1 Samuel 11:1-15
11 Dung i ro ma si Nahas raja ni halak Ammon+ dohot akka tentarana. Markemah ma nasida lao mangalo halak Jabes+ na di Gilead. Didok halak Jabes ma tu si Nahas, “Bahen ma parjanjian dohot hami asa huoloi hami ho.”
2 Didok si Nahas raja ni halak Ammon i ma, “Olo pe au mambahen parjanjian dohot hamu. Alai ikkon jolo hupulsikkon do matamuna sude na sabola kanan lao pailahon halak Israel.”
3 Didok akka pangituai* ni halak Jabes ma tu si Nahas, “Lehon ma jo tikki tu hami pitu ari on, asa husuru hami halak tu sude huta ni halak Israel. Molo dang adong na paluahon hami, bahen hamu ma lomomuna tu hami.”
4 Dung sahat akka halak na disuru i tu Gibea+ huta ni si Saul, dipaboa nasida ma sude na masa i tu akka halak na disi. Gabe mangangguki ma akka halak na disi mambege na masa i.
5 Tikki i, baru ro do si Saul sian ladang mamboan akka binatang na dipiaro ibana. Disukkun ibana ma, “Aha na masa? Boasa mangangguki nasida?” Dung i dipaboa nasida ma tu ibana na nidok ni halak Jabes i.
6 Dung dibege si Saul na masa i, songgop ma tondi parbadia ni Debata tu ibana,+ gabe muruk situtu ma ibana.
7 Dibuat si Saul ma dua lombu jantan jala ditanggoi ma i. Disuru ibana ma akka halak mamboan i tu sude luat ni halak Israel. Jala disuru do nasida mandok, “Manang ise na so olo mangihutton si Saul dohot si Samuel, ikkon ditanggoi do lombuna songon na huboan hami on!” Gabe mabiar ma bangso i tu Jahowa jala marsada ma nasida mangoloi hata i.
8 Dietong si Saul ma godang ni nasida di Besek. Adong ma 300.000 godang ni halak Israel jala adong 30.000 godang ni halak Juda.
9 Didok nasida ma tu akka halak na sian Jabes i, “Songon on ma dok tu halak Jabes na di Gilead, ‘Marsogot hira-hira tonga ari, paluaonnami do hamu.’” Dung i lao ma halak na sian Jabes i jala dipaboa ma i tu halak Jabes. Gabe las ma roha ni nasida.
10 Didok halak Jabes ma tu halak Ammon, “Marsogot, bahen hamu ma tu hami manang aha pe lomo ni rohamuna,+ huoloi hami pe hamu.”
11 Marsogotna i, dibagi si Saul ma akka tentarana i gabe tolu punguan. Masuk ma nasida tu tonga-tonga ni perkemahan i tikki manogot.* Jala dipamate nasida ma halak Ammon+ sahat tu tonga ari. Marserak ma akka halak na malua. Masiboan dalanna be ma ganup halak, dang adong na rap dohot donganna.
12 Dung i didok bangso Israel ma tu si Samuel, “Ise do halak na mandok, ‘Tung si Saul ma na gabe rajatta?’+ Pasahat ma nasida tu hami, asa hupamate hami nasida.”
13 Alai didok si Saul ma, “Dang adong na boi dipamate nanggo sahalak pe sadari on.+ Ai nungnga dipalua Jahowa halak Israel sadari on.”
14 Dung i didok si Samuel ma tu bangso i, “Beta ma lao tu Gilgal+ asa tapaboa muse naung sah si Saul gabe rajatta.”+
15 Alani i lao ma sude halak Israel tu Gilgal jala dibahen ma si Saul gabe raja di jolo ni Jahowa. Dilehon nasida ma pelean pardamean* di jolo ni Jahowa.+ Jala marlas ni roha ma si Saul dohot sude halak Israel.+
