Ngelah bayi bisa ngranaang suami istri bagia lan bisa masih ngaé kewalahan. Sekat dadi mémé bapa, ragané ajak dadua minab tengkejut krana liu nelahang waktu lan perhatian buat ngrunguang bayi. Ulian kuangan mesare lan perobahan emosi, ento bisa ngranaang perkawinan ragané tegang. Suami lan istri patutne ngaé penyesuaian buat ngurus bayi lan sambil nyaga perkawinané tetep bagia. Kéngkén nasehat uli Cakepan Suci bisa ngawantu?

APA AJAHAN CAKEPAN SUCI: ”Kapitresnane punika sabar miwah welas asih.” Kapitresnané masih ”tan ngrereh bati buat padewekanipun kewanten, tur nenten gelis brangti.” (1 Korintus 13:4, 5) Sekat dadi mémé, wajar yén perhatiané lebian tekén pianaké. Kurenan ragané bisa dogén marasa tusing karunguang. Eda engsap yéning ia masih merluang perhatian. Nganggo sipat sabar lan olas asih, gaénang apang ia marasa kaperluang lan libatang ia dikala ngurus pianak.

Parasemeton lanang, tetepja ragané ”mapumahan sareng rabin semetone.” (1 Petrus 3:⁠7) Ragané perlu ngerti yéning liu bayun kurenanné telah krana ngurus pianak. Ia ngelah tanggung jawab anyar lan minab inguh, kenyel, utawi stres. Bisa dogén ia marasa gedeg tekén ragané. Sakéwala tetepja tenang, krana ”melahan dadi anak sabar, bandingang teken dadi anak mawisesa.” (Pitutur 16:32) Tunjukang pengertian, lan baang dukungan ané perluanga. —⁠Pitutur 14:29.

ANÉ BISA KAJALANANG:

• Bapa: Tulungin kurenanné ngurus pianak, yapinja peteng. Kuangin waktu anggo kegiatan ané lénan apang lebian ada waktu buat kurenan lan pianak

• Mémé: Terimaja bantuan kurenan ragané yéning ia nyak nulungin ngurus pianaké. Yéning ia sing luung nyemak gaéné ento, eda cacadina, kéwala sabar orahin carané ané beneh

APA AJAHAN CAKEPAN SUCI: ”Ipun sareng kalih dados madewek tunggal.” (Purwakaning Dadi 2:24) Yapinja jani anggota kluargané matambah, ingetang ragané lan kurenanné tetep ”madewek tunggal.” Utsahaang apang hubungan ragané ajak dadua tetep kuat.

Para istri, hargain bantuan lan dukungan kurenanné. Penghargaan ané katunjukang tekén kurenan bisa ”nyegerang.” (Pitutur 12:18) Para suami, orahin kurenanné amongkén gedén tresna lan penghargaan ragané tekén ia. Puji ia unduk carané ia ngurus kluarga.—⁠Pitutur 31:10, 28.

”Sampunangja wantah makayunin kabuatan semetone niri kewanten, nanging patut taler semeton sareng-sareng makayunin kabuatan anak tiosan.” (1 Korintus 10:24) Terus jalanang apa ané paling luunga buat kurenanné. Dadi pasangan, sediaang waktu buat ngomong, muji, lan saling madingehang. Eda egois unduk hubungan seks. Kenehang kebutuhan kurenanné. Cakepan Suci ngorahang: ”Sampunangja semeton pada ngeret semara! Sajawining yen semeton sampun pada adung.” (1 Korintus 7:3-5) Dadiné jujurja ngomongang unduké ené ajak dadua. Sipat sabar lan pengertian lakar nguatang hubungan ragané ajak dadua.

ANÉ BISA KAJALANANG:

• Eda engsap nyediaang waktu ajak dadua dogén

• Gaé apaja ané bisa ngranaang kurenanné marasa kasayangang, contoné baang ia hadiah utawi beliang baju

APA AJAHAN CAKEPAN SUCI: ”Uli enu cenik cening suba nawang Cakepan Suci, ane maicayang kawicaksanan, ane ngrahayuang cening.” (2 Timotius 3:15) Rencanaang kéngkén ragané ajak dadua lakar ngajahin pianaké. Yapin ia tonden lekad, bayi ngelah kasanggupan malajah ané luung. Uli enu ada di kandungan, bayi suba nawang munyin mémé bapané, ia masih nawang apaké ragané sedek seneng, sebet utawi gedeg. Bacaang buku uli ia enu cenik. Yapin ia tonden ngerti, ené bisa ngranaang ia demen mamaca di subané ia kelih.

Eda ngadén pianaké enu bes cenik madingehang lan malajahin unduk Tuhan. Ajak ia bareng ngastawa kapéning Yehuwa. (Pangeling-eling 11:19) Yapin sedek maplalianan, critaangja unduk ciptaan Tuhan. (Kidung 78:3, 4) Di subané pianaké ngancan kelih, ia lakar ngerasaang padidi tresnan ragané tekéning Yehuwa lan ia masih lakar nresnain Ida.

ANÉ BISA KAJALANANG:

• Ngastawaja nunas tuntunan dikala ngajahin pianaké

• Sesainang ngajahin unduk-unduk ané penting apang ia bisa malajah uli enu cenik