi? Jupajj saskakiwa: “Wali kusisitätwa. Jehová Diosar uñtʼasina mä yateqerejj nayra jakäwip apanukjje ukhajja, kusiskañapuniwa,  janiw ukjamajj kawkinsa utjkaspati. Walja kutiw aka Taiwán markan ukham kusiskañanak uñjta” sasa.

Brian jilatampi Michelle kullakampejj 30 jila maranakanïpjjewa, jupanakajj Estados Unidos markatwa Taiwán markar sarjjapjjäna. Jichhajj kimsaqallqo maranakaw ukankjjapjje. Qalltanjja, janis sum yatiyapkaspa ukham amuyasipjjäna. Ukampis mä misioneruw akham satayna: “Mä tratadoksa churapjjätajja walikïniwa, ak amtapjjañamawa: inas uka jaqerojj janïra khitis Jehová Diosat parlkchiti. Ukhamajj kuntï lurapkta ukajj wali askipuniwa” sasa. Ukaw Brian jilatarusa Michelle kullakarusa jan qarjtañatakejj yanaptʼäna. Yaqha jilatajj jupanakarojj sarakïnwa: “Jan aynachtʼañatakejja, qawqsa chino aru parlañ yateqasipkta uk amuytʼasipjjam, ukampis jan sapürojja, jan ukasti mä jachʼa tantachäwit yaqha jachʼa tantachäwkama” sasa. Ukhamarjamaw lurapjjäna. Jichhasti wali sumwa precursoranakjam yanaptʼasipki.

¿Kunas yaqha aru yateqañamatakejj yanaptʼiristamjja? Kawkïr markantï yanaptʼañ munkasma ukar mä qawqha tiempo sarawayam. Ukansti tantachäwinakaru ukat yatiyiri saram. Ukatjja, ukankir jilat kullakanakar uñtʼaniwayam. Brian jilatajj siwa: “Qawqha jaqenakas Diosan Reinopat yateqañ munapjje ukhamaraki qawqsa jilat kullakanakajj ukan munasipjjtam uk amuyañawa, yaqha markar servir sarañatakejj wal yanaptʼätam” sasa.

Taiwán markar sarir yaqhep precursoranakajja, inglés aru yatichasaw trabajipjje. Kristin jilatampi Michelle kullakampejj chawllanaka marisconak aljasaw qollqe ganasipjje. Kristin jilatajj siwa: “Janipuniw kunapachas ukham trabajirïkti, ukampis uka trabajow akan serviskakiñataki yanaptʼitu” sasa. Jichhajj walja alanakanëjjewa. Niyakejjay mä qawqha horanakak trabajchejja, uk tuktʼayasajj yatiyiriw mistupjjaraki. “Jaqenak jikjjatiriw” precursoranakjam sarapjje.

Williamampi Jennifer kullakampejja, ukhamarakiw Estados Unidos markat Taiwán markaru sarjjapjjäna, niya paqallq maraw ukankjjapjje. Williamajj siwa: “Yaqha aru yateqañasa, precursoräñasa, tam uñjañasa, trabajiñasa... qariñjamäspawa” sasa. ¿Kunjamsa jupanakajj uka lurañanakap kusisita sum phoqawayapjje? Qawqtï lurirjamäpkäna ukatakiw chʼamachasipjjäna. Sañäni, janiw chino yateqañat sinti llakisipkänti. Janis ratuk yateqapkchïnjja, janiw aynachtʼapkänti.

Mä tamanak tumptʼirejj Williamarojj akham sataynawa: “Jan puriñatakjja llakisimti, jan ukasti uñatattʼasisa saram” sasa. Mä arunjja, Diosar serviñan kun lurañtï amtktan ukjja, jukʼat jukʼat jikjjatañkama nayrar sartatas wali askitwa uñjañasa. Williamamp esposapampirojj uka arunakaw wal yanaptʼäna, ukaw yatinoqtañatakisa, jilatanakan ewjjtʼap katoqañatakisa, uka markan kunjamsa sum yatiyapjjaspa uk yateqañatakisa yanaptʼäna. Williamasti saskakiwa: “Uka jilatan ewjjtʼaparjamajja, aka islan utjki uk suma lugaranak uñjiri sarañatakis tiemp apstʼasipjjaraktwa” sasa.

