MUSICAJJ israelitanakatak wali wakiskirïnwa. Bibliajj instrumentonak tukiri jan ukajj cantir walja jaqenakatwa parli. Biblian qellqatäki ukat jilapartejj cancionanakawa. Salmos, Cantar de los Cantares, Lamentaciones libronakajj cantañatak qellqatänwa. Bibliat qhanañchir mä librorjamajja, israelitanakan kunayman luräwinakapanwa musicajj utjirïna.

Jakäwinakapan musicajj utjapunirïnwa. Israelitanakajj kunjamas chuymapan jikjjatasipjjäna uk musicampiw uñachtʼayapjjerïna (Is. 30:29). Mä reyejj uttʼayaskäna ukhasa, soldadonakajj guerrat kuttʼanipkäna ukhasa, Diosar adorañatak fiestanakans warminakajj wali kusisitaw cantapjjerïna, thoqopjjarakirïna (Juec. 11:34; 1 Sam. 18:6, 7; 1 Rey. 1:39, 40). Maynejj jiwäna ukhajja, kunja llakitäpjjänsa uk uñachtʼayañatakejj chuymar purtʼkir cancionanak israelitanakajj cantapjjerïna (2 Crón. 35:25). Kunjamtï mä qellqatajj siskejja, “hebreonakatakejj musicajj wali wakiskirïnwa” (Cyclopedia, de McClintock y Strong).

Israelan reyinakaparojj musicajj wal gustäna. Israel markan reyinakapajj musicampejj wal kusistʼapjjerïna. Saúl reyejj Davidaruw jupatak arpa tukañapatak ajllïna (1 Sam. 16:18, 23). Davidajj reyëjjäna ukhajja, tukañatakejj kunayman kasta instrumentonakwa uñstayäna, suma cancionanakwa qellqäna, mä orquesta organiztʼarakïna, qhepat uka orquestaw Jehová Diosan templopan tukarakïna (2 Crón. 7:6; Amós 6:5). Salomón reyin palaciopan chachanakatsa warminakats cantirinakaw utjarakïna (Ecl. 2:8).

Israelitanakajj musicampiw Diosar adorapjjerïna. Jerusalenankir templonjja, música toqet suma yatjjattʼat 4.000 chachanakaw utjäna, jupanakajj platillonaka, cuerdan instrumentonaka, arpanaka, trompetanakwa tukapjjäna (1 Crón. 23:5; 2 Crón. 5:12). Ukampis janiw jupanakak musicamp Diosar adorapjjerïkänti. Jerusalenan maran apaskäna uka fiestanakar sarkasajja, walja israelitanakaw Markar makatkasin cantañatak cancionanak cantapjjerïna (Sal. 120-134). Judionakan yaqhep qellqatanakaparjamajja, israelitanakajj Hallel Salmonakwa a Pascua fiestan cantapjjerïna.

Diosan markapatakejj jichha tiempon musicajj wali importantëskakiwa (Sant. 5:13). Jehová Diosar alabañatakiw canttanjja (Efes. 5:19). Musicajj jilat kullakanakampiw mayachtʼistu, jan walinakan aguantañatakiw chʼam churarakistu (Hech. 16:25; Col. 3:16). Música toqew qhawqsa Jehová Diosar confiytan munasiraktan uk uñachtʼaysna.