PASÏR maranakanjja, César jilatampi Rocío esposapampejj California markanwa sum jakasipjjäna. Jilatajja, calefacción, ventilacion ukat aire acondicionado uka aparatonakampiw jornälpach trabajïna, kullakasti qollañ utanwa chika uru trabajirakïna. Kawkhantï jakasipkäna uka utas jupanakankänwa ukat janirakiw wawanïpkänti. Ukampis akatjamatwa jakäwinakapajj mayjtʼawayäna.

Estados Unidos markankir sucursalajja, 2009 octubre phajjsin taqpach tamanakaruw mä carta apayäna. Wallkill (Nueva York) Betelan walja trabajonakan yanaptʼapjjañapatakiw kunayman experienciani jilat kullakanakar jawsasïna. Kawkïr jilat kullakanakatï kimsa tunka phesqanit jila maranïpki ukanakarus jawstʼasirakïnwa. Cesarampi Rocío esposapampejj akham sapjjewa: “Uk istʼasajja, qawqha maranipkayätti ukwa amuyapjjayäta, Betelar servirejj sarañasapuniw sasaw amtapjjayäta. ¡Janipuniw kunäkipansa ukhamak pasayañ munapkayätti!” sasa. ¿Kunsa lurapjjäna? Jankʼakiw solicitud phoqhantapjjäna.

Mä mara jilaw pasjjäna ukat janiw kuna yatiyäwsa katoqapkänti. Ukhampachasa, wakiski ukanakampik jakasiñatakiw jupanakajj chʼamachasipjjäna. Cesarajj akham siwa: “Auto imañ utjja sum askichtʼapjjta ukat ukaruw jakir sarjjapjjta. Ukhamat maynir jachʼa uta (200 metros cuadrados) alquilañataki, uksti pasïr maranakakiw tukuyapjjta ukat ukanwa jakasiñ munapjjayäta, ukampis jichhajj jiskʼa utanakwa jakasjjapjjta (25 metros cuadrados). Betelat jawsanipjjetaspäna ukhajja, jakäwinakaj ukham mayjtʼayasakiw iyaw sasin sarapjjeriskayäta” sasa. ¿Kunas pasäna? Rociojj akham siwa: “Mä phajjsi uka jiskʼa utan jakasjjapjjayat ukhaw Wallkill Betelan mä qawqha tiempo serviñatak jawsapjjetu. Ukham jakäwinakaj mayjtʼayasajja, Jehová Diosan bendicionanakap qhanwa uñjawayapjjta” sasa.

Walja jilat kullakanakaw César jilatjama ukat Rocío esposapjamajj jakäwinakap mayjtʼayawayapjje, ukhamat kuna trabajonakatï Nueva York  sucursalan lurasiski ukanakan yanaptʼañataki. Yaqhepanakajj Wallkill Betelanwa yanaptʼapjje ukat waljanirakiw Warwick markan yanaptʼasipki, ukanjja mä Betelwa lurasipki. * Diosar jukʼampi serviñatakejj waljaniw suma utanakapa trabajonakapa ukat uywanakap jaytawayapjje. ¿Kunjamsa Diosajj uk uñji? ¿Ukham jakäwinakap mayjtʼayapjjatapat bendispachänti? Jïsa, bendiciwa.

Amuytʼañataki: electresista Way jilatampi Debra esposapampejj niya sojjta tunka maranïpjjewa. Kansas markankir utapa ukat yänakap aljasajj Wallkill Betelan serviñatakiw sarapjjäna, ukampis janiw Betelan jakapkänti. * Ukatakejj jakäwinakapsa mayjtʼayapkchïnjja, janipuniw chuym pisayasipkänti. Debra kullakajj Betelan trabajisajj akham siwa: “Bibliat apstʼat qellqatanakanjja, wali suma fotonakaw Paraisot uñsti, ukan jilat kullakanakaruw suma utanak luraskir uñjasi, nayajj ukankkiristsa ukhamwa amuyasta” sasa.

Melvin jilatampi Sharon esposapampejj Carolina del Sur markankirïpjjewa, Warwick Betelan yanaptʼir sarañatakejj utapsa yänakapsa ukhamarakiw aljawayapjje. Ukanak lurañajj chʼamäkchïnsa, wakiskir luräwinakan yanaptʼañaruw askit uñjapjjäna. Jupanakajj sapjjewa: “Oraqpachankir jilat kullakanakar yanaptʼkani uka Betel lurañar yanaptʼañajj ¡wali askipuniwa!” sasa.

