WALJA religionanakat 800 jila waynanakaruw mä kutejj ¿Jesusajj oracionanakam istʼpachaw sasmati? sasin jisktʼasïna. Sapa patakat 60 jilaw jïsa, istʼiwa sasin sapjjäna, ukampis mä waynajja, uka jisktʼan Jesús siskän uka lantejja, “Dios” sasaw qellqtʼäna.

¿Jumajj kamsasmasa? ¿Khitirus orasiñasa? ¿Diosaruti jan ukajj Jesusarucha? * Uka jisktʼanakar qhanañchañatakejja, kunsa Jesusajj arkirinakapar yatichäna uk yatjjañäni.

Jesusajj Diosaruw mayisipjjäta sasaw yatichäna, ukat jupa pachpasa Diosaruw mayisirakirïna.

¿KUNSA YATICHÄNA? Mä kutejja, akham sasaw mä arkiripajj Jesusar säna: “Tata, oración lurañay yatichtʼapjjeta” sasa. Uk satajja, Jesusajj akham sänwa: “Orapkäta ukkhasti sapjjam: ‘Awkejja’” sasa (Lucas 11:1, 2). Mä qawqha tiempotjja, oracionan kunanaksa mayisiñasa uka toqet parlkasajja, akham sasaw Wali Uñtʼat Arstʼäwipan Jesusajj säna: “Mayisirakim Awkima[ru]” sasa. Ukatsti “Awkimajj janïr arsupktas ukkhaw yatjje kuntï jumanakajj mayipkäta ukjja” sasaw sarakïna (Mateo 6:6, 8). Ukat janïr jiwayapkäna uka arumajja, akham sasaw arkirinakapar sarakïna: “Awkiru kuntejj nayan sutejjaru mayipkäta ukjja churapjjätamwa” sasa (Juan 16:23). Kunjamtï uñjktanjja, Jesusajj Awkejjaruw orapjjäta, mä arunjja, Jehová Diosaruw orapjjäta sasaw walja kuti yatichäna, cheqas Diosajj Awkisarakiwa (Juan 20:17).

¿KUNSA LURÄNA? Jesús pachpaw Diosar akham sasin orasïna: “Yupaychsmaw Awkiy, alajjpachansa ukhamarak akapachansa Tatitupa” sasa (Lucas 10:21). Ukat yaqha urojja, alajjpacha uñtasajj akham säna: “Awkiy, yuspagarsmawa nayar istʼatamata” sasa (Juan 11:41). Ukat janïr jiwkasajj akham sarakïnwa: ‘¡Awkiy, amparamaruw ajayuj-jja katuyasjjsma!’ sasa (Lucas 23:46). Jiwasajj Jesusat yateqasisajja, ‘alajjpacha akapacha’ lurir Jehová Diosaruw orañasa (Mateo 11:25; 26:41, 42; 1 Juan 2:6). Nayrïr cristianonakajja, ukhamarakiw mayisipjjerïna.

Jesusajj alajjpachar sarjjäna uka qhepatjja, arkirinakapajj autoridadanakan arknaqataw uñjasjjapjjäna (Hechos 4:18). Ukhamïpansti yanaptʼa mayiñatakiw orasipjjäna. ¿Khitirus oración mayisipjjäna? Ukanakar saykatañatak chʼama churañapatakejja, “taqenis mayakiw Diosar oracionan mayi[sipjjäna]” Jesusan sutipjjaru (Hechos 4:24, 30). Ukhamajja, Jesusan ewjjtʼaparjamaw Diosaru mayisipjjäna.

Mä qawqha maranak pasatatjja, apóstol Pablojj akham sasaw qellqäna: “Jesucristo Tatitusan Dios Awkiparojj yuspagarapjjapuntwa jumanakatak Diosat maykasinjja” sasa (Colosenses 1:3). Ukat cristiano jilatanakaparojja, “Dios Awkirojj taqe kunatsa yuspagarapjjapunim, Tatit Jesucristosan sutiparu” sasaw ewjjtʼarakïna  (Efesios 5:20). Yaqha kutinjja, “Dios Awkir” Jesusan sutipjjaru mayisipjjam sasaw sarakïna (Colosenses 3:17).

Oraskasajja, nayrïr cristianonakjamaw kuntï Jesusajj ewjjtʼkäna ukarjam lurañasa, ukhamatwa Jesusar munasitas uñachtʼayarakiñäni (Juan 14:15). Biblia qellqerinakat maynïrejja, akham sänwa: “Nayajj Tatituruw munasta, mayisitajjar istʼatap layku [...], wiñayapuniw jupar [mayisï]” sasa (Salmo 116:1, 2). Jiwasatï Jehová Dios saparuki mayisiñäni ukhajja, ukhamakiw sañäni. *