“Tikki marumur 15 taon au, huoloi do sude aturan ni natua-tuakku. Alai saonari dung marumur 19 taon au, lam godang ma nian kebebasan na dilehon nasida tu au. Unang be sai diatur-atur.”​—Sylvia.

 Songon perasaan ni si Sylvia do dihilala ho? Molo songon i, artikel on ma na boi mangurupi ho mambahas situasimi dohot natua-tuam.

•  Na porlu diboto ho

•  Aha do na boi diulahon ho

•  Aha do na didok akka donganmu

 Sebelum makkatai ho dohot natua-tuam taringot aturan ni nasida, pikkirhon ma jo on:

•  Molo dang adong aturan, kacau do ngolutta. Bayakkon ma lagi di dalan na rame ho. Boha do molo dang adong rambu lalu lintas, lampu lalu lintas, dohot tanda batas kecepatan di dalan i? Aturan na dibahen natua-tuam pe dos do songon aturan lalu lintas i. Boi do i manjaga asa taratur ngolum.

•  Dibahen natua-tuam do aturan ala parduli nasida tu ho. Molo dang dibahen natua-tuam aturan, bisa jadi na so diatturehon natua-tuam do ho. Pasti dang lomo roham songon i natua-tuam kan?

 DIBOTO HO DO? Akka natua-tua pe porlu do mangihutton aturan na dibahen tu nasida! Pareso ma contohna di 1 Musa 2:​24; 5 Musa 6:​6, 7; Epesus 6:4; dohot 1 Timoteus 5:8.

 Alai boha do molo dang cocok aturan ni natua-tuam tu roham?

 Sebelum makkatai, pikkiri ma jo. Nungnga dioloi ho aturan ni natua-tuam saleleng on? Molo dang dope, dang saonari dope tikkina mangido asa dilehon lam godang kebebasan tu ho. Jolo jaha ma jo artikel “Songon dia do asa Boi Dihaporseai Natua-tuakku Au?”

 Molo nungnga dioloi ho saleleng on aturan ni natua-tuam, denggan ma pikkiri aha na lao sidokkononmu tu nasida. Boi do muse jolo surattononmu aha na lao sidokkononmi asa diboto ho masuk akkal do i manang na dang. Molo masuk akkal do, sukkun ma tu natua-tuam andigan jala didia do inganan na pas lao makkatai dohot nasida. Dung i tikki makkatai dohot nasida, ingot ma on:

 Sopan ma. Bibel mandok, “Mambahen muruk do hata na kasar.” (Poda 15:1) Jadi ingot ma on: Molo muruk do ho makkatai tu natua-tuam manang didok ho palobihu do aturan ni nasida i, pasti gabe dang denggan be annon pakkataionmuna i.

 “Molo huargai natua-tuakku, gabe diargai nasida ma tong au. Gabe ummura ma hami mardos ni roha.”​—Bianca, 19.

 Tangihon ma. Bibel mandok, “Ikkon hatop manangihon, manat makkatai.” (Jakobus 1:​19) Ingot ma, na makkata-hatai do ho dohot natua-tuam, dang na manjamitai nasida.

 “Lam dewasa hita, olo do tahilala ummalo hita sian natua-tuatta. Alai sasittongna dang songon i. Porlu dope hita torus dipodai jala diajari nasida.”​—Devan, 20.

 Pikkirhon ma perasaan ni natua-tuam. Coba ma pikkiri sian sudut pandang ni natua-tuam boasa dibahen nasida aturan i. Ihutton ma poda ni Bibel na mandok, “Unang ma holan mamparrohahon na porlu di hamu, alai parrohahon ma na porlu di na asing.” (Pilippi 2:4) Jadi unang ma holan dirim sandiri na dipikkiri ho, alai pikkirhon ma perasaan ni natua-tuam.

 “Najolo huanggap do natua-tuakku alokku dang donganku. Alai saonari husadari ma nasida pe marsiajar dope gabe natua-tua na burju, songon au na marsiajar gabe halak na dewasa. Sude na diulahon nasida i alani holongna do tu au.”​—Joshua, 21.

 Paboa ma solusina. Uppamana naeng lao ma ho tu sada acara jala ikkon sajom ma lelengna ho mamboan mobil tusi. Alai dang dipaloas natua-tuam ho lao. Coba ma pikkiri aha do na mambahen nasida dang paloasson ho lao. Alani dao ni pardalanan i do? Manang alani acarana?

•   Molo alani dao ni pardalanan i do, boha molo ditogihon ho donganmu na malo mamboan mobil?

•   Molo alani acarana do, boha molo dipaboa ho tu natua-tuam akka ise na ro tu acara i jala ise na mangawasi?

 Ingot ma ikkon sopan do ho makkatai jala sabar manangihon natua-tuam makkatai. Patudu ma sian hatam dohot pambahenanmu na ‘dipasangap ho omakmu dohot bapakmu’. (Epesus 6:​2, 3) Gabe muba do annon keputusan ni natua-tuam? Mungkin muba, mungkin daong. Alai nang pe songon i . . .

 Argai ma keputusan ni natua-tuam. Langkah na penting do on alai jotjot dilupahon. Molo dang saut na pinangido ni roham jala gabe marbadai ho dohot natua-tuam, ujungna gabe maol ma ho muse makkatai taringot aturan ni natua-tuam di tikki na asing. Alai molo dioloi ho do keputusan ni nasida, gabe lam godang ma kebebasan na dilehon nasida tu ho haduan.