Jubilat Kenneth jilatampi Maureen esposapampejj phesqa tunka jila maranïpjjewa. Jupanakajj Warwick Betelan yanaptʼañatakiw California markat sarapjjäna. Nayraqatjja, tamapankir mä kullakampiw utap uñjañapatak parltʼapjjäna. Ukat Ken jilatan chuymankipstat awkipar uñjapjjañapatakiw familiapar mayipjjäna. Jakäwinakap mayjtʼayasaw Betel utan serviñatak sarapjjäna, ¿uk lurapjjatapat chuym pisayasipjjpachänti? Ken jilatajj akham siwa: “Walja askinakwa nanakajj jikjjatasipkta, cheqas jan waltʼañanakajj utjakiwa, ukampis kʼuchikiw jakasipjjta. Khitinakatejj nanakjam lurañ puedepki ukanakarojja, mä pita ukatakejj chʼamachasipjjam sasaw ewjjtʼapjjta” sasa.

Khitinakatï yanaptʼañatak chʼamachasiwayapki ukanakajja, kunayman luräwinakwa jaytawayapjje. Amuytʼañataki, William jilatampi Sandra esposapampejj niya sojjta tunka jila maranïpjjewa ukat Pensilvania markanwa sum jakasipjjäna. Maquinanakan partenakap sum lurtʼir empresapanjja, 17 trabajadoranïpjjänwa. Kawkïr tamantï servipkäna ukanjja jiskʼatpachaw ukankapjjäna ukat niya taqpach familiapaw uka jakʼanakan jakasipjjäna. Wallkill Betelan yanaptʼañatakiw jawstʼapjjäna, ukampis janiw Betelan jakapkänti. Ukatakejja taqe khitinakarutï uñtʼapkäna ukat familiarapapkäna  ukanakar jaytawayasin sarjjapjjañapwa amuyapjjäna. William jilatajj akham siwa: “Kawkhantï jakasipkayäta ukhat mistuñaw wali chʼamäna” sasa. Ukampis Diosaruw wal mayisipjjäna ukat kuntï amtapkäna ukarjam lurasajj janiw chuym pisayasipkänti. Jupajj sarakiwa: “Akan yanaptʼañasa ukat jilat kullakanakamp chika trabajtʼañas janiw kawkinsa ukhamajj utjkiti. ¡Nayampi ukat Sandrampejj wali kusisitapuniw jikjjatasipjjta!” sasa.

Hawái markankir Ricky jilatajj utanak lurañatak mä empresan jefet uttʼayatänwa. Juparojj Warwick Betelan yanaptʼañatakiw jawstʼapjjäna. Kendra esposapaw uk katoqañatak chʼamañchtʼäna. Ukampis 11 maran Jacob yoqapatwa akham sas llakisipjjäna: “¿Nueva York markan jakir sarañajj walikiskpachäniti? ¿Kunjamsa yoqasajj uka markan jikjjataspachäni?” sasa.

Ricky jilatajj akham sarakiwa: “Diosar yupaychañatak chʼamachasir wayn tawaqonakani, mä tama jikjjatañajj wali wakiskirïnwa. Jacob yoqajajj suma amigonakanïspa ukwa munapjjayäta” sasa. Ukampis jukʼa wawanakani ukat walja Betelitanakani mä tamaruw puripjjäna. Ricky Jilatajj saskakiwa: “Uka tamankjjasin nayrïr tantachäwir sarasinjja, Jacob yoqajaruw jisktʼta: ‘Juma mita wayn tawaqonak jan utjipanjja, ¿kunjamakis aka machaq taman jikjjatasta?’ sasa. Jupajj sarakituwa: ‘Jan llakisimti papitu, nayan amigonakajajj Betelita wayn tawaqonakäniwa’ sasa”.

Cheqas ukhamapuniskänwa, Betelankir wayn tawaqonakajj Jacobon suma amigonakapapjjänwa. ¿Ukajj kunjamsa yanaptʼäna? Ricky jilatajj akham siwa: “Mä arumajj yoqajan cuartopanjja luzaw qhanaskäna, anatañ videonakampiw anataskpacha sasaw amuyayäta, ukampis janiw ukhamäkänti, jan ukasti ¡Biblia liyiskatayna! ¿Kunsa luraskta? Sasin jisktʼatajja, nayajj betelitätwa, mä maran Biblia liyiñ tukjañajjawa” sasa. Ricky jilatan Warwick Betelan yanaptʼatapatjja, jupasa Kendra esposapas wali kusisitaw jikjjatasipjje, ukhamarak Jacob yoqapan Diosar yupaychañan nayrar sartaskatapat wal kusisipjjaraki (Pro. 22:6).

