SƆ̃ƆSIRU 6
Yĩiyɔ birà gɔribu ba mɔ?
1. Labaari gea yera ya wãa gɔribu sɔɔ?
Saa ye Yesu u na Betaniɔ, Yerusalemun bɔkuɔ, win bɔrɔ Lasaa u raa gu kɔ yen sɔ̃ɔ nnε wee. Yesu u da sikirɔ ka Maata ka maa Maari, gɔri win sesubu. Ye n sosi, tɔn wɔrusu ba mεnna. A bwisikuo nuku dobu bi Maata ka Maari ba nua saa ye Yesu u Lasaa seeya wãaru sɔɔ ro?—A Yohanu 11:21-24, 38-44 gario.
Maata u raa labaari gea gɔribu sɔɔ yɛ̃ kɔ. U raa yɛ̃ ma Yehofa koo gɔribu seeya ba n ka maa wãa tem sɔɔ.—A Yoobu 14:14, 15 gario.
2. Mba n da koore tɔnu ù n gu?
Gusunɔ u Adamu sɔ̃ɔwa u nεε: “Tema na ka nun kua. Kaa maa wura a ko tem mε.”—TORUBU 3:19.
Ba tɔmbu kuawa saa tuan di. (Torubu 2:7; 3:19) Sa ǹ sãa hundeba yi yi wãa tɔn wasi sɔɔ. Sa sãawa tem minin taka koora, yen sɔ̃ gɔɔn biru, baa gãanu bεsε sɔɔ ku ra n maa tie ya n wasi. Sà n gu, bεsεn wii kɔndun tii ta ra gbi, ma bεsεn himba yi ra kam ko. Mεna, Lasaa kun gãanu gerua win gɔɔ sɔɔ domi gɔribu ba ǹ gãanu yɛ̃.—A Womu 146:4; Waasu kowo 9:5, 6, 10 gario.
Gɔɔn biru Gusunɔ u ra tɔmbu nɔni sɔ̃ dɔ̃ɔ sɔɔ ro? Saa min di Bibeli ya sɔ̃ɔsimɔ ma gɔribu ba ǹ gãanu yɛ̃, kiaman dɔ̃ɔ dokebu ya sãawa sɔ̃ɔsi weesugiru te ta Gusunɔ durum manimɔ. U ǹ mam gɔ̃ru dokere u tɔnu nɔni sɔ̃ dɔ̃ɔ sɔɔ, pai.—A Yeremi 7:31 gario.
A fideo ye ba mɔ̀ Mba n da tɔnu deemɛ ù n gu? mɛɛrio
3. Gɔribu ba ko kpĩ bu ka sun gari ko ro?
Gɔribu ba ǹ kpɛ̃ bu gari ko. Mɛna ba ǹ maa kpɛ̃ bu nɔ. (Womu 115:17) Adama maleeka gabu ba gɔsia kɔ̃sobu ba ra ka tɔmbu gari ko. Ba ra ko tɔn be ba n tamaa sãa ma ba sãa gɔribu. (2 Piɛɛ 2:4) Yehofa ra yinε su gɔribu soku.—A Sɔ̃ɔsiru 18:10, 11 gario.
4. Wara koo wurama wãaru sɔɔ?
Gɔribu tusurum tusurum be ba wãa sikirɔ ba koo wurama wãaru sɔɔ temɔ. Baa tɔn gabu be ba ǹ daa Gusunɔ yɛ̃ ma ba gãa kɔ̃sunu kua bu sere gbi, ba koo sikura.—A Luku 23:43, NW; Gɔrobun kookoosu 24:15 gario.
Be ba sikura ba koo kpĩ bu gem mεεri Gusunɔ sɔɔ kpa bu Yesu naanε doke, ba n wi mεm nɔɔwamε. (Kãsiru 20:11-13) Be ba wurama wãaru sɔɔ ma ba gãa geenu mɔ̀, ba koo kpĩ bu wãaru di tem sɔɔ sere ka baadomma.—A Yohanu 5:28, 29 gario.
5. Mba sikurabu bu sun sɔ̃ɔsimɔ Yehofa sɔɔ?
Gusunɔ u dera gɔribun yĩiyɔbu bu koora saa u win Bii gɔrima u gu bεsεn sɔ̃. N mεn na sikurabu bu sun Yehofan kĩru ka win durom mε mu ǹ sãa bεsεn kookoosun are, sɔ̃ɔsimɔ. Sanam mε gɔribu ba koo wurama wãaru sɔɔ, ben wara ya nun nεni kam kam a wa?—A Yohanu 3:16; Romu 6:23 gario.
