España markanjja nayra maranakajj waljaniw Diosan Arup liytʼawayapjjäna
“Jichhajja muntwa jumanakar tumptʼaña kunapachatï Españaru sarkä ukapacha.” (Romanos 15:24)
UKA arunakwa apóstol Pablojj Roma markankir cristianonakarojj niya 56 mara jakʼan qellqäna. Kawkhantï jichhajj España markajj jikjjataski ukar apóstol Pablojj purpachänti janicha uk Bibliajj janiw qhanañchkiti. Ukhampachas khä 100 maranakanjja, apóstol Pablon ukat yaqha misioneronakan wal chʼamañchtʼasipjjatap laykojj península ibérica toqerus Diosan arunakapajj puriwayarakïnwa.
Ukat uka markpachanwa cristian tamanakajj utj-jjäna. Niyakejjay Roma markan apnaqatächïnjja, ukanjja jila partejj latín arwa parljjapjjäna, ukatwa uka arur Biblia traduciñajj wakisïna.
LATÍN ARUT QELLQAT BIBLIA
España markankir Roma markat jutir nayrïr cristianonakajja, latín aruruw walja qellqatanak jaqokipapjjatayna, ukat uka qellqatanakajja, Vetus Latina Hispana sasinwa uñtʼasjjäna. Ukanakjja, walja patak maranakaw apnaqawayapjjäna, Jerónimo chachajj Vulgata qellqat latín arut 400 maranakan tukuykäna ukhakama.
España markarojja, Jerónimo chachan qellqatanakapajj (Palestina markanwa Belén cheqan tukuyasïna) orasaparupuniw purïna. ¿Kunjamsa? Bibliat yatjjatiri ukat wali qollqeni Lucinio chachaw Jeronimon latín arur Biblia jaqokipaskatap yatïna, ukatwa qellqaqanipjjañapatakejj sojjtanir Belenar khitäna. Ukat qhepa maranakatjja, uka Bibliaw Vetus Latina Hispana lantejj wali uñtʼatäjjäna. Cheqas uka paypach Biblianakaw Diosar uñtʼapjjañapatakejj jaqenakar wal yanaptʼawayi, ukampis Roma Imperion aynachtʼatapampejja, Bibliajj yaqha arur jaqokipasiñapaw wakisjjäna.
CHʼIYAR TʼALPHA QALANAKAR QELLQAT BIBLIA
Visigodos ukat germánicas sat yaqha tribunakajj península ibérica uksarojj 400 maranakan mantantapjjäna. Ukhamatwa uka markanjj gótico arojj uñstawayi. Jupanakajja arrianismo religionankirïpjjänwa, ukat kimsa diosanak mayar apthapitaw siski uka yatichäwirojj janiw creyipkänti, ukat Biblias pachpa arupatwa utjarakïna. Ukasti Biblia gótica de Ulfilas satänwa. Uka Bibliajj visigodo Recaredo reyejj catolicöjjan ukhakamakiw España markan 500 mara tukuykam liytʼasiwayi. Uka reyisti, arrianismot parliri taqpach libronaka ukat Ulfilas Bibliamppacha apthapisin chhaqtayapjjañapatakiw mä orden apsüna. Ukhamatwa gótico arut qellqatanakajj chhaqtawayjje.
Chʼiyar tʼalpha qalan latín arut jutïr yaqha arur qellqata (500 maranakana)
Ukhampachasa Diosan Arupajj uka tiempon liyisiskakïnwa. Janiw gótico aruki parlaskänti, latín arut saraqeri arunakas península ibérica uksan parlasirakïnwa. * Uka arunakajja, nayra qellqatanakajja chʼiyara tʼalpha qalanakaruw qellqasïna, ukatwa visigodonakan chʼiyara tʼalpha qalanakar qellqatapa sasin uñtʼasi. Ukat ukajja 500 ukat 600 maranakatawa, ukanjja, Salmo qellqatanaka, Mateo, Marcos, Lucas ukat Juan qellqatanakas (Evangelios) utjarakiwa. Ukanakat maynïrinjja, Salmo 16 jaljajj phoqatpachaw utji.
Ukhama tʼalpha qalanakar Diosan arunakapa qellqat utjatapajja, uka tiemponakan Diosan Arup jiwasjam jaqenakajj liytʼapjjerïtapa ukat qellqaqapjjerïtapaw amuyasi. Yatichirinakajj uka tʼalpha qalanakampiw liyiñ qellqaña yatichapjjerïpachäna. Uka tiemponjja, monasterionakan suma dibujonakampi Biblianakap lurañatakejj pergaminonakaruw qellqapjjerïna. Ukampis uka tʼalpha qalanakajj alañatakejj pergaminot sipansa jukʼamp minusakïnwa.
