Me bi néñél i Warialda, man tison wada i Nouvelle-Galles du Sud. Nyoo, bôt ba bé néñés kembee ni nyaga, ba bak basal nwom. I homa mbai nu a bé loñge ngandak, béba i bé tôl bé nyoo.

Di bé jôm li bon, men me bé man nu mañ; me bi bôdôl bôlô me ban-ga 13 nwii, inyule me bé sômbôl hôla bagwal bem i tééda bés. Kiki me bi ke bé ngandak i suklu, me bi bôdôl sal i wom, me téédaga bilém. I ngéda me bi pamna 15 nwii, bôlô yem i bé le me tééda hosi, me gwelek hosi i bikai nkôman.

I sal i homa ba ntééda bilém i bé loñge, ndi i ban-ga mé mandutu. Me bé gwés bôlô yem ni i homa me bé sal. Juu me bé béna yén bebee ni hié me béñgege sôñ ni tjôdôt, me hébék njiñ bikai, le mbebi i bé lona. Me mbigda le kel yada me kalba le ngim mut yon i bi hek i gwom bilam bini gwobisôna. Jam lipe li yé ki le bôt ba bééna bihiumul bibe nyoo i homa me bé sal. Me bé béna nok bibuk bibe, yak siga i tôlôk. Hala a bi nom bé, me yoñ lem i hem siga ni pot bibuk bibe.

I ngéda me bi bolna 18 nwii, me ke i niñ i tison i Sydney. Me noode jôp i bôlô i sônda, ndi me bi nla bé inyule me bi ke bé i suklu bañga. Me léba bôlô ipe i Sydney, me yén nyoo nwii wada. Nyoo nyen me bi boma Mbôgi Yéhôva inyu ngélé yem bisu. Me bôdôl ke i makoda, kôp i nkena bé hilôba i hibee, me nôgda le ba niiga maliga.

I mbus ndék ngéda, me nyodi i mbôm tison, me témb yem i mbai. Sôk i nsôk me bol i man tison wada le, Goondiwindi, i pes mbok i Queensland. Me léba bôlô nyoo, me biiba ki, ndi ngoo le me bi bôdôl ngandak nyôba maok.

Me ni nwaa wem di bi bana bon iba. Ha nyen me bi bôdôl badba kii me mboñ i niñ yem. Me bigda i yom me bi nok kel yada i likoda li Mbôgi Yéhôva jada i Sydney, me yoñ makidik.

Me bi léba nlômbi Nkum Ntat nu a bé éba i homa hikuu hi loñ hi Mbôgi Yéhôva hi yéne i loñ Ôstrélia. Me tilna bo kaat inyu bat mahôla. I mbus, Mbôgi Yéhôva i bi lo i boma me. Ibabé i lep ngéda, me bôdôl yigil i Bibel.

Mu kiki me bé nigil Bibel, me bi nôgda le me nlama boñ mahéñha makeñi. Nlôñ Bibel wada u bi lôôha tihba me: 2 Korintô 7:1. Nlôñ kaat u, u bé kal le: “Di pubus bésbomede ni mam momasôna ma nhindis minsôn ni mbuu.”

Ha nyen me bi yoñ makidik i waa ôt siga ni nyôba. Hala a bé bé jam li ntomb inyule me bé gwés siga ni moog. Ndi me bi yoñ makidik i lémél Yéhôva. Litiñ di nléba i kaat Rôma 12:2 jon li bi hôla me. Li nkal le: “Ni waa ki nigle libak li bôt ba nkoñ ’isi unu, ndi ni heñla, mu kiki ni nyilha mahoñol manan yondo.” Me bi nok le, inyu boñ le me héñha, me nlama héñha mahoñol mem, me tehe bilem gwem kiki Yéhôva a ntehe gwo—bileme bibe, bi bi nlona ndik bikuu. Ni mahôla mé, me bi waa ôt siga ni nyôba maok.

Ndi me bééna sañ ipe, i ngui: waa pot bibuk bibe. Me bé yi maéba ma yé i kaat Éfésô 4:29, i i nkal le: “Buk ibe yo ki yo i pémél bañ i manyo manan.” Ndi to hala, me bi hoo bé waa pot i nya bibuk i. Ndi maéba ma, ma bi hôla me i ôt pék mu bibañga bi yé i kaat Yésaya 40:26. I mpôdôl tjôdôt, i kala le: “Pana mis nyoo ngii, ni béñge. Njee a bi hek i gwom bini? Nu a ñéga gwo kiki ntôñ gwét, hiki yada mu inoñnaga ni nomba yé; a nsébél ki gwo, hiki yada mu ni jôl jé. Kiki a gwé ngui ikeñi ni lipémba li li nhélhana, to yada i nhañ bé.” Ibale Nyambe a bi la hek i ngiinda ini yosôna me bé gwés memle, ibabé pééna, a bé le a ti me ngui inyu boñ le me kônha nye maséé. Ngandak masoohe ni ngandak biliya bi bi hôla me ndék ni ndék i gwel hilémb hiem.

I ngéda me bé sal i homa ba ntééda bilém, me bééna bé pôla kwel ngandak, inyule me bé boma bé ngandak bôt. Ndi ni biniigana me bi kôhna i makoda ma Mbôgi Yéhôva, me bi nigil i pôt. Me bi nigil yak i añle bôt bape ñañ nlam u Ane Nyambe.—Matéô 6:9, 10; 24:14.

Hala a yé ndék nwii le me yé mañ u likoda jem. Me yé maséé i hôla lôk kéé hiki ngéda pôla i nene. Ndi me nlôôha ki ba maséé i gwélél Yéhôva, me ni nwaa wem nugwéha, ni bon bés.

Me nti Yéhôva mayéga mu kiki a bi niiga me nu me bi ke bé i suklu bañga. (Yésaya 54:13) Me yé nkwoog nkaa ni bibañga bini bi yé i kaat Bingéngén 10:22, bi bi nkal le: “Bisai bi Yéhôva gwon bi nlona lingwañ.” Me ni lihaa jem di gwé ngôñ i ke ni bisu i nigil i yi Yéhôva ni i gwélél nye i boga ni boga.