Uka yatichäwinjja, kunatï taqe jaqenakatakisa, taqe angelanakatakis importantëki uka toqetwa yatjjataskayätanjja, ukajj Jehová Diosan sutip jachʼañchañawa. Jehová Diosan taqe kunjjar munañanïtapajja, mä arun kunatsa jupan apnaqäwipajj jukʼamp sumajja ukajja, kunatï taqe jaqenakatakisa taqe angelanakatakis wali importantëki ukat mä partekiwa. Jehová Diosarojj taqpach chuymampit serviñäni janicha ukajja, kunatï wali importantëki ukat mä partekirakiwa.

Ukampis ¿kunatsa Jehová Diosan sutipampi sutip jachʼañchañampiw taqe kunat sipans wali importante sasin qhanañchasi? Kimsa toqet uk amuytʼañäni.

Maya, Edén jardinanwa Supayajj Jehová Diosan sutip qʼañuchäna, jan ukajj jan wali Diosäkaspas ukham uñjayäna. Kuntï Supayajj Eva warmir jisktʼkäna ukampejja, Diosajj janis wajjtʼasirïkaspa, Adanampir Evampirojj jan phoqañjamäki ukanaks maykaspa ukhamwa sañ munäna. Ukatjja, kuntï Jehová Diosajj siskäna uka contraw Supayajj saytʼasïna, ukhamatwa Diosarojj kʼarit uñjayäna. Ukham lurasinjja, Jehová Diosaruw jan walit uñjayäna. Uka horasanwa ‘Diablor’ tukjjäna, ukajj “kʼarintiri” sañ muni (Juan 8:44). Niyakejjay Evajj Supayan kʼari arunakapar creychïnjja, Diosarojj janiw istʼjjänti, ukhamatwa Diosan taqe kunjjar munañanïtap contrajj saytʼäna (Gén. 3:1-6). Jichhürunakanjja Supayajj Diosan sutip contrajj kʼarinak parlaskakiwa, kʼarinak parlasinjja Jehová Diosajj janis suma Diosäkaspa ukham uñjayi. Ukatwa uka kʼarinak creyirinakajj Diosar jan istʼañ munjjapjjaspati. Jehová Diosan servirinakapatakejja, kunjamsa Jehová Diosan sutip contrajj kʼarinak parlapjje uk uñjañajj sinti jan walipuniwa. Ukatwa aka mundon kunayman tʼaqesiñanakasa jan waltʼañanakas utji.

Paya, taqe luratanakapar yanaptʼañatakejja, Jehová Diosajj sutip arjjataniwa, sum qʼomacharakini. Ukaw jupatakejj taqe kunat sipans jukʼamp importantejja. Ukatwa akham saraki: “Cheqpachans jachʼa sutij santoruw tukuyäjja” sasa (Ezeq. 36:23). Jesusajj orasiñ yatichkäna ukhajja, akham sarakïnwa: “Sutimajj jachʼañchatäpan” sasa. Ukham sasinjja, Jehová Diosan servirinakapajj orasipki ukhajj kunas jupanakatakejj taqe kunat sipans jukʼamp importantëñapa ukwa qhanstayaskäna (Mat. 6:9). Jehová Diosan sutip jachʼañchañajj kunja importantesa ukajj walja kutiw Biblian qhanañchasi. Ukanakat yaqhepajj akanakawa: “Jehová Diosan musparkañ sutip jachʼañchapjjam” (1 Crón. 16:29; Sal. 96:8). “Jachʼa sutipatakejj alabanzanak cantapjjam” (Sal. 66:2). “Wiñayatakiw sutim jachʼañchäjja” (Sal. 86:12). Mä kutejja, Jesusajj Jerusalenankir templonkaskäna ukhaw Jehová Diosar akham säna: “Awkiy, sutim jachʼañcham” sasa. Jehová Diosasti akham sasaw alajjpachat jaysanirakïna: “Nayajj sutij jachʼañchtwa, wasitats jachʼañchaskakïwa” sasa (Juan 12:28). a

