Nayajj Warialda (Nueva Gales del Sur) sat markan jilsuwayta. Ukanjja, uwijanakasa, wakanakas waljaw utji, ukat arrosasa, avenasa, juyranakasa ukat yaqha ukhamanakas yapuchasirakiwa. Janirakiw sinti jan walinakas utjkiti, ukat uka markajj qʼomarakiwa.

Tunka jilanakajat nayaw jilirïtjja, ukhamajj familiajar yanaptʼañatakejj 13 maranïkasaw trabajiñ qalltjjayäta. Niyakejjay escuela jan tukuykchiyättejja, walja uywanak utjki (rañcho) ukanwa trabajiyäta. Ukat 15 maranïkasajj suma yanapirïjjayätwa ukat jaqen jan jakʼañ caballonakwa jan uripjjañapatak yatichirïta.

Cheqans ukan trabajiñajj mä toqet wali sumänwa, kunattejj arumanakajj anqar mistusinwa nina jakʼar qontʼasirïta, ukat phajjsi ukat warawaranak kʼajanirwa uñchʼukirïta, janiw ukakïkänti, inti jalantjjarojj panqaranakas wali sumwa thujstʼanirakiri. Ukat amuyujan ‘taqe akanak mayniw lurpacha’ sasaw lupʼirïta. Ukampis maysa toqet jan walinakas utjarakïnwa, mayni irnaqer masinakajajj jan wali arunakwa parlapjjerïna ukat cigarronak kunwa pitapjjerïna (fumapjjerïna), ukhamajj uka pachparakwa nayajj lurjjarakiyäta.

Ukat 18 maranïsajj Sydney sat markaruw sarjjayäta. Ukanjja, ejercitor (cuartelar) mantañ yantʼawayta, ukampis escuela jan tukuyatajj laykojj janiw katoqawayapkituti. Ukhamajj mä trabajo jikjjatasajj mä maraw ukan qheparayäta. Ukanwa Jehová Diosan Qhanañchirinakapar uñtʼawayta. Ukat tantachäwinakaparuw invittʼapjjetäna, sarasinsti jankʼakiw Dios toqet cheqa yatichäwinak yatichapjjatap amuyjjayäta.

Ukampis qhepatjja, kawkhantï nayrajj trabajkayat uka cheqaruw kutʼjjayäta. Uka cheqajj Goondiwindi (Queensland) satawa. Ukanwa trabajsa jikjjatayäta ukat jaqechasjjarakiyäta, ukampis umañ qalltjjayäta.

Pä wawanëjjapjjayätwa. Ukat nasjjapjjän uka qhepat ‘kunjamsa jichhajj jakasï’ sasaw wal lupʼiyäta. Ukat ukhaw kuntï Jehová Diosan Qhanañchirinakapan tantachäwipan  Sydney markan istʼkayät uk amtasajj may lurañ amtawayta.

Nayra maran mistkäna Yatiyañataki sat mä revista jikjjatayäta. Ukanjja, Jehová Diosan Qhanañchirinakapan sucursalapajj kawkhansa Australia markan jikjjatasi uk qhanañchaskäna, ukat jankʼakiw yanapa mayisin jupanakar qellqayäta. Ukatsti Jehová Diosan mä Qhanañchiripaw visittʼitäna, jupasti wali suma jaqënwa ukhamatwa Bibliat yateqañ qalltawayta.

Bibliat jukʼat jukʼat yateqkasajj jakäwijan jan walinak apanukuñajwa amuyasiyäta. Ukat Biblian mä jiskʼa tʼaqapaw chuymajar purtʼitäna, ukasti 2 Corintios 7:1 jiskʼa tʼaqawa, ukan akham siwa: “Qʼoma sarnaqañasawa” sasa.

Ukhamajj cigarronak pitaña ukat machjayir umañanak jaytañ amtjjayäta. Cheqansa taqe ukanak jaytañajj wali chʼamäkchinsa, Diosar kusisiyañaw nayatakejj jukʼamp wakiskirïna. Ukat Romanos 12:2 jiskʼa tʼaqaw jukʼamp yanaptʼitäna, ukan akham siwa: “Janiy jumanakajj akapacha saräwinakarjamajja jakjjapjjamti, jan ukasti amtañanakamanjja machaqat amtasjjapjjam” sasa. Ukhamajj jan wali luräwinak jaytañajatakejj kuntï Diosajj ukanakat amuyki ukham amuyañajänwa, jïsa, Jehová Diosajj taqe ukanak jan walitwa uñji. Ukat Jupan yanaptʼapampirakiw taqe ukanak jaytawayta.

Ukampis jan wali arunak parlañ jaytañaw wali chʼamänjja. Cheqansa, kuntï Efesios 4:29 qellqatajj siski uk sum yatiskayäta, ukan akham siwa: “Jan wali arunakjj jan parlapjjamti” sasa. Ukhamäkchinsa, walja tiempotwa ukanak jaytawayta. Ukatakejj kuntï Isaías 40:26 qellqatajj warawaranakat parlki uk lupʼiñaw yanaptʼawayitu, ukan akham siwa: “Alajjpach uñtapjjam ukatsti uñatatapjjarakim: ¿Khitis taqe ukanak uskojja? Khititejj jupanakar mayat mayat jalanoqki ukajj sapaqat mayniruw sutitkam jawsaraki. Wali jachʼaw chʼamapajja munañanïñapasa, janirakiw maynis chhaqkiti” sasa. Ukhamajj niyakejjay Diosajj taqe kunatï alajjpachan utjki uk lurañatak chʼamanïchejja, nayar yanaptʼañatak chʼamanirakïpachawa sasinwa lupʼirïta. Cheqansa, Jehová Diosar oracionan yanap wal mayisisa ukat wal chʼamachasisajja, jan wali arunak parlañ jaytawayjjayätwa.

Walja uywanak utjki uka cheqan trabajisajj janiw jaqenakamp sint parlkayätti, kunattejj ukhanakan trabajirinakajj jukʼanikïnwa. Ukampis Jehová Diosan Qhanañchirinakapamp tantachtʼasisaw sum parlañ yateqawayta, ukanwa wal yanaptʼapjjetäna. Ukat ukanarakwa Diosan Reinopat suma yatiyäwinak jaqenakar yatiyañatak yatichapjjetu (Mateo 6:9, 10; 24:14).

Pasïr maranakakiw irpir chuymanjam taman uttʼayapjjetu. Ukajj nayatakejj wali askiwa, kunattejj ukhamatwa jilat kullakanakajar wal yanaptʼiristjja.

Janiw escuela tukuykti, ukampis Jehová Diosaw Jupjjat yatichitu, taqe ukanakatwa Jupar wal yuspärtjja (Isaías 54:13). Ukat kuntï Proverbios 10:22 qellqatan siski uka arunakajj nayatakjamapuniwa, ukan akham siwa: “[Jehová] Tatitun bendicionapawa qamiriptayi” sasa.