Paddington cheqanwa nasta, ukanjja walja jaqenakaw jakapjje, uka cheqasti Londres (Inglaterra) markankiwa. Ukanwa mamajampi kimsa jilïr kullakanakajampejj jakasipjjayäta. Tatajajja, alcohol umirïtap laykojj janiw nanakamp chik jakkänti, awisakiw utar jutiri.

Wawäkasajj Diosar sapa aruma orañwa mamajajj yatichitäna. Mä jiskʼa Bibliaw utjitäna, ukajj Salmos libronikïnwa, ukhamasti cantañatakejj nayaw tonadap uchirïta. “Mä urojj janiw qharürojj utj-jjaniti” siski uka arunakwa mä librojan liytʼayäta, uka arunakjja janiw armirjamakayätti. Uka arunak amtasajj arum paqaraw jutïr urunakat lupʼirïta, janiw ikirïktsa. ‘¿Jakañajj akakïpachati? ¿Kunatakis akankpachäta?’ sasaw lupʼirïta. Janiw jiwañ munkayätti.

Kunanakatï jan yatiñjamäki ukanak wal yatiñ munirïta, ukatakejj jiwatanakaruw parlirïta, cementerionakaruw yateqer masinakajampi sarapjjerïta, ajjsarkañ peliculanaksa uñchʼukipjjarakirïtwa. Ukanakajj sumäkaspasa ajjsarkañäkaspasa, ukhamwa amigonakajampejj amuyapjjerïta.

Tunka maranikïskayäta ukhajja, wali kutkatasirëjjayätwa. Cigarro fumañ yateqasajj jankʼakiw uka vicior yatintjjayäta. Tiempompejja marihuana kun fumjjayäta. 11 maranirojj alcohol umañwa qalltarakiyäta. Musicanak ischʼukiñasa thoqoñasa, wal gustarakitäna, ukatwa fiestanakaru discotecanakar sarirïta. Jan uñjayasiñatakejj arumanakaw jamasat sarirïta, alwasti janïr inti jalsunkipanwa kuttʼanjjerïta. Qhepürojj wali qarjatäsajj janiw escuelar sarjjerïtti, sapa kutiw ukham lurirïta. Escuelar sarirïkta ukhasti, samartʼañajj utjirïki ukhaw alcohol sapakut umjjattʼirïta.

Escuela niya tukuyañampëjjayäta ukhajja, notanakajajj janipuniw walïkänti. Kunatsa ukham sarnaqayäta ukjja mamajajj janiw yatkänti, notanakaj uñjjatäna ukhajja chuym wal ustʼayasïna, ukatwa jupamp toqesisajj utat sarjjayäta. Mä qhawqha tiempojja Tony uñtʼatajampiw qheparayäta, jupasti lunthata, droganak aljiri, wali nuwasiri phiru jaqet uñtʼatänwa. Usuriptasajj 16 maraniruw wawanëjjayäta.

Tawaqökasin wawani uñjasipki uka warminakatakejj mä utaw utjäna, ukanwa autoridadanakajj mä cuarto churapjjetäna. Ukanjja Jehová Diosan pä Testigopaw mä qhawqha warminakarojj Bibliat yatichañatak visitapjjäna. Mä urojja, Bibliat yatjjatasipkäna ukaruw sarta, ukhamat pantjasipjjatap uñachtʼayañataki. Ukampis Testigonakajj wali pacienciampiw jisktʼanakajar Bibliampi wali sum qhanañchapjjetäna. Wali munasiñampiw uñjapjjetäna, ukatwa jupanakampi Bibliat yateqañ qalltayäta.

Jiskʼaskayäta ukhajj jiwañ wal ajjsarayäta. Ukampis jiwatanakajj jaktanipjjaniwa sasin Jesusajj yatichkäna ukwa yateqayäta, ukaw chuymajar wal purtʼitäna (Juan 5:28, 29). Diosajj nayat llakisitapsa yateqarakiyätwa (1 Pedro 5:7). Jeremías 29:11 qellqatan akham siwa: “Nayasti yatiraktwa kuna amtäwinakatejj jumanakataki utjkitu ukanakjja, uka amtäwinakasti jumanakan askinakamatakiwa, janiw jumanakan jan waltʼapjjañanakamatakïkiti, ukhamat qhepa urunakanjja wali suma jakasipjjañanakamataki, suytʼañanakansa phoqhantataraki. Naya Tatituw ukjja arsta” sasa. Jutïr urunjja mä suma Paraisonwa wiñayatak jakasirista, ukwa yateqayäta (Salmo 37:29).

