Akka Ise do na Lao tu Surgo?
Na didok Bibel
Nungnga ditottuhon Debata sadia godang halak Kristen na setia na dipahehe lao mangolu tu surgo. (1 Petrus 1:3, 4) Molo nga dipillit nasida, ikkon toktong do togu haporsaon ni nasida, jala ikkon toktong do dijaga nasida ias pangalahona asa boi dapot ni nasida harapan lao mangolu tu surgo.—Epesus 5:5; Pilippi 3:12-14.
Aha do na lao diulahon nasida di surgo?
Lao mamaretta ma nasida gabe raja jala gabe malim rap dohot Jesus saleleng 1.000 taon. (Pangungkapon 5:9, 10; 20:6) Lao dibahen nasida ma “langit na imbaru” manang pamarettaon di surgo, jala mamaretta ma nasida tu “tano na imbaru” manang tu sude jolma di portibi on. Akka raja na mamaretta di surgo, lao mangurupi akka jolma asa gabe sempurna muse jala mambahen denggan sude situasina songon tujuan ni Debata na parjolo sahali.—Jesaya 65:17; 2 Petrus 3:13.
Piga halak do jumlah ni halak na lao tu surgo?
Didok Bibel, adong 144.000 halak na lao dipahehe na lao mangolu di surgo. (Pangungkapon 7:4) Songon di parnidaan ni si Johannes na disurat di Pangungkapon 14:1-3, diida ibana do “Anak ni Biru-Biru i jongjong di Dolok Sion. Rap do ibana dohot 144.000 halak”. Di parnidaan i, “Anak ni Biru-Biru” i manggombarhon Jesus naung dipahehe. (Johannes 1:29; 1 Petrus 1:19) “Dolok Sion” manggombarhon Jesus dohot 144.000 naung dilantik gabe raja di surgo.—Psalmen 2:6; Heber 12:22.
Akka halak ‘na tarjou, dohot na tarpillit’ na lao mamaretta rap dohot Kristus di Harajaon ni Debata didok ma nasida “punguan na metmet”. (Pangungkapon 17:14; Lukas 12:32) On patuduhon, otik do jumlah ni halak na lao mangolu tu surgo dibandingkon tu sude biru-biru ni Jesus na asing.—Johannes 10:16.
Pandapot na sala taringot akka halak na lao tu surgo
Pandapot na sala: Sude halak na burju lao tu surgo.
Na sasittongna: Marjanji do Debata na lao unggodang do akka halak na burju na lao mangolu salelengna di tano on.—Psalmen 37:11, 29, 34.
Didok Jesus, “Dang adong jolma na hea nakkok tu banua ginjang.” (Johannes 3:13) On patuduhon, sebelum mate Jesus dang tu surgo akka halak na burju dung mate, songon si Abraham, si Musa, si Job, dohot si Daud. (Ulaon ni Apostel 2:29, 34) Alai, lao di tano on do nasida haduan lao dipahehe.—Job 14:13-15.
Haheheon lao mangolu di surgo, didok do i “haheheon na parjolo”. (Pangungkapon 20:6) On patuduhon, adong dope haheheon na asing, i ma haheheon ni akka halak na lao mangolu di tano on.
Didok di Bibel, molo dung mamaretta Harajaon ni Debata, “dang adong be hamatean”. (Pangungkapon 21:3, 4) Lao di tano on do saut janji na didok di ayat on. Alana dang hea adong hamatean di surgo.
Pandapot na sala: Sude do halak boi mamillit lao mangolu di surgo manang di tano on.
Na sasittongna: Debata do na manottuhon ise halak Kristen na setia ‘na lao mandapot upa tikki dijou’, i ma akka halak na lao mangolu di surgo. (Pilippi 3:14) Dang adong pengaruh ni na dipillit sasahalak lao didia ibana mangolu tu keputusan naung dibahen Debata.—Mateus 20:20-23.
Pandapot na sala: Harapan lao mangolu di tano on, i ma harapan tu akka halak na so layak mangolu di surgo.
Na sasittongna: Akka halak na lao mangolu di tano on, didok Debata do nasida ‘bangsokku’, “akka halak na hupillit”, dohot “pinoppar na dipasu-pasu Jahowa”. (Jesaya 65:21-23) Nasida ma na lao pasautton tujuan ni Debata na parjolo tu jolma, i ma mangolu salelengna di tano on jala sempurna.—1 Musa 1:28; Psalmen 115:16; Jesaya 45:18.
Pandapot na sala: Holan simbol do angka 144.000 na didok di bukku Pangungkapon.
Na sasittongna: Nang pe adong piga-piga angka na dipaboa di bukku Pangungkapon holan simbol, alai adong do sebagian na dipaboa di bukku Pangungkapon i dang holan simbol. Contohna, di bukku i didok do taringot ‘12 goar ni 12 apostel ni Anak ni Biru-Biru’. (Pangungkapon 21:14) Parrohahon ma akka bukti sian bukku on, molo angka 144.000 dang simbol. Alai angka na sasittongna do i.
Di Pangungkapon 7:4 didok, “godang ni halak na hona materai i [manang akka halak na lao mangolu di surgo], 144.000 halak”. Molo dibandikkon tu ayat na selanjutna, adong didok “punguan bolon na so taretong ni jolma godangna”. Akka “punguan bolon” on dohot do tong diselamatton Debata. (Pangungkapon 7:9, 10) Molo holan simbol do angka 144.000 i, jala angka i lao paboahon taringot punguan ni halak na so taretong godangna, gabe dang masuk akkal be na didok di dua ayat i. a
Asing ni i, 144.000 on ma na ‘dituhor sian tonga-tonga ni jolma. Nasida ma na gabe hasil panen na parjolo’. (Pangungkapon 14:4) Hata “hasil panen na parjolo” patuduhon, na otik do nasida na dipillit. Jadi cocok ma on manggombarhon akka halak na lao mamaretta rap dohot Kristus di surgo. Jala akka na so taretong godangna, nasida ma na gabe rakyat di tano on.—Pangungkapon 5:10.
a Songon i do tong na didok Professor Robert L. Thomas taringot angka 144.000 na disurat di Pangungkapon 7:4. Didok ibana, “Angka na pasti do on. Asing do on sian angka na mandok na so taretong godangna na disurat di Pangungkapon 7:9. Molo holan simbol do angka 144.000 i, berarti sude angka na disurat di bukku Pangungkapon dang adong angka na sasittongna.”—Pangungkapon 1-7: An Exegetical Commentary halaman 474.
Mungkin Lomo do Rohamuna Mamboto
AJARAN NI BIBEL NA PENTING
Aha do Harajaon ni Debata I?
Tikki di tano on Jesus, taringot Harajaon ni Debata do na paling sering dipaboa ibana. Saleleng marratus taon, sai ditangiakkon akka halak do asa ro Harajaon ni Debata.
NA DIAJARHON DI BIBEL
Coba ma Marsiajar Bibel Dohot Hami
Dohot ma hamu marsiajar Bibel gratis na langsung diurupi sasahalak.