España markana León sat cheqana utjki uka Bibliajj suma kʼachachtʼatapunïnwa. Ukampis uka Biblianakajj wali suma lurtʼatäkchïnsa, janiw jaqenakarojj Diosan Arup uñtʼapjjañapatak sum yanaptʼkänti
Uka Biblianakat mayajja, San Isidoro Iglesianwa jikjjatasi, España markana León sat cheqana. Uka Bibliajj 960 maranakatawa, ukat 516 jananakaniwa, largorojja 47 centimetroni, anchorusti 34 centimetroniraki ukat 18 kilonirakiwa. Ukat yaqhasti Biblia de Ripoll satarakiwa, ukajja Católica Iglesian pʼeqtʼapki (Vaticano) uka bibliotecapanwa jikjjatasi, uka Bibliajja niya 1020 uka maränwa lurasïna, ukat dibujonakampi suma lurtʼatarakiwa. Mä sapa qallta letra lurañatakejja, tatakurajj uru jurnalaw lurirïna ukat mä janan pʼeqeñchäwipjja mä semananwa tukuyasirïna. Uka Biblianakajj wali suma lurtʼatäkchïnsa, janiw jaqenakarojj Diosan Arup uñtʼapjjañapatak sum yanaptʼkänti.
ÁRABE ARUT QELLQAT BIBLIA
Khä 700 maranakanjja, árabe aru parlirinakajj península ibérica uksaruw mantantapjjäna, ukhamatwa uka arojj jukʼat jukʼata parlañ qalltasina. Kawkharutï musulmananakajj mantantapkäna ukha cheqanakarojj latín aru parlañat sipansa, árabe aruw jukʼamp parlasjjäna.
Bibliajj latín, árabe arunakat 400 marat 700 maranakkamajj utjkäna ukajja, España markan jakasirinakarojj walpun ajay toqet yanaptʼäna
Amuyatajja, España markan 500 maranakat 1500 maranakkamajj Evangelio qellqatanakajj árabe arun waljaw utjpachäna. Ukjja Sevilla markankir Juan sat mä obispow taqpach Biblia uka arur 600 maran jaqokippachäna. Uka Bibliankir libronakat jila partejj janiw jichhajj utj-jjeti. Utjki ukanakat mä qawqhajja, 900 maranakan qellqaskäna uka evangelionakawa, ukanakasti León sat markankir iglesianwa jikjjatasi.
Evangelio qellqatanaka árabe arur jaqokipata (900 maranakana)
ESPAÑOL ARUT QELLQAT BIBLIA
Khä 1500 tukuya maranakanwa castellano jan ukajj español arojj uñstäna. Uka machaq arojja, Diosan arunakap niya taqe cheqan uñtʼasiñapatakiw wal yanaptʼäna. * Español arut mä nayra qellqatajja, La Fazienda de Ultra Mar (Hechos de ultramar) sat qellqatanwa uñsti, ukajj 1200 qallta maranakatawa. Uka qellqatanjja, Israel markar mä viajitwa parli, ukat Bibliankir phesqa qallta libronakata (Pentateuco) Hebreo arut yaqha Qollan qellqatanakata (Antiguo Testamento), Evangelio qellqatanakata ukat cartanakatsa parlarakiwa.
Alfonso X sat reyiw Biblia español arur jaqokipasiñapatak yanaptʼäna
Católica Iglesia pʼeqtʼirinakatakejj español arur Biblia jaqokipasiñapajj janiw walïkänti. Ukatwa 1234 maran Tarragona cheqan mä tantachäwin mä decreto apsupjjäna, ukarjamajja, kuna artï jaqenakajj parlapki uka arunakat qellqat Biblianakjja, markapankir tatakuraruw phichantañapatak churapjjañapäna. Ukampis inamayakiw uka decreto apsupjjäna, Bibliajj español arur jaqokipasiskakïnwa. Alfonso X (1252-1284) sat reyejja, español arut Biblianïñ wal munäna, ukatwa uka arur Biblia jaqokipasiñapatak yanaptʼäna, ukatwa juparojj español arut qellqatanakan awkipa sasin uñtʼasi. Uka maranakanjja, yaqha Biblianakajj utjarakïnwa, ukanakat maynïrejj Biblia Prealfonsina satawa. Qhepatjja, Biblia Alfonsina sat Bibliarakiw uñstäna, uka tiemponjja uka Bibliaw phoqatpach utjäna.
(Chʼeqa) Prealfonsina Biblian janapa ukat (kupi) Alfonsina Biblian janapa (1200 maranakana)
Uka pä Biblianakaw español aru parlasiñapatakejj wal yanaptʼäna. Thomas Montgomery sat chachajj Biblia Prealfonsina sat Bibliat akham siwa: “Aka Biblia jaqokipirejja, mä muspharkañ qellqatpunwa lurawayi, janiw kunas faltkiti ukat taqenin amuytʼkañarakiwa. [...] Kunattejj qhana ukat amuykañ arunakampi qellqtʼatawa” sasa.
