Uka arunakajja, jaqempi Oraqempejj jan pachpäpjjatapwa amuytʼayistu. Oraqenjja, waljaniw nacipjje ukhamarak jiwapjje. Ukampis Oraqenjja, jakañajj utjaskakïnwa. Jichhajj ukajj mayjtʼaskarakiwa.

‘Payïr Jachʼa Chʼajjwäwitjja, taqe kunas ratukiw pasawayjje’ sasaw yaqhepanakajj sapjje. Aka 70 maranakanjja, mä cheqat yaqha cheqar sarañ toqetsa, maynimp parltʼasiñ toqetsa, ciencia toqetsa kunaymaninak lurawayapjje. Taqe ukanakajja, qollqe apnaqañ toqet mayjtʼayawayiwa. Jichhürunjja, waljaniw sum jakasjjapjje, nayrajj janiw ukham jakasiñajj utjkänti. Ukhamarus aka Oraqen jaqenakajj jukʼampiw jiljjattawayi.

Ukampis taqe ukanak lurasajj jan waltʼäwinakajj utjarakiwa. “Jaqenakajj sintipuniw aka Oraq jan waltʼayapjje, ukat kunatï jakañatak wakiski ukanakjja, kuna ratus aynachtʼjjakispawa” sasaw yaqhep jaqenakajj sapjje. Yaqhep cientificonakajja, ‘kunanaktï jaqenakajj aka qhepa maranakan lurawayapki, ukanakaw Oraqerojj qʼal mayjtʼayawayi’ sasaw amuyapjjaraki.

Jaqenakaw Oraqe tʼunjapjjani sasaw Bibliajj qhanañchäna (Apocalipsis 11:18). Uka profeciajj ¿phoqasiskiti? ¿Kunapachkamas aka Oraqe tʼunjapjjani? Sinti jan walinak utjipanjja, ¿janit askichañjamäjjpachäni?

¿Oraqejj qʼala tukjatapuniti? Tiempojj jan walëjjatap laykojj kuna jan waltʼäwinakas utjani  uk yatiñajj chʼamäjjewa sasaw yaqhep cientificonakajj sapjje. Maysa toqetjja, mä akatjamat Oraqen kuna mayjtʼäwis utjaspa ukajj jukʼampi jan waltʼäwinak utjayaspa sasaw llakisipjjaraki.

Amuytʼañäni, Antártida occidental sat cheqanjja, uma chhullunkhanakajj walipuniw utji. Ukampis ‘aka Oraqtï juntʼuptaskakini ukhajja, uka chhullunkhanakajj qʼalapuniw umatatani’ sasaw yaqhepajj amuyapjje. ¿Kunatsa? Uka chhullunkhajj mä espejor uñtataw Intin qhanap alajjpachar kutsuyi. Ukampis chullurjjatap laykojj Intin qhanap kutsuyañat sipansa, jukʼampiw katoqe, ukhamatwa chhullunkhanakajj jukʼamp ratuki chullurjje. Ukajj jan walipuniwa, ukham chullurjjatap laykojja, jukʼampiw umajj qotanakan jiljjattaspa, walja jaqenakarurakiw jan walin uñjasiyaspa.

‘Oraqer yanaptʼañatakejj’ mä qawqha yanaptʼanak amtawayapjje. Maynïristi desarrollo sostenible satawa, ukarjamajj qollqe toqet jiltaskakiñataki, ukhamarak taqenin sum jakasipjjañapatakejj samanaru, oraqeru ni umaru jan mayjtʼayasaw ukanak lurasiñapa. Ukampis uka amtanakajj ¿phoqasiwayiti?

Maysa toqetjja, jaqenakajj kunatï Oraqen utjki ukanakjja, qʼal tukuntaski, janiw Oraq pachpajj waliptirjamäjjeti. ¿Kunas yanaptʼañatakejj lurasispa? Ecología toqet mä yatjjattʼat jaqejj akham sänwa: “Kunjamsa aka Oraqejj sum apnaqasispa uk janiw yatipkti” sasa. Biblianjja, ukhamarakwa qhanañchi. Ukan akham siwa: ‘Jaqejj janirakiw sarnaqäwipsa sum apnaqkaspati’ sasa (Jeremías 10:23).

Jaqenakajj aka Oraqjja qʼal tukjaski, ukampis Diosajj janiw ukhamak uñchʼukkaniti sasaw Bibliajj qhanañchi. Salmo 115:16 qellqatanjja, “jaqerusti oraq katuyi” sasaw qhanañchi. Cheqas aka Oraqejj Diosan mä regalopawa (Santiago 1:17). Ukhamajja, Oraqejj luraskäna ¿ukhakit suma jakasiñajj utjpachäna? Janiwa. Oraqpachajj kunja suma lurtʼatasa uk uñjasaw sum amuyastanjja.

Kunjamsa Diosajj wal chʼamachasisa aka Oraqe luräna ukjja Génesis qellqata sum qhanañchi. Akham siwa: “Aka oraqesti [qalltan] jan kunani chʼusakïnwa, taqe kunas mä chʼamakan phoqhantata umakamakirakïnwa” sasa. Cheqas umajj jakañatakejj wali wakiskiriwa (Génesis 1:2). Ukatsti “qhanajj utjpan” sasaw Diosajj sarakïna (Génesis 1:3). Amuyatajj Intin qhanapajja, atmósfera siski uka toqe mantasaw Oraqen qhantʼañ qalltpachäna. Ukjjarusti, waña oraqempi qotanakampiw uñstäna sasaw Bibliajj qhanañcharaki (Génesis 1:9, 10). Ukatsti, “Oraqenjja kunayman casta alinakaw achüna. Jathanak churir chʼojjñanaka, ukhamarak frutanak achuri qoqanaka” (Génesis 1:12). Ukhatpachwa kunatï jakañatak wakiski taqe ukanakajj qalltjjäna. ¿Kunatsa Diosajj ukham wal chʼamachaspachäna?

