Asli Dope Isi ni Bibel i?

PANGOLU

Ido. Saleleng marribu taon, nungnga mulak-ulak disalin isi ni Bibel tu akka bahan na mura sega. Nang pe songon i, dang muba dope isina molo dibandingkon tu akka manuskrip a naung leleng.

Boi do tadok dang adong kesalahan tikki disalin isi ni Bibel?

Nungnga marribu manuskrip naung leleng na boi dipareso saonari. Molo dibandingkon isi ni akka manuskrip i, adong do memang piga-piga perbedaan. Alai molo tung pe adong perbedaan i, holan otik do i jala dang gabe muba isina. Molo adong perbedaan na balga di piga-piga manuskrip, biasana ala na adong do na sengaja naeng manguba isi ni Bibel. Taida ma dua contohna:

Di piga-piga terjemahan Bibel naung leleng, dibahen do isi ni 1 Johannes 5:7 gabe, “di surgo adong do Ama i, Hata i, dohot Tondi Parbadia. Jala sada do na tolu i.” Alai molo tapareso akka manuskrip ni Bibel, dang songon i isi ni ayat i di teks aslina. Na ditamba-tambai do i. b Alani i ma, dang songon i isi ni ayat i di piga-piga terjemahan Bibel na saonari.
Marribu do disuratton goar ni Debata di akka manuskrip ni Bibel. Alai godang do terjemahan ni Bibel na manggatti goar i gabe gelar songon “Tuhan” manang “Debata”.

Boi do pos rohatta dang adong kesalahan na asing di akka salinan ni Bibel?

Saonari nungnga godang manuskrip na boi tapareso. Alani i mura ma taboto molo adong na sala. c Molo tabandingkon akka manuskrip i, sarupa dope isi ni Bibel saonari tu teks aslina?

Songon on ma na didok sahalak pakar na margoar William H. Green taringot Akka Bukku Heber manang na digoari Perjanjian Lama, “Molo dibandingkon tu akka bukku naung leleng, holan on ma na sarupa dope isina tu teks aslina.”
Taringot Akka Bukku Junani Kristen manang “Perjanjian Baru”, adong sahalak pakar ni Bibel na margoar F. F. Bruce mandok, “Sude do halak porsea tu akka bukku na disurat najolo. Hape otik do bukti na patuduhon asli dope isi ni akka buku i. Unggodang do bukti na patuduhon asli do isi ni Perjanjian Baru.”
Sahalak pakar ni manuskrip Bibel na margoar Sir Frederic Kenyon mandok, “Boi do pos rohatta Hata ni Debata do Bibel i. Nang pe nungnga piga-piga hali Bibel disalin saleleng marabad-abad, alai pas dope isina songon teks aslina.”

Aha do buktina na so muba dope isi ni Bibel nang pe nungnga mulak-ulak i disalin?

Di salinan Bibel na dibahen halak Jahudi dohot halak Kristen, disurat nasida do disi taringot dosa na balga na dibahen naposo ni Debata. d (4 Musa 20:12; 2 Samuel 11:2-4; Galatia 2:11-14) Dipaboa nasida do muse disi taringot halak Jahudi na so mangoloi Debata dohot taringot akka ajaran na dibahen jolma. (Hosea 4:2; Maleaki 2:8, 9; Mateus 23:8, 9; 1 Johannes 5:21) Ala pas do sude disurat nasida songon teks aslina, on patuduhon na porsea do nasida tu Hata ni Debata jala diargai nasida do i.
Sian Debata do sude isi ni Bibel. Jadi pasti ma boi bahenonna manang aha pe asa unang muba isi ni Bibel i. e (Jesaya 40:8; 1 Petrus 1:24, 25) Asing ni i, lomo do roha ni Debata asa unang holan tu halak najolo marguna Bibel on, dohot ma nian marguna tu akka halak na mangolu saonari. (1 Korint 10:11) Bibel mandok, “Nasa na tarsurat hian, disurat do i lao mangajari hita asa taboto aha na lao paboaon ni Debata tu hita. Ai diurupi na tarsurat i do hita asa pos rohatta tu janji ni Debata, asa margogo, jala togu manaon sitaonon.”—Rom 15:4.
Hea do Jesus dohot akka halak na mangihutton ibana mamakke salinan ni Akka Bukku Heber. Jala pos do roha ni nasida pas dope isi ni akka salinan i tu teks aslina.—Lukas 4:16-21; Ulaon ni Apostel 17:1-3.

a Manuskrip lapatanna, akka gulungan naung leleng na disurat tangan, termasuk ma i salinan ni akka bagian ni Bibel najolo. Sian kulit ni binatang manang sian kulit ni hau do dibahen gulungan i.

b Dang songon i isi ni ayat i di Kodeks Sinaitikus, di Kodeks Aleksandrinus, di Manuskrip Vatikanus 1209, di naskah asli Vulgata Latin, di Philoxenian-Harclean versi bahasa Siria, manang di Pesyita Siria.

c Contohna, lobi sian 5.000 manuskrip Akka Bukku Junani Kristen manang manuskrip Perjanjian baru nungnga dipareso.

d Dang adong didok di Bibel jolma na sempurna na manalin isi ni Bibel. Bibel mandok, “Dang adong jolma na so mardosa.”—1 Raja-Raja 8:46.

e Nang pe dang dipaboa Debata ganup hata na ikkon disuratton panurat ni Bibel, alai diurupi Debata do nasida manuratton pikkiranna.—2 Timoteus 3:16, 17; 2 Petrus 1:21.