Ukampis español arur jaqokipaskän uka nayrïr Biblianakajja, janiw hebreo arut jaqokipaskänti, antisas Vulgata latina qellqatatwa jaqokipasïna. Ukat 1300 maranakat aksaruw Bibliat yatjjattʼat judionakajj Hebreo Arut Qollan Qellqatanakjja, español arurojj hebreo arut jaqokipapjjäna. Uka tiemponjja, Europan jakasir judionakaw España markan jakasipjjäna, niyakejjay judío traductoranakajj nayra hebreo qellqatanak uñakipañatak jan jarkʼatäpkchïnjja, hebreo arut cheqakwa español arur jaqokipapjjäna. *
Ukanakat mä Bibliajja, Biblia de Alba satawa, ukajj 1400 maranwa tukuyasïna. Luis de Guzmán sat mä wali aytat español jaqew Moisés Arragel sat mä yatichirir español castizo (puro) arur Biblia jaqokipañapatak mayïna. Kunatsa mayïna ukjja akham sasaw pä toqet qhanañchäna: “Kuna arunakantï Bibliajj qellqatäki ukajj jichhürunakan qʼala mayjtʼayatäjjewa” ukat “jan amuyañjam textonakajj jana thiyanakan qhanañchäwinïñapwa jiwasjam jaqenakajj munapjjta” sasa. Ukajja, uka tiempon jakir jaqenakajj Biblia wal liytʼaña ukat amuyañ munapjjatap amuyayistu. Ukat España markan Bibliajj pachpa arunakapan wal utjatapwa amuyayarakistu.
Traductoranakan ukat copistanakan 500 maranakat 1500 maranakkam chʼamachasipjjatap laykuw España markankir yatjjatat jaqenakajj pachap arupat Biblia sum liytʼapjjäna. Ukhamatwa “españankir jaqenakajj alemán, inglés arunak parlirinakat sipansa ukat Luterot sipansa Biblia jukʼamp sum uñtʼapjjäna” sasaw sarnaqäwinakat yatjjatiri Juan Orts González sat chachajj qhanañchi.
“Españankir jaqenakajj alemán, inglés arunak parlirinakat sipansa ukat Luterot sipansa Biblia jukʼamp sum uñtʼapjjäna.” (Sarnaqäwinakat yatjjatiri Juan Orts González)
Ukampisa, 1500 maranakaw Inquisición española sat organizacionajj kuna artï jaqenakajj parlapki uka arunakar janiw Bibliajj jaqokipasiñapäkiti ukat Biblias janirakiw jupanakan utjañapäkiti sasaw jarkʼapjjäna. Ukatwa España markan jan waltʼäwinakajj uka tiempon utjäna. Ukat uka jarkʼäwit 300 maranak janïr tukuykipanwa, jan ajjsartʼir yaqhep traductoranakajj yaqha markan español arur Biblia jaqokipasipkakïna, uka Biblianakjja jamasatwa España markar apantapjjäna. *
Kunjamtï uñjawayktanjja, España markan 500 maranakat 1500 maranakkamajj Diosan Arup uñisirinakajj kunaymanitwa chhaqtayañ munapjjäna. Ukampis Taqe Chʼamani Diosan arunakap janiw chhaqtayirjamäpkänti (Salmo 83:1; 94:20).
Latín, gótico, árabe ukat español arunakar Biblia jaqokipawayapkäna uka nayrïr traductoranakaw España markan 500 maranakat 1500 maranakkam Biblia utjañapatak yanaptʼapjjäna. Jichha tiempon utjki uka traductoranakajja, jupanakjamarakiw chʼamachasipjjaraki. Ukham chʼamachasipjjatap laykuw español jan ukajj castellano aru parlirinakajj oraqpachan Diosan Arup pachpa arupat liytʼapjje.
^ tʼaqa 10 Español, catalán, gallego ukat portugués.
^ tʼaqa 17 Jichhürunakanjja, 540 millón millón jaqenakaw español aru parlapjje.
^ tʼaqa 20 Jukʼamp yatjjatañatakejja, La Atalaya 1 de diciembre de 2011 sat revista uñjjattʼäta, pʼeqeñchäwipajj akawa: “El nombre divino y el legado de Alfonso de Zamora”.
^ tʼaqa 23 Jukʼamp yatjjatañatakejja, La Atalaya 1 de junio de 1996 sat revista uñjjattʼäta, pʼeqeñchäwipajj akawa: “Casiodoro de Reina y su lucha por tener la Biblia en español”.
