Bibel i mpôdôl i kébba bikun ndigi ngélé yada, i kaat lôk Lévi 19:28, i nkal le: “Ni nlama bé to bana bikun mu manyuu manan.” Djob a bi ti bon ba lôk Israel mbén i, inyu boñ le ba ba maselna ni matén ma ma bé kéña bo, inyule bo ba bééna bikun bi môl ba mop map, tole ngim biyimbne mu manyuu map. (Ndiimba mbén 14:2) To hala kiki mambén ma loñ Israel ma bé bé inyu bikristen, hala a yé nseñ le di tibil ôt pék mu matiñ mé ma ma mpôdôl i jam li kun manyuu lini.

Baa kristen i nla kébba bikun?

 Minlôñ mi Bibel mi noñ ha mi ga hôla i ôt pék mu jam li:

•   “Bôda ba nlama boñ nyañga lôñni hôtnyuu.” (1 Timôtéô 2:9, New American Bible)Litiñ lini li mbéñge bôlôm ni bôda. Di nlama bé yan i yom bôt bape ba nôgda to boñ mam ndigi inyu nene.

•   Bahogi ba ngwés yis bôt mimbe mintén mi bôt ba yé, tole i unda bo le ba yé kunde i boñ to kii ba ngwés, ndi bape ki ba nkébba bikun mu manyuu map inyu unda bôt le ba nla boñ to kii ni yuu yap.Maselna ni hala, Bibel i nti bikristen mana maéba le: “Ni ti manyuu manan kiki sesema i yômi, i pubhaga, i lémlak Nyambe, ni gwéélak ngap nan i hek pék inyu gwel nson mpubhaga.” (Rôma 12:1) Gwélél “ngap yoñ i hek pék” inyu wanba ni badba inyuki u gwé ngôñ ni kébba bikun. Baa njômbi yoñ i yé le, i kébba bikun inyule u ntehe bôt bape ba mboñ hala, tole u nsômbôl unda le u yé ngim ntôñ bôt? Bigda le i mam di ngwés nano, yaani di yé le di nhéñha mahoñol, di yéñ yak i sas bikun di nkébba. Kii i yé tinde we i kébba bikun, soho tibil ôt pék iloole u yoñ makidik moñ.—Bingéngén 4:7.

•   “Bipék bi mut bôlô bi ga yon, ndi i bôt bobasôna ba mpabla i boñ mam ba ga sôk ikété liyep.” (Bingéngén 21:5) Libim li ngéda, bôt ba mpabla i kébba bikun. Ba nyoñ bé to ngéda i hep pék inyu hoñol bimbee bikuu i nya makidik i, i ga lona bo mu maada map ni bôt bape, mu bôlô yap. I yé maliga le, i kébba bikun i nhee diye, to inyu sas gwo hala a ta bé jam li ntomb. Ngim minyiña mi ñunda le, kiki i jam li kébba bikun li nhoñ i len ini, ngandak bôt i i nkébba bikun len, i yé i sôk, i tam jam li.