Kuna trabajonakatï Wallkill ukat Warwick Betelan luraski ukanakajj tukusjjaniwa, ukan trabajiñatak jawstʼatäpki ukanakas uk yatipjjarakiwa. Ukampis jupanakajj uka trabajonak tukuyasinjja, ¿kawkirus sarañäni ukat kunsa lurañäni sasinti llakisipjjpacha? ¡Janiwa! Florida markankir aka pä chacha warmjamaw walja jilat kullakanakajj jikjjatasipjje, jupanakasti niya phesqa tunka maranïpjjewa. Gerentet trabajir John jilatampi Carmen esposapampejj Warwick Betelanwa yanaptʼasipki. Jupanakasti akham sapjjewa: “Jehová Diosajj  kuntï munapkta ukwa jichhürkamajj churawayapjjetu, akan trabajiñatakejj Jupaw jawsapjjarakitu, ukhamajj janipuniw kunapachas jaytanukupkitaniti” sasa (Sal. 119:116). Incendionak apaqañatak maquinanak lurir Luis jilatampi Quenia esposapampejj Wallkill Betelanwa servisipki. Jupanakajj akham sapjjewa: “Kunanakatï jakañatak wakiski ukanakjja, Jehová Diosajj jilarkirwa churapjjetu. Kunjamsa, kunapachasa jan ukajj kawkinsa Jehová Diosajj yanaptʼapjjetani uk janiw yatipkti, ukampis Jupat janiw pächasipkti” sasa (Sal. 34:10; 37:25).

Kawkïr jilat kullakanakatï Nueva York markan Betelar yanaptʼir sarapkäna ukanakajja, walja toqetwa jan sarañatak amtapjjaspäna. Ukampis kunjamtï Jehová Diosajj yantʼapjjeta siskejja, ukarjamaw lurawayapjje, Jupajj akham siwa: “Jichhajj yantʼapjjarakita, nayaw jumanakaru alajjpach ventananak jistʼaranisina walja bendicionanak apayanipjjäma jilarkiriraki” sasa (Mal. 3:10).

¿Jumajj Jehová Diosar yantʼarakismati? Cheqas Diosaruw wal mayisiñama, ukat Nueva York markansa jan ukajj yaqha cheqankir Betelan trabajiñatakejj ¿yanaptʼasmati?, uka toqetsa sum amuytʼasiñamarakiwa. Ukhamtï lurätajja, Diosat walja bendicionanakwa katoqäta (Mar. 10:29, 30).

Alabama markankir ingenierot trabajir Dale jilatampi Cathy esposapampejj Wallkill Betelanwa yanaptʼapjjäna. Jehová Diosar taqe chuyma ukham serviñatakiw yaqhanakar akham invittʼapjje: “Jumatï jan ajjsarayasisa kuns amtäta ukat ukarjam lurarakïta ukhajja, Jehová Diosan qollan ajayupan yanaptʼapwa qhan amuyäta” sasa. ¿Kunsa jumajj ukham yanaptʼañatakejj lurasma? Dale jilatajj siwa: “Kunatï wakiski ukampik jakasiñatak chʼamachasim ukatjja, jukʼamp chʼamachasiskakim. ¡Janipuni ukham luratamat chuym pisayasimti!” sasa. Carolina del Norte markankir Gary jilatajj 30 maraw supervisorjam utanak lurir mä empresan trabajïna, jupampi Maureen esposapampejj Warwick Betelanwa yanaptʼasipki, jupanakajj akham sapjjewa: “Wali munasiri ukat walja maranak Betelan servir jilat kullakanakampi jakasiñasa trabajiñasa mä bendicionapuniwa” sasa. Gary jilatajj akham sarakiwa: “Betelan serviñatakejj kunatï wakiski ukampikiw jakasiñasa, ukhamatakwa akapachan sum jakassna” sasa. Illinois markankir Jason jilatajj luzanak uchir mä empresanwa trabajïna, jupampi Jennifer esposapampejj akham sapjjewa: “Wallkill Betelan yanaptʼañajj Paraisonsa jakasksna ukar uñtasitawa” sasa. Jennifer kullakajj sarakiwa: “Kuntï lurktan ukanak janipuniw Jehová Diosajj armkaniti ukat wali askit uñjaskatap yatiñajj wali kusiskañawa, ukhamarus jilarkirwa bendicirakïtam” sasa