Jehová Diosan Testigonakapajj cheqapuniw munasipjjetäna. Tantachäwinakapar nayrïr kutin sarayäta ukhajja, ukankañajj wali sumapunïnwa, taqeniw wali munasiripjjäna (Juan 13:34, 35). Yaqha iglesianakan janiw ukhamäkänti. Testigonakajj wali sumwa katoqtʼapjjetäna. Jan wali sarnaqer tawaqökchiyätsa, nayamp parltʼañatakejj tiempsa apstʼasipjjänwa, wali sum uñjapjjetäna ukat yanaptʼapjjarakitäna. Mä suma familia taypinkkiristsa ukhamänwa.

Bibliat yateqasajj Diosatakjam sarnaqañwa munayäta, ukatakejj jan walinak apanukuñajänwa. Cigarro fumañ jaytañajj chʼamakïnwa, yaqhep musicanakajj fumañatakiw chʼamañchitäna, ukatwa uka musicanak jan ischʼukjjayätti. Alcohol jan umjjañatakejja, janiw fiestanakarusa discotecanakarus sarjjayätti. Antisas suma amigonak thaqañatakiw chʼamachasiyäta (Proverbios 13:20).

Ukañkamasti, Tony uñtʼatajajj Jehová Diosan Testigonakapampiw yatjjataskarakitayna. Niyakejjay jisktʼanakaparojj Bibliampi qhanañchapjjchïnjja, yateqkäna ukajj jupatak cheqänwa. Janiw nayrjam sarnaqjjänti, nuwasir amigonakapampis janiw chikachasjjänti, janirakiw lunthatasjjänsa ni fumjjarakïnsa. Jehová Diosatakjam sarnaqañatakejj panpachaniw jan walinak apanukupjjañajäna, ukhamat wawajarus sum uywañataki. Nanakajj 1982 maranwa casarasjjapjjayäta.

Nayra jan wali sarnaqäwij apanukuñatakejja, kawkïr experiencianakas yanaptʼitaspa ukanakwa Yatiyañataki ukhamarak ¡Despertad! * revistanakan thaqerïta. Uka experiencianakajj walpun yanaptʼawayitu. Jehová Diosarus ‘yanaptʼakita, janikiy jaytistati’ sasaw mayisirïta. Tony esposojampejja julio, 1982 maranwa Jehová Diosan Testigopjam bautisasjjapjjayäta.

Jehová Diosar uñtʼañaw jiwañat qhespiyawayitu. Jan walinakansa esposojampejj uñjasipkchiyätjja Diosaw yanaptʼawayapjjetu, ukhamajj Jupar confiyañwa yateqawayapjjta. Jehová Diosajj familiajar yanaptʼapunïnwa (Salmo 55:22).

Wawanakajar Jehová Diosar uñtʼapjjañapatak yanaptʼasajj wal kusisiyäta. Jichhajja wawanakajan wawanakapajj ukhamarakiw Diosar uñtʼañatak chʼamachasisipki, ukajj walwa kusisiyarakitu.

Nayrajja, arum paqaraw jiwañata jutïr urunakat lupʼisajj jan ikirïkti, jichhasti janiw ukhamäjjeti. Tony esposojampejj jan tiemponiw tamanak tumptʼirejj sapa semana sarapjjta, ukhamat Jehová Diosan markapankirinakar chʼamañchtʼañataki. Jilat kullakanakampejj Diosar uñtʼañ munir jaqenakaruw Bibliat yatichir sarapjjta. Uka jaqenakatï Jesusar iyawsapjjani ukhajja, wiñay jakañsa katoqapjjarakispawa.