Megan kullakajj Estados Unidos markatwa sararakïna, jupasti precursorjamaw serviski ukat chino aru parlañatakiw chʼamachasiskaraki. William ukat Jennifer kullakjamarakiw “uñatattʼasisa” wali kusisita serviskaraki. Sapa semana tukuyarakiw uka kullakajj yaqha jilat kullakanakampi, Taiwán markankir Kaohsiung sat mä jachʼa puertoru yatiyir sarapjje. Megan kullakajj barcot barco  yatiyasajja, chawlla katurinakaruw yatiyatayna, jupanakajj Bangladés, Filipinas, India, Indonesia, Tailandia, Vanuatu sat markanakatwa jutapjjäna. Kullakasti siwa: “Chawlla katurinakajj janiw jaya tiempo uka puertor qheparapkiti, ukatwa uka pachpan Bibliat yatichapjjta. Waljanir Bibliat yatichañatakejja, awisajj pusiniru jan ukajj phesqaniruw yatichirïta” sasa. ¿Kunjamsa chino aru yateqaski? Jupajj siwa: “Jankʼak yateqañwa munirista, ukampis mä jilatan ewjjtʼapaw wal yanaptʼitu. Jupajj siriwa: ‘Qawqtï puedkta uk chʼamachasim, chikatjja Jehová Diosaw yanapaskätam’ sasa”.

Gran Bretaña markankir Cathy kullakajj janïr yaqha markar sarkasajja, kawkinsa mä soltera kullakajj jan sinti llakisisa servispa ukwa yatjjatäna. Uka toqetjja, Jehová Diosaruw wal mayisitayna, ukat walja sucursalanakaruw qellqarakïna. Sapa mayni sucursalajj kamsänsa uk sum amuykipasajj Taiwán markar sarañwa amtäna.

Cathy kullakajj 31 maranïsaw Taiwán markar 2004 maran sarjjäna. Jupasti siwa: “Jilat kullakanakaruw kawkinsa iraqtʼatarukejj frutanaksa verduranaksa alasirista uk jisktʼasirïta. Ukhamatwa qollqejj jan pistʼirïkituti” sasa. ¿Kunas jan sinti qollqe toqet llakisiñatakejj yanaptʼi? Jupasti siwa: “Kuntï manqʼaskta isiskarakta ukampi kusisiñatakejj Jehová Diosaruw mayista. Janisa kuntï munkta uk taqpach jikjjatkchëjja, Diosaw kunanakas natakej wakisi uk amuyasiñatakisa ukat kunatï utjkitu ukamp kusisiñatakisa yanaptʼitu. Ukham jakañajj wali sumawa, kunattejj jukʼampwa Jehová Diosarojj servta” sasa.

Cathy kullakajj qawqhatï munaski ukampikis jakaschejja, wali kusisitaw jakasi. Jupajj siwa: “Akanjja, waljaniw Diosan arunakap sum istʼapjje, ukaw ¡wali kusiskañajja!” sasa. Taiwán markar purisajja, kawkïr markantï precursorjam serviñ qalltkäna ukanjja, pä tamakiw chino arut utjäna, jichhajj paqallqow utj-jje. Kullakajj saskakiwa: “Wal jiljjattir uñjasasa cosecha apthapiñan yanaptʼasasa sapüruw wali kusisita jikjjatasta” sasa.

Qalltan parlkayätan uka Choong Keon jilatampi Julie kullakampejj ¿kunjamakis jikjjatasipjjaraki? Qalltanjja, Choong Keon jilatajj chino aru jan sum parlañ yatitapat janis tamanjja yanaptʼkaspa ukhamwa amuyasïna. Ukampis tamapankirinakajj janiw ukham amuyapkänti. Jupasti siwa: “Tamajajj payar jaljtjjäna ukhajja, irpir chuymaninakan yanapiripjamajj walja yaqha lurañanakwa katoqta. Ukapachaw kawkjantï yanaptʼajj munaski ukan wal yanaptʼaskataj amuyasta” sasa. Lartʼasisajj sarakiwa: “¡Nayan yanaptʼajas wakisïnwa!” sasa. Jichhajj Choong Keon jilatajj irpir chuymanjamaw serviski. Julie kullakajj sarakiwa: “Janiw nayrajj ukham wali kusisita, chuymas phoqtʼata ukham jikjjatasipjjerïkti. Nanakajj yanaptʼiriw jutapjjta, ukampis nanakakiw yanaptʼa katoqjjapta, wali suma experienciapuniwa. Akankapjjatajatjja, ¡walpun Jehová Diosar yuspärapjjta!” sasa.

Jumajj ¿niyat yateqañ utat mistjjäta? ¿Kunsa jakäwijan lurä sasat lupʼiskta? Sapakïsksta ukhajja, ¿janit Diosan markapan jukʼamp serviñ munkasma? ¿Familiamampi Diosar jukʼamp servisa suma experiencianakanïñti munta? Jubilatäjjsta ukhajja, ¿janit experienciamamp yaqhanakar yanaptʼañ munkasma? Walja markanakanwa yanaptʼajj munasiski. Jan pächasimti, jumatï jukʼamp serviñ amtäta ukat yaqha cheqar yanaptʼir saräta ukhajja, walja bendicionanakwa katoqäta.