Me bi gwéé i Paddington, tison i London, i loñ Ngisi i i bé nyonok ni bôt. Di bé bôt batan i mbai yés: M’ma, lôk kéé i bôda i mañ yo iaa ni me. Pua yem a bé mut nyôba nunkeñi, jon a bé béna bé ba i mbai, a bé bedek a sôhôk mu i mbédgé.

Ibôdôl me mañge, m’ma a bi niiga me i soohe hiki ngéda ilole me nañal. Me bééna man Bibel nu a bééna ndigi kaat Tjémbi, inyu boñ le me pam i tééda bipes bi bikaat mu, me bé bot tjémbi. Me ngi hoñlak i kel me bi añ i kaat yem i suklu yada le: “I ga pam kel yada le di nañal, kel i ye ha bé.” Bibuk bi, bi bi boñ le me lal péé, inyule me bé badba lelaa hala a ga bôña. ’Me bi kahal ôt pék, me badbaga le: ‘Inyuki ni di niñ?’ Kii me bi lo i boñ hana ’isi?’ Me gwé bé ngôñ i wo!

Me bi noode yak yéñ ndimbhe i mambadga ma i makañ. Me bôdôl kwélés bawoga, me kenek bison ni mawanda mem ma suklu, me ni bo di bééñgege bisima bi bi nkônha woñi. Bi bé lémél bés, i nlélém ngéda bi kônhaga yak bés woñi.

Me bi nai ni ndok, ki me gwé ndik jôm li nwii. Me bôdôl ôt siga, kayéle i yik yila me kiki bijek. I mbus ngéda, yak hibañga me bôdôl ôt. I ngéda me bi bolna 11, me bôdôl nyo bie. Tolakii bi bé lémél bé me inyu lilôli jé, me bé nôgda le nyuu i ne me i ngeñ me nhiôô. Me bé gwés yak masak ni nsik. Jon me bé ke masak ni juu i ngéda pôla i nene. Me bé me so i ngéda bôt ba niñi, me huuak ilole kel i nye. Kiki me bé nwaak ngandak hilo hi bé noñ, me bé béna tôl suklu. To i ngéda me bé ke, me bé nyo maok nyoo i ngeñ di yé mangéda ma noi i suklu.

Me bi bep sal ngandak i nwii u nsôk u suklu. Hala a bi tééñga mama yem ngandak inyule a bé yi le me ndaab ngandak, a bep ki unup. Di bi nomol, i mbus me pam i ndap, me ke. Me bi yén ndék ngéda ni mbok wem Tony, a bé bak ño kiki bôt ba Rasta. A bé nip kiki tôlô, a nuñlak hibañga, a bé yiba kiki mut bisañ. Hala a bi nom bé, me yoñ jém, ki me gwé ndigi 16 nwii, me gwal man munlôm.

Me bi boma Mbôgi Yéhôva inyu ngélé bisu ki me yé i homa ba ntééda boñge bôda ba ba nhoo gwal. Ngomin nyen a bi ti me homa liyééne nyoo. Bôda iba ba bé lo i tééne banyañ ba bon likalô. Kel yada, yak me me bi emble bo. Nsoñgi wem u bé le me unda bo le Mbôgi Yéhôva i ntembee. Ndi ibabé i unup, ba bi yoñ ngéda i timbhe mambadga mem ni Bibel. Libak jap li minyaô li bi lémél me ngandak. Jon me bi neebe nigil Bibel ni bo.

Yigil i Bibel i bi niiga me ngim jam i i bi héñha niñ yem. Ibôdôl me mañge, me bé kon nyemb woñi. Nano me bi nigil le bitugne bi ga ba! (Yôhanes 5:​28, 29) Me nigil ki le, Nyambe a ntôñ hiki wada wés. (1 Pétrô 5:7) Bibañga bi kaat Yérémia 29:11 bi bi lôôha tihba me, bi nkal le: “‘Yéhôva a nkal le, inyule me nyi mahoñol me gwééne bé,’ ‘mahoñol ma nsañ, ha mahoñol mabe bé, le me ti bé botñem inyu lisuk linan.’” Me bi bôdôl hémle le, m’a niñ i boga ni boga i Paradis hana ’isi.​—Tjémbi 37:29.

Mbôgi Yéhôva i bi unda me le ba bé gwés me ni ñem wonsôna. I ngéda me bi ke likoda inyu ngélé bisu, me bi yimbe le bôt ba bé gwéhna ngandak, ba kwelek kiki mawanda, kinje loñge homa hiki mut a bé le a emel! (Yôhanes 13:34, 35) Kinje maselna ni i yom me bé tehe i base yés. Mbôgi Yéhôva i bi leege me loñge tolakii me bé kiki me bé. Ba bé yoñ toi ngéda ni me, ba tôñôk me, ba téédaga me, i ngéda me bé boma ngim ndutu, ba bé lôl me mahôla. Hala a boñ le me nôgda wee me yé lihaa likeñi, li li ngwéhna ngandak.

Yigil i Bibel i bi unda me le, me nlama kônde lona mahéñha i niñ yem. Hala a bé nledek jam ngandak i nwas siga, téntén i ngéda me bé emble ngim minsik, a bé ndik wee mi bé tinde me i ôt hibañga. Jon me bi kit le m’a emble ha bé nwo. Kiki me bé gwés ha bé hiôô, me kit le me ntéé ha bé kôô mangand, to i kwémbéé juu i het me bé le me hiôô. U héya hala, me bi bôdôl yéñ mawanda ma ma bé le ma hôla me i héñha.​—Bingéngén 13:20.

Mu mangéda ma, yak Tony a bé nigil ni Mbôgi Yéhôva. Kiki ba bé timbhe mambadga mé momasôna ni Bibel, a bi nôgda le a nléba maliga. A bi héñha ngandak: A tjôô mawanda mé ma ma bé gwés bisañ, a waa kand bikuu, yak hibañga, a téé. Kiki di bé sômbôl lémél Yéhôva, di bi kit le di niñ ha bé niñ i ndéñg. Jon di bi biiba i nwii 1982.

Me ngi hoñlak i ngéda me bé boñ nyiña mu Nkum Ntat ni Tôde ’ilo! inyu soñgol miñañ mi bôt ba ba bi pam i yémbél i béba niñ me bééna. Ndémbél yap i bi hôla me ngandak! Yon i bi hôla me i ke ni bisu i jo sañ i ngui inyu héñha. Me bé yemhe Yéhôva juu ni njamuha le a tjôô bañ me. Me ni Tony di bi sôblana i sôñ Njéba i nwii 1982.

I boñ biliya inyu yila liwanda li Yéhôva Djob i bi hôla me i bana bañga niñ. Yéhôva a bi nit me ni Tony mu mangéda mabe di bi tégbaha. Di bi nigil i bôdôl nye ñem i ngéda mandutu, a mah tjôô bé bés kekikel.​—Tjémbi 55:23.

Me bi hôla lok yés ni ngond yés i yi Yéhôva kiki me. I len ini, me yé maséé i tehe bon bap ba nañ ikété maliga.

Nano me nlal ha bé i mbédgé, me mbadba ha bé too yani a’ ba lelaa, to nyemb me nkon ha bé woñi. I len ini, me ni Tony di pégi ngandak i yuuga makoda ma Mbôgi Yéhôva hiki sonde inyu ti bo makénd. Di ntéé likalô ni lôk kéé, di nhôla bôt i hémle Yésu, inyu kôhna niñ boga.