Puerto Limón (Costa Rica) sat markana ukat uka jakʼanakanwa jilsuwayta. Awk taykajajj kimsaqallqo wawanïpjjänwa, nayajj niya qhepïr wawätwa. Kimsaqallqo maranïkayäta ukhaw awkijajj jiwawayjje, ukhamajj taykajakiw nanakar uywawayapjjetu.

Jiskʼatpachaw béisbol deporte anatañ walpun munayäta, ukaw nayatakejj nayrankäna. Qʼajjo waynäjjasajj mä equiporuw anatañatak mantayäta. 20 maranïkayäta ukhajja, suma anatirinak thaqeri mä jaqew Nicaragua markankiri wali uñtʼat mä equipon anatañatak invittʼitäna. Ukampis mamitajan wali usutätapat janiw Nicaragua markar sarjjayätti. Tiempompejja, suma anatirinak thaqeri yaqha jaqerakiw Costa Rica markajankiri equipon anatañatak invittʼitäna, jiskʼa equiponakan anatapkäna ukanakaw uka equiponkapjjäna. Iyaw sasaw uka jaqer sista. 1949 marata 1952 marakamaw uka equipon anatayäta, Cuba, México, Nicaragua uka markanakaruw anatir sarapjjayäta. Nayajj wali suma anatiriyätwa. 17 partidonakanjja jan pantjasisaw anatawayta. Kunjamsa jaqenakajj nayan sutij wal arnaqapjjäna uk istʼañajj wali sumapunïnwa.

Ukampis jukʼat jukʼatwa qʼañu juchanakan sarnaqañ qalltjjayäta. Mä tawaqompis uñtʼasiskchiyätjja, yaqha warminakampiw sarnaqarakiyäta. Alcoholsa wal umayäta. Mä urojj walpun machantasta, qhepärmant sartjjasajj janiw utajar kunjam puritajsa amtaskti. Dominó sat anatañansa qollqet apostasaw anatirïta, lotería billetenaksa wal alarakiyäta.

Uka tiemponwa mamajajj Jehová Diosan Testigopjam bautisasïna. Jupajj Biblian yatichäwinakapar iyawsañajatakis chʼamachaskchïnjja, inamayakïnwa. Nayatakejj béisbol deporte anatañakiw nayrankäna. Uka deporte sum yatsuñ laykojja, manqʼañ horasas janiw manqʼat awtjirïkituti. Béisbol anatañakiw chuymajankaskäna.

Nayajj 29 maranïkayäta ukhajja, mä partidon pelot katthapiñ munasaw wal usuchjasiwayta. Waliptkchiyätsa, janiw mä equipon anatirjamäjjayätti. Ukhaman uñjaskasas utaj jakʼanwa béisbol anatiri mä equipor yanaptʼaskakiyäta.

Khä 1957 maranjja, Testigonakan mä jachʼa tantachäwiparuw sarawayta, ukajj kawkjantï nayajj anatkayäta uka pachpa estadionanwa apasïna. Ukanjja, jilat kullakanakajj wali respetompiw uñjasipjjäna, janipuniw ukham respetasir jaqenakar béisbol partidonakan uñjirïkti. Uk uñjañaw Testigonakamp Bibliat yatjjatañatakisa tantachäwinakapar sarañatakis chʼamañchtʼawayitu.

Kuntï Bibliat yateqkayäta ukajj chuymajarupuniw purtʼitäna. Sañäni, qhepa urunakanjja, aka oraqpachanwa discipulonakajajj Diosan Reinopat yatiyapjjani sasaw Jesusajj säna (Mateo 24:14). Cheqpach cristianonakasa, jan qollq mayisakiw Diosan arunakap yatiyapjjañapäna. Jesusajj akham sänwa: “Inakiw katoqapjjtajja, inakiraki churapjjam” sasa (Mateo 10:8).

Bibliat yatjjatkasajja, kunjamsa Testigonakajj Biblian yatichäwinakaparjam sarnaqapjjäna ukwa uñjayäta. Jupanakajj Diosan arunakap oraqpachan yatiyañatakiw wal chʼamachasipjjäna, ukajj wali muspharkañänwa. Jesusajj maynit maynikam yanaptʼasiñ arkirinakapar yatichkäna ukarjamaw jupanakajj sarnaqapjjarakïna. Ukatwa Jesusan arunakapar istʼasajj Jehová Diosan Testigopjam bautisasiñ amtayäta. Jupajj akham sänwa: “Jutam, nayar arkita” sasa (Marcos 10:21).

Ukampis janiw taqe kunas facilapunïkänti. Walja maranakaw “suerte churir numerojar” wal confiyayäta, ukatwa sapa semanajj lotería billetenaksa alayäta. ‘Suerte churir diosar’ yupaychirinakasa jupanakatakiki taqe kuns munirinakasa, janiw Dios nayraqatan askit uñjatäpkiti sasaw Biblian yateqayäta (Isaías 65:11, NM; Colosenses 3:5). Ukatwa ukanak jaytañ amtayäta. Lotería billetenak alañ jaytjjayäta uka qhepa domingojja, nayar “suerte churir numerojapuniw” premiat mistüna. Uk yatisajja, nayar uñtʼir jaqenakajj kunatsa aka semanajj jan anatawayta sasaw wal larusipjjetäna. Ukat wasitat anatañajatakiw wal jariyapjjetäna, ukampis janiw jupanakar istʼkayätti. Janirakiw mayampsa qollqet apostas anatawaykti.

Jehová Diosan Testigonakapan mä jachʼa tantachäwipan bautisaskayäta uka uruw wasitat yantʼat uñjasta (Efesios 4:24). Hotelar purisajja, nayra uñtʼatajaw cuartoj punkun suyaskitütu. Jupajj “Sammy, mä rat kʼuchirtʼaskañäni” sasaw sitäna. Ukspachaw “¡janiwa!” sasin sista. Jichhajj Biblian yatichäwinakaparjamaw sarnaqjjta sasaw wasitat sayäta (1 Corintios 6:18). “¡Kunjama!” sasaw jupajj sitäna. Kuntï Bibliajj maynimp ikintasiñat yatichki ukarojj janiw yäqkänti, jupamp wasitampi mistuñajatakis walpun arjjayitäna. Nayajj jupar jan istʼasaw cuartojar mantas punk llawkatasiyäta. 1958 maran Testigor tukuwayta ukhat jichhakamajja, janipuniw wasitat jan walinak lurawaykti, ukaw walpun kusisiyitu.

Biblian yatichäwinakaparjama sarnaqatajat kuna bendicionanaksa katoqawayta, ukanak taqpach qellqtʼañ munirista ukhajj mä libros pisïspawa. Jichhajj cheqpach amigonakaw utjitu, jakäwijas janiw inamayäkiti, kusisit jakasirakta.

Jichhakamas béisbol deporte anataskaktwa, ukampis ukajj janiw nayatakejj nayrankjjeti. Béisbol anatasajj qollqeni wali uñtʼata ukhamäyätwa, ukampis ukajj janiw wiñayatakïkiti. Jehová Diosampi jilat kullakanakamp sum apasiñaw wiñayatakejja. Bibliajj akham siwa: “Akapachasa munañanakapasa tukusiskiwa, ukampis khititejj Diosan munañap lurki ukajja wiñayatakiw jakani” sasa (1 Juan 2:17). Jichhajj Jehová Diosar serviña ukat markapankañaw nayatakejj nayranki. Janiw kunas ukat sipan jukʼamp sumajj utjkaspati.