Kimsa, sutipajj wiñayatak jachʼañchasispa ukaw Jehová Diosan amtapajja. Kunapachatï Cristojj Waranqa Maranak apnaqañ tukuyjjani, qhep qhepa yantʼas pasjjarakini ukhajj Jehová Diosan sutipajj kunja importantet uñjatänisa uk amuytʼañäni. ¿Jehová Diosan sutipajj jachʼañchaskani ukhajj kunsa taqe jaqenakasa taqe angelanakas amuyapjjani?  Uk yatiñatakejja, jaqenakan Diosar taqpach chuymamp servipjjatapampita, Jehová Diosan taqe kunjjar munañanïtapampit amuytʼaskakiñäni. Mä toqetjja, jaqenakan Diosar taqpach chuymamp servipjjatapajj janiw mayampis yantʼasjjaniti. ¿Kunatsa ukham sistanjja? Kuna laykutejj perfectöjjapjjaniwa, qhep qhepa yantʼsa pasapjjarakiniwa. Wiñayatakiw jakasjjapjjani. ¿Jehová Diosan taqe kunjjar munañanïtapat kamsaraksnasa? Janiw khitis uka toqet payachasjjaniti, ni tʼaqanoqtañas utjjarakiniti. ¿Kunatsa ukham sistanjja? Kuna laykutejj Jehová Diosajj suma apnaqeriti janicha ukajj janiw mayamp uñachtʼayañajj wakisjjaniti. Taqe jaqenakasa taqe angelanakasa, taqe chuymaw Jehová Diosan gobiernopar istʼapjjani. ¿Jehová Diosan sutipajj kunjam uñjatäjjanisa?

Sutipajj phoqatpach jachʼañchatäjjaniwa, janirakiw khitis Jehová Diosat kʼarinak parljjaniti. Sutipajj alajjpachankiri aka oraqenkir servirinakapatakejj taqe kunat sipans wali importantëskakiniwa. ¿Kunatsa ukham sistanjja? Kuna laykutejj Jehová Diosajj musparkañanak luraskakiniwa. Niyakejjay Jesusajj humilde chuymanïtapat taqpach autoridad Awkipar kuttʼayjjchinejja, ‘Diosajj taqeniruw apnaqjjani’ (1 Cor. 15:28). Ukatjja, aka oraqen jakirinakajj kusisitaw ‘Diosan wawanakapjamajj libre jakapjjarakini’ (Rom. 8:21). Jehová Diosajj alajjpachankiri aka oraqenkiri wawanakapampi mayachtʼat mä familianïñ amtkäna ukajja, phoqatpachaw phoqasini (Efes. 1:10).

Taqe ukanakajj pasjjani ukhajj ¿kunsa alajjpachansa aka oraqensa Jehová Diosan familiapajj lurani? Taqeniw Jehová Diosan suma sutip taqe chuym jachʼañchasipkakini. Salmonak qellqerejj akham sasaw Diosan amuytʼayatajj qellqäna: “Jehová Diosajj jachʼañchatäpan […]. Jachʼa sutipajj wiñayatak jachʼañchatäpan” sasa (Sal. 72:18, 19). Kuna razonanakatsa Jehová Diosan sutipajj jachʼañchasiñapa ukanakat wiñayaw yateqarakiñäni.

Jehová Diosan sutipajja, jupajj kunjam Diosas uk taqpachwa uñachtʼayi. Ukatwa sutipat amuytʼktan ukhajj kunja munasirisa uk amtaraktanjja (1 Juan 4:8). Ak amtapuniñäniwa, Jehová Diosajj munasiñatwa lurawayistu, munasiñatwa juchampit jiwañampit kutsuyistu, munasiñatwa cheqapar uñjir gobernantëtap uñachtʼayaraki. Kunjamsa Jehová Diosajj taqe luratanakapar wiñayatak munasiñamp uñjani uks uñjaskakiñäniwa. Wiñayans wiñayapatakiw alajjpachankir Awkisar jukʼamp jakʼachasiñatakisa, suma sutipar alabanzanak cantañatakis razonanakajj utjistani (Sal. 73:28).