SUMA ORAQEN jakir hebreonakatakejja, oraq qholliñampi satañampiw marajj qalltäna, jichha tiempotakejj septiembre phajjsit octubre phajjsikamäspawa.

Phajjsejj 29 jan ukajj 30 urunakaw uñsti, ukarjamaw mä phajjsejj qhawqha urunakanïnisa uk calcultʼapjjerïna. Intit amuytʼasaw mä marajj qhawqha phajjsinakanïnisa uk calcultʼapjjarakirïna. Ukampis phajjsirjam apsut 12 phajjsinakan mä marajja, intirjam apsut mä marat sipans wali jukʼakiwa. Phajjsirjam apsut marampi intirjam apsut marampi igualakïñapatakejj ¿kunas lurasïna? Mä qhawqha urunakampiw yaptʼasirïna, jan ukajj sapa mä qhawqha maranakatwa mä phajjsimpi yaptʼasirïna. Inas janïr yaqha mara qalltkipan uk lurapjjerïchïna. Ukhamatwa calendariojj satañ tiempompi cosecha tiempompi igualakëjjerïna.

Moisesan urunakapanjja, sagrado marajj abib (jan ukajj nisán) phajjsiw qalltañapa sasaw Jehová Diosajj markapar säna. Jichhürunakanjja, uka phajjsinakajj marzo phajjsit abril phajjsikamäspawa (Éx. 12:2; 13:4). Uka phajjsinjja, israelitanakajj mä fiesta amtapjjerïna, cebada cosechanakapat nayrïr achunakwa Jehová Diosar loqtañatakejj apanipjjerïna (Éx. 23:15, 16).

Historia toqet yatjjatat Emil Schürer jaqejj akham siwa: “Sapa mä qhawqha maranakat mä phajjsimpi yaptʼañatakejj akarjamaw lurasïna: Pascua fiestajja, phajjsejj urtʼankäna ukhaw Nisán (14 de Nisán) phajjsin apasiñapäna, primavera tiempon arumas urus 12 horanakanïki uka qheparuw waktʼañaparakïna […]. Ukampis mara tukuyarutï phajjsinakajj minusäjjchïna, Pascuajj primavera phajjsin urus arumas 12 horanakanïki uka qhepar waktʼaspäna ukhajja, mä phajjsimpiw Nisán phajjsi nayraqatar yaptʼasirïna” sasa (Historia del pueblo judío en tiempos de Jesús 175 a.C. - 135 d.C., traducción de J. Cosgaya y A. Piñero).

Jehová Diosan Testigonakapajja, parlaniwayktan ukarjamaw Tatitun Cenapajj kuna fechankanisa uk calculapjjta. Tatitun Cenapajj marzo ukat abril phajjsinakanwa apasi, calendario hebreo ukarjamajj 14 de nisán ukaruw waktʼi. Kuna fechansa Jesusan jiwäwipajj amtasini ukajj janïräkipanwa oraqpachankir congregacionanakar apayasi. a

Ukampis kunapachas mä phajjsejj tukuyi, kunapachas qalltaraki uk ¿kunjamsa hebreonakajj yatipjjäna? Jichhürunakanjja, mä calendario uñjjattʼasasa jan ukajj celular uñjjattʼasas facilakiw yatsna. Ukampis Bibliajj qellqaskäna uka tiemponakan janiw faciläkänti.

Noé chachan tiempopanjja, sapa phajjsejj 30 urunakanïnwa (Gén. 7:11, 24; 8:3, 4). Qhepat calendario hebreo utj-jjäna ukhajja, janiw taqpach phajjsinakajj 30 urunakanëjjänti. Phajjsejj uñstankäna ukhaw mä phajjsejj jakhuñ qalltasïna, mä arunjja pasawayjje uka phajjsit 29 jan ukajj 30 urunakajj saraqjjäna ukhaw jakhuñ qalltasïna.

Mä kutejja, Davidampi Jonatanampejj akham sapjjänwa: “Qharürojj machaq phajjsi[wa]” sasa. Uka arunakampejj mä machaq phajjsiw qalltani sañwa munasipkäna (1 Sam. 20:5, 18). Amuyatajj khä tunka waranqa (a.C.) maranakanjja, janïräkipanwa phajjsinakajj calculasjjäna. ¿Kunjamsa israelitanakajj mä machaq phajjsin qalltatap yatipjjäna? Misná sat qellqatanwa, mä arunjja judionakan costumbrenakapampit leyinakapampit parlir mä qellqataw uka toqet qhanañchistu. Judionakajj Babiloniat kuttʼanjjapjjäna ukhajja, Sanedrinankirinakajja, mä arunjja judionakan jachʼa tribunalapankirinakajja paqallqo phajjsinakanwa wali alwat 30 urun tantachasipjjerïna, ukhamat jutkani uka phajjsejj kunapachas qalltani uk amtañataki. Ukampis ¿kunjamsa uk lurapjjerïna?

Mä qhawqha chachanakaruw Jerusalén jakʼankir alto cheqanakar khitapjjerïna, ukhamat arumajj alajjpach uñchʼukipjjañapataki. Phajjsin uñstanitap uñjasajj jankʼakiw sanedrinankirinakar yatiyapjjerïna. Phajjsin uñstanitap yatisinjja, tribunalankirinakajj mä machaq phajjsin qalltatapwa yatiyapjjerïna.  Ukampis qenayrantatätapata, urpuntatätapat phajjsejj jan uñjaskäna ukhajj ¿kunsa lurapjjerïna? Tukuyañampïski uka phajjsejj 30 urunakanïñapawa, machaq phajjsisti uka 30 urunakajj tukuykani uka qhepärmanthiw qalltañapa sasaw amtasïna.

Sanedrinankirinakajj mä amtar purisajj nin phichasaw amtap yatiyapjjerïna, Jerusalén jakʼankir Olivos qolluna ukat Jerusalén markan alto cheqanakapanwa nin phichapjjerïna. Tiempompejja, nin phichañat sipans jaqenakaruw yatiyapjjañapatak khitapjjerïna. Ukhamatwa Jerusalenan jakir judionakasa, yaqha cheqan jakir judionakas taqeni mä phajjsin qalltatap yatipjjerïna ukat fiestanaksa mä pachpa fechanak amtapjjerïna.

Aka yatichäwimp chik uñstki uka dibujojja, calendario hebreo ukarjamajj kunjamänsa phajjsinakasa, fiestanakasa, tiemponakasa uk amuytʼañatakiw yanaptʼistu.