Isaías profetajj Diosat akham sänwa: ‘Aka oraqe lurki saytʼaykaraki, khititejj uchki jan chʼusäñapataki, jan ukasti jaqenïñapatakiw luri’ sasa (Isaías 45:18). Kunjamtï amuyktanjja, Diosajj wiñayataki jaqenakajj aka Oraqen jakasipjjañapwa muni.

Ukampis jaqenakajja, Diosan aka suma regalop janiw sum apnaqapkiti, niyaw qʼal tukjasipki. Ukhamarus Diosan amtapajj janiw mayjtʼkiti. Nayra tiempon mä qellqerejj akham sänwa: “Janiw Diosajj jiwir jaqenakjamäkiti. Janiw kʼariskiti ni yaqha amuyunïkisa. Kunapachatejj jupajj kunsa arsu ukkhajj lurapuniwa” sasa (Números 23:19). Diosajj janiw aka Oraqjja jaqenakan tʼunjapjjañap ukhamak jaytkaniti, antisas ‘aka oraqe tʼunjirinakarojja, tʼunjaniwa’ (Apocalipsis 11:18).

Wali Uñtʼat Arstʼäwipanjja, Jesusajj akham sänwa: ‘Kusisiñanïpjjew llampʼu chuymaninakajja, jupanakaw oraqe katoqapjjani’ sasa (Mateo 5:5). Pachpa arstʼäwinjja, kuna toqnamsa Oraqe askichani uk Jesusajj sum qhanañchäna. Arkirinakaparojj akham mayisipjjañap yatichäna: “[Reinomampisti] apnaqapjjeta. Munañamasti luratäpan akapachanjja, kunjämatï alajjpachana luratäki ukhama” sasa. Ukhamajj Diosan Reinopakiw  taqe kuntï Diosajj aka Oraqetak amtkäna ukanak phoqani (Mateo 6:10).

Diosan Reinopaw aka Oraqen walja askinak apanini. Jupajj akham siwa: “Uñjam, nayajj taqe kunwa machaqat lur[ä]” sasa (Apocalipsis 21:5). Ukhamajj ¿aka Oraq lantejj yaqha Oraqti Diosajj lurani? Janiwa. Cheqas janiw Oraqejj juchanïkiti, antisas jichhürunakan utjki uka gobiernonakaw ‘oraqe tʼunjasipki’, jupanakarakiw kuna jan waltʼäwintï jakastan ukanakat juchanïpjje. Diosajj jupanakarojj tukjaniwa sasaw Bibliajj qhanañchi, ukat Diosan Reinopaw apnaqjjani, ukajj ‘machaq alajjpachawa’, ukasti mä ‘machaq oraqeruw’ apnaqjjani, mä arunjja, suma istʼasir jaqenakaru (Apocalipsis 21:1).

Kuna jan walinaktï jaqenakajj Oraqeru lurawayapki uk tukjañatakejja, Diosajj kunatï aka Oraqen utjki ukanak askichaniwa. Kunjamsa uk lurani uka toqetjja, Salmo qellqerejj akham siwa: “Jumaw akapach oraq uñjasktajja” sasa. Ukhamajj jallusa, lupisa sumäjjani ukat jukʼampis Diosan bendicionap katoqañäni ukhajja, aka Oraqejj mä paraisöjjaniwa, manqʼañanakasa walirakiw utjani (Salmo 65:9-13).

Pyarelal Nayyar sat chachajja, hinduísmo religionan pʼeqtʼirin Mohandas Gandhi chachan secretariopanwa, jupajj aka arunakwa jefepat amtasïna: “Oraqenjja, kuntï jaqenakajj jakañatak wakiski ukanak churañatakejj utjiwa, ukampis jupanakatakik taqe kuns muniri jaqenakatakejj janiw utjkiti” sasa. Diosan Reinopajja, kunatï Oraqen jan waltʼäwinak utjayki ukwa nayraqat chhaqtayani. Ukatakejj jaqenakan amtapwa mayjtʼayani. Diosan Reinop apnaqjjani ukhajja, jaqenakajj janiw jaqe masiparus ni Oraqerus jan walinak lurkaniti sasaw Isaías profetajj arsüna (Isaías 11:9). Jichhürunakanjja, millón millón taqe kasta jaqenakaw Diosan kamachinakap yateqasipki. Diosaru, jaqe masiparu munasiña, yuspärasirïña, kunanaktï aka Oraqen utjki ukanak sum uñjaña ukat kunjamtï Diosajj munki ukarjam jakasiñ yateqasipki. Jupanakajj aka Oraqen mä paraison jakasiñatakiw wakichtʼasisipki (Eclesiastés 12:13; Mateo 22:37-39; Colosenses 3:15).

Taqe kun luratäjjana ukhajja, Bibliajj akham qhanañchi: “Diosasti taqe kuntejj lurkän ukanakan sumätapwa uñjäna” sasa (Génesis 1:31). Aka suma Oraqejj janiw tʼunjaskaniti. Kunay aka Oraqempejj paschini ukajj khuyapayasiri Jehová Diosan amparapankiwa. Ukhamarus Jupajj akham sarakistuwa: “Aski jaqenakajj oraq katoqapjjani, wiñayatakiw ukan jakapjjarakini” sasa (Salmo 37:29). Ukhamajj aka Oraqenjja, aski jaqenakaw jakasipjjani, ¿jumajj uka taypinkarakïtati?