SƆ̃ƆSIRU 9
Amɔsunwa wunɛn yɛnu ga koo kpĩ ga n wãa do nɔɔru sɔɔ?
1. Mban sɔ̃na n weenɛ kurɔ ka durɔ bu suana bu ka doo nɔɔru wa yɛnun wãaru sɔɔ?
Labaari gea ya weewa saa Yehofan min di, Gusunɔ doo nɔɔrugii, wi u kĩ yɛnusu nu n doo nɔɔru mɔ. (1 Timɔte 1:11; Gusunɔn Bɔrɔ Kpaanu) U sãawa kurɔ ka durɔn suanaan nuuru. Suanaa ye wooda ya yi, ya sãawa tilasi yɛnun doo nɔɔru sɔɔ, domi ya wãa yeru te ta laakari kpĩndu mɔ, mi ba koo ben bibu seeya. N weenɛ Kirisigibu bu tem mi ba wãan woodaba mɛm nɔɔwa suanaan tireru nɔma dokebu sɔɔ.—A Luku 2:1, 4, 5 gario.
Amɔsunwa Gusunɔ u suanaa waasinɛ? U kĩwa ya n sãa gbinabu bi bu koo tɛ sere ka baadomma, kurɔ ka durɔn baa sɔɔ. Yehofa u kĩ kurɔ ka durɔbu bu naanɛ sɔ̃ɔsina. (Heberu 13:4) U yinanaa tusawa. (Malasi 2:16) Adama, u wura Kirisigibu bu yinana kpa bu suanaa kpaa ko, ma ben kurɔ n kun mɛ durɔ u sakararu kua.—A Mateu 19:3-6, 9 gario.
2. Amɔsunwa n weenɛ durɔ ka kurɔ bu nɛnuna?
Yehofa u durɔ ka kurɔbu taka kua ba n sominamɔ suanaa sɔɔ. (Torubu 2:18) Nge mɛ durɔ u sãa yɛnun wirugii, n weenɛ u gbi u ko ye ya sãa yɛnun bukata kpa u wingibu keu sɔ̃ɔsi Gusunɔ sɔɔ. N weenɛ u win kurɔ kĩa ka gɔ̃ru kĩru, u n ku win tii tɔnan arufaani kasu. N weenɛ durɔ ka kurɔbu bu kĩana kpa bu bɛɛrɛ dokena. Domi durɔ ka kurɔbu kpuro ba sãa durumgibu, bu suuru kuanabu mɛɛri, ya sãawa gãa girinu kurɔ ka durɔ ba n ka wãa doo nɔɔru sɔɔ.—A Efesu 4:31, 32; 5:22-25, 33; 1 Piɛɛ 3:7 gario.
3. Suanaa ye sɔɔ a ǹ doo nɔɔru waamɔ, n weenɛ a ye deri ro?
À n takaasi waamɔ wunɛn suanaa sɔɔ, n weenɛ bɛɛ yiru kpuro i kookari ko i ka kĩru sɔ̃ɔsina. (1 Korinti 13:4, 5) Gusunɔn Gari ya ǹ derinaa yi nge swaa ye sa ko swĩi su ka baadomman wahalaba wunana suanaa sɔɔ.—A 1 Korinti 7:10-13 gario.
4. Bibu, mba Gusunɔ kĩ bɛɛ sɔɔ?
Yehofa kĩ i n doo nɔɔru mɔ. U bɛɛ bwisi ni nu buram bo kã, i ka bɛɛn aluwaasiru n kun mɛ bɛɛn wɔndiaru n dobu nɔ. U kĩ i bɛɛn mɔwɔbun bwisi ka ben wãarun yɛ̃run arufaani di. (Kolose 3:20) Yehofa maa kĩ i nuku dobu wa saa gãa ni i bɛɛn Taka Kowo ka win Bii kuamɛn di.—A Waasu kowo 11:9–12:1; Mateu 19:13-15; 21:15, 16 gario.
5. Mɔwɔbu, amɔsunwa bɛɛn bibu ba koo kpĩ bu doo nɔɔru wa?
N weenɛ i sɔmburu ko too too i ka dĩanu, diru ka yanu bɛɛn bibu waawa. (1 Timɔte 5:8) Adama, bɛɛn bibu bu ka doo nɔɔru wa, n maa weenɛ i be sɔ̃ɔsi bu Gusunɔ kĩa kpa bu gia wi sɔɔ. (Efesu 6:4) Bɛɛn koma ni i mɔ̀, i ka bɛɛn kĩru Gusunɔ sɔ̃ɔsi, nu koo kpĩ nu bɛɛn bibun gɔ̃ru baba too too. Bɛɛn sɔ̃ɔsiru tà n wee Gusunɔn Garin di, ta koo kpĩ tu bɛɛn bibun bwisikunu mɔmɛ swaa gea sɔɔ.—A Sɔ̃ɔsiru 6:4-7; Mɔnnu 22:6 gario.
Bibu ba koo arufaani wa ì n be dam kɛ̃mɔ ma i be siaramɔ. Ba maa kirɔ ka swaa gawabun bukata mɔ. Ì n mɔ̀ mɛ, i ko be bere saa kookoo si su koo kpĩ su be ben nuku dobu wararin di. (Mɔnnu 22:15) Ka mɛ, ya ǹ weenɛ i be swaa gawa ka sobu n kun mɛ ka nuku kɔ̃suru.—A Kolose 3:21 gario.
Yehofan Seeda Diobu ba tire dabinu kpara ni ba yorua dee dee bu ka mɔwɔbu ka bibu somi. Tire nin sɔ̃ɔsinu nu nin nuuru mɔwa Bibeli sɔɔ.—A Womu 19:8, 12 gario.
Découvrez aussi…
KAA KPĨ A N DOO NƆƆRU MƆ KA WUNƐN YƐNUGIBU
Ma a kĩ wunɛn suanaa ya n doo nɔɔru mɔ, a Gusunɔ susio
A bikiabu yiru mɛɛrio bu koo kpĩ bu nun somi wunɛn suanaa yu ka wuswaa da.
KAA KPĨ A N DOO NƆƆRU MƆ KA WUNƐN YƐNUGIBU
Amɔsunwa sa ko ko su ka wahalan wε nɔɔ wa?
Bà n suanaa swaa nge mε n weenε ya koo kpĩ yu dam ko kpa ya n nuku dobu mɔ, adama, bà kun ye sue mε, ya koo kpĩ yu dam dwiya kpa ya n nuku sankiranu mɔ.
