Labaari gea ye ya sɔ̃ɔsimɔ ma tɔmba koo n wãa tem sɔɔ sere ka baadomma ya yoruawa Bibeli sɔɔ. (Womu 37: 29) Tire piibunu wasi wata ka nɔɔba tia (66) nu wãa Bibeli sɔɔ. Gusunɔ u tɔn naanεgibu nge weerun (40) saka dendi bu ni yore. Mɔwisiwa u tirenu nɔɔbu gbiikinu yorua ye n wɔ̃su nɔrɔbun suba ita ka bɔnun (3 500) saka wee. Gɔro Yohanuwa u tire dãakuru yorua, ya wɔ̃su nɔrɔbu ka nεnε ka wunɔbu (1 900) kera gisɔ. Wara n bwisikunuwa ba yorua Bibeli sɔɔ? Gusunɔ u win hunde dεεro dendi u ka be ba Bibeli yorua gari sɔ̃wa. (2 Samuɛli 23:2) Gusunɔn bwisikunuwa ba yorua, ya ǹ ben tii tiin bwisikunu. N mεn na Yehofa min diya Bibeli ya wee.​—A 2 Timɔte 3:16; 2 Piɛɛ 1:20, 21 gario.

A fideo ye ba mɔ̀ Waràn min diya Bibeli ya wee? mɛɛrio

Sa yɛ̃ ma Bibeli weewa saa Gusunɔn min di, domi ya ra gbi yu sun sɔ̃ gem ka tia ye ya koo koora yu sere na. Yen tɔnu sari wi ko kpĩ u ye ko. (Yosue 23:14) Gusunɔ Damkpurogii tonawa ko kpĩ u tɔmbun sia wa saa yellun di yu sere koora.​—A Esai 42:9; 46:10 gario.

Sa ko n mara ma tire te ta wee Gusunɔn min di, ta kun ka tire garu weenε, wee mεna. Ba Bibeli tubusia barum wunɔm wunɔm sɔɔ ma ba yen tusurum tusurum bɔnu kua. Baa ye ba Bibeli kua ya tε, ya ka ye kaso kowobu ba wa dee dee, nɔɔ nε. Ma, tɔn weeru (40) be ba Bibeli yorua ba nɔɔ tia kua. * Sa ko kpῖ su maa gere su nε Gusunɔ geo, Gusunɔ kĩrugiin min di baasi, ye Bibeli gerumɔ kĩru sɔɔ kun wee goon min di, ma ya maa dam mɔ yu ka tɔmbun wãanu  wɛ̃rasia. Ye kpuron sɔ̃na tɔmbu yakom yakom ba yɛ̃ dim dim ma Bibeli ya sãawa Gusunɔn Gari.​—A 1 Tɛsalonika 2:13 gario.

A fideo ye ba mɔ̀ Amɔsunwa sa ko n ka yɛ̃ kam kam ma Bibeli gema? mɛɛrio

Gari ye ya gari kpuro kere Bibeli sɔɔ yera labaari gea ma Gusunɔ u swaa kĩrugia mɔ ye u ko tɔmbu sɔ̃ɔsi. Bibelin yori yi tusiamɔ amɔsunwa saa toren di, tɔnu u tem alusanna bia, ma amɔsunwa mεn nɔru, alusanna ya koo wurama.​—A Kãsiru 21:4, 5 gario.

Gusunɔn Gari sɔɔ ba ra maa woodaba, ka gee kpεεkpεεkuginu, ka bwisi kɛ̃ru, wa. Bibeli ya maa mεsum Gusunɔ ra ka tɔmbu suesinε n gari kua, gari ye ya Gusunɔn daa sɔ̃ɔsimɔ. N mεn na, Bibeli koo kpĩ yu nun somi a ka Gusunɔ gia. Ya tusiamɔ mεsum kaa kpĩ a ko a ka gɔsia win bɔrɔ.​—A Womu 19:8, 12; Yakɔbu 2:23; 4:8 gario.

Tire teni ta koo nun somi a ka Bibeli tubu a n mεεrimɔ mεsum Yesu u kua a ka ko. U ra raa Bibelin yori sue tia tiaka kpa u Gusunɔn ‘Gari tubusia.’​—A Luku 24:27, 45 gario.

Ǹ gãa dabina nu koo sun maamaki ko nge labaari gea ye ya wee Gusunɔn min di. Adama, ya ǹ gabu gãanu sãawe, ma turobu ba ra ka ye mɔru bare. A ku mwia kpana. Wunεn yĩiyɔbu wãaru te ta ku ra kpe sɔɔ, bu kookari bikia Gusunɔn giabu sɔɔ.​—A Yohanu 17:3 gario.