Аллаһ сизи бағышлајар, бир шәртлә ки, лазым олан аддымлары атасыныз. Мүгәддәс Китабда дејилир ки, Аллаһ бағышлајан вә ҹомәрдликлә әфв едәндир (Нәһәмја 9:17; Зәбур 86:5; Әшија 55:7). Аллаһ бағышлајанда тамамилә бағышлајыр (Һәвариләрин ишләри 3:19). Рәбб ҝүнаһларымызы һәмчинин бирдәфәлик бағышлајыр. Өз Кәламында О дејир: «Онларын... ҝүнаһларыны бир дә јада салмајаҹағам» (Әрәмја 31:34). Аллаһ бағышлајанда ҝүнаһларымызы бир даһа үзүмүзә вурмур вә бир ҝүнаһа ҝөрә бизи дәфәләрлә ҹәзаландырмыр.

Рәббин әфви һиссләрә әсасланмыр. О, һеч вахт Өз принсипләриндә ҝүзәштә ҝетмир. Елә бу сәбәбдән О, бәзи ҝүнаһлары бағышламыр (Јушә 24:19, 20).

Бағышланмаг үчүн атылан аддымлар

1. Дәрк етмәлисиниз ки, ҝүнаһ етмәклә Аллаһын ганунларыны позурсунуз. Бәлкә дә һәрәкәтинизә ҝөрә кимсә әзијјәт чәксин, лакин анламалысыныз ки, бу әмәлинизлә сиз, илк нөвбәдә, Аллаһа гаршы ҝүнаһ едирсиниз (Зәбур 51:1, 4; Һәвариләрин ишләри 24:16).

2. Ҝүнаһынызы дуада Аллаһа етираф един (Зәбур 32:5; 1 Јәһја 1:9).

3. Әмәлинизә ҝөрә пешман олун. Чүнки «Аллаһа мәгбул кәдәр... төвбә һасил едир» (2 Коринфлиләрә 7:10). Төвбәјә ҝүнаһа апаран аддымлара ҝөрә пешман олмаг дахилдир (Мәтта 5:27, 28).

4. Әмәлләриниздән дөнүн (Һәвариләрин ишләри 3:19). Бу о демәкдир ки, ја һансыса әмәлдән әл чәкмәлисиниз, ја да үмумијјәтлә һәјат тәрзинизи дәјишмәлисиниз (Ефеслиләрә 4: 23, 24).

5. Сәһвләринизи дүзәлтмәјә вә ја вурдуғунуз зәрәрин әвәзини өдәмәјә чалышын (Мәтта 5:23, 24; 2 Коринфлиләрә 7:11). Зијан вурдуғунуз адамдан үзр истәјин, баҹардығыныз гәдәр вәзијјәти дүзәлдин (Лука 19:7—10).

6. Иса пејғәмбәрин фидјәси әсасында дуада Аллаһдан әфв диләјин (Ефеслиләрә 1:7). Бағышланмағынызы истәјирсинизсә, сиз дә сизә гаршы сәһв едәнләри бағышламалысыныз (Мәтта 6:14, 15).

7. Әҝәр ҹидди ҝүнаһа јол вермисинизсә, руһани ҹәһәтдән сизә көмәк едә биләҹәк вә сизин үчүн дуа едәҹәк бир нәфәрлә данышын (Јагуб 5:14—16).

Аллаһын әфви барәдә јанлыш фикирләр

«Әҝәр ҝүнаһларымы дин хадиминә етираф етсәм, бағышланаҹағам».

Аллаһа гаршы едилән ҝүнаһлары бағышламаға һеч бир инсанын сәлаһијјәти чатмыр. Ҝүнаһымызы етираф етдијимиз инсан бизә гәлб раһатлығы версә дә, ҝүнаһы бағышламаг јалныз Аллаһа мәхсусдур (Ефеслиләрә 4:32; 1 Јәһја 1:7, 9).

Әҝәр беләдирсә, онда Иса Мәсиһ һәвариләринә нәјә ҝөрә демишди ки, «кимин ҝүнаһларыны бағышласаныз, онлар бағышланаҹаг, кимин ҝүнаһларыны бағышламасаныз, онлар бағышланмајаҹаг»? (Јәһја 20:23). Бу сөзләрлә Иса ҝөстәрмәк истәјирди ки, о, һәвариләринә мүгәддәс руһу вермәклә онлара белә бир сәлаһијјәти верәҹәк (Јәһја 20:22).

Вәд олундуғу кими, һәвариләр бу сәлаһијјәти ерамызын 33-ҹү илиндә онлара мүгәддәс руһ вериләндә алдылар (Һәвариләрин ишләри 2:1—4). Һәвари Бутрус бу сәлаһијјәтдән Һәнәнја вә Сәфирәјә һөкм чыхарданда истифадә етмишди. Онлар фырылдаг ҝәлмәк истәдиләр. Лакин Бутрус буну мөҹүзәли шәкилдә анлады. Һәваринин бу ҹүтлүјә чыхартдығы һөкм ҝөстәрир ки, онларын ҝүнаһы бағышланмајаҹаг (Һәвариләрин ишләри 5:1—11).

Шәфа вермәк, мүхтәлиф дилләрдә данышмаг әнамы кими ҝүнаһлары бағышламаг сәлаһијјәти дә һәвариләрин өлүмүндән сонра арадан галхды (1 Коринфлиләрә 13:8—10). Буна ҝөрә дә бу ҝүн һеч бир инсанын башгасынын ҝүнаһыны әфв етмәјә сәлаһијјәти чатмыр.