2 Samuel 11:1-27
11 Di mula ni taon,* somal do akka raja marporang. Alani i, disuru si Daud ma si Joab, akka parkarejona, dohot sude tentara ni Israel marporang mangalo halak Ammon. Alai di Jerusalem do si Daud tinggal.+ Dung i lao ma nasida marporang tu Rabba.+
2 Tikki naeng borngin, dungo ma si Daud sian podomanna. Mardalan-dalan ma ibana di atap* ni istanana. Diida ibana ma sian i sahalak borua maridi jala massai bagak do borua i.
3 Disuru si Daud ma halak manukkun ise do borua i. Jala didok ma tu si Daud, “Si Bat-seba+ do ibana, boru ni si Eliam+ istri ni si Uria+ halak Het i.”+
4 Disuru si Daud ma halak mangalap borua i.+ Ro ma borua i jala rap modom ma ibana dohot si Daud.+ (On masa dung sae si Bat-seba paiasson dirina.*)+ Dung i, mulak ma ibana tu jabuna.
5 Hamil ma borua i, jala disuru ibana ma halak paboahon tu si Daud naung hamil ibana.
6 Dung diboto si Daud i, disuru ibana ma halak mandok tu si Joab, “Suru jo si Uria halak Het i mandapotton au.” Dung i disuru si Joab ma si Uria mandapotton si Daud.
7 Tikki sahat si Uria, disukkun si Daud ma tu ibana taringot si Joab, taringot akka tentarana, dohot taringot parporangan i.
8 Didok si Daud ma tu si Uria, “Mulak ma ho tu jabum jala modom ma ho.”* Dung kaluar si Uria sian istana, disuru raja ma halak manaruhon hadiah* tu ibana.
9 Alai dang mulak si Uria tu jabuna. Modom di gerbang ni istana do ibana rap dohot akka tentara ni raja na asing.
10 Adong ma halak na paboahon tu si Daud na so mulak si Uria tu jabuna. Alani i, didok ibana ma tu si Uria, “Ai on dope ho mulak, boasa dang lao ho tu jabumu?”
11 Didok si Uria ma tu si Daud, “Marsumpa ma au di jolom, dang bahenokku songon i! Ai di kemah do nuaeng poti parpadanan,+ halak Israel, dohot halak Juda. Tuanku si Joab pe dohot akka tentarana markemah di luar ni kota do. Alani i songon pastina ho mangolu,* dang tarbahen au mulak tu jabukku, mangan, minum, jala modom rap dohot istrikku.”+
12 Gabe ninna si Daud ma tu si Uria, “Attong dison ma ho sadari on, marsogot pe ho husuru lao marporang.” Gabe tinggal di Jerusalem ma si Uria di ari i dohot marsogotna i.
13 Dijou si Daud ma si Uria asa mangan minum rap dohot ibana. Dibahen si Daud do mabuk si Uria. Alai dung borngin, dang mulak ibana tu jabuna. Modom rap dohot akka tentara ni si Daud do ibana.
14 Dung manogot, dibahen si Daud ma surat tu si Joab jala disuru ibana ma si Uria mangalehon surat i.
15 Didok si Daud ma di suratna i, “Bahen ma si Uria di baris na parjolo. Ai ubborat do tu barisan na parjolo i ro paraloan. Dung i tinggalhon hamu ma ibana sahalakna, asa dibunu ibana.”+
16 Nungnga manat diparrohahon si Joab kota i. Diboto ibana do didia akka tentara na unjago jala tusi ma si Uria disuru ibana.
17 Kaluar ma akka tentara sian kota i lao marporang mangalo si Joab. Adong do piga-piga tentara ni si Daud na mate jala dohot do si Uria halak Het i mate.+
18 Disuru si Joab ma sasahalak paboahon na masa di parporangan i tu si Daud.
19 Didok si Joab ma tu ibana, “Dung dipaboa ho sude na masa taringot tu parporangan i tu raja i,
20 olo do ra muruk raja i jala dohononna ma tu ho, ‘Ai boasa jonok hian hamu marporang tu kota i? Na so diboto hamu do boi dipanah nasida hamu sian ginjang ni tembok i?
21 Na so diingot hamu do ise na pamatehon si Abimelek+ anak ni si Jerubbeset?*+ Mate do ibana di Tebes, ala didabuhon sahalak borua batu gilingan tu ibana sian ginjang ni tembok. Jadi, boasa jonok hian hamu marporang tu kota i?’ Dung i dok ma, ‘Naposom, si Uria halak Het i pe mate do.’”
22 Dung i lao ma halak na sinuru ni si Joab i, jala dipaboa ma sude hata ni si Joab i tu si Daud.
23 Didok ibana ma tu si Daud, “Umgogo do tentara ni musu i sian hami. Kaluar do nasida mangalo hami tu luar ni kota, alai gabe mundur do hubahen hami nasida sahat tu gerbang ni kota.
24 Gabe dipanah ma akka tentaram sian ginjang ni tembok ni kota i jala mate do piga-piga tentaram. Dohot do naposom si Uria halak Het i mate.”+
25 Dung dibege si Daud na masa i, didok ibana ma tu halak na sinuru ni si Joab i, “Songon on ma dokkon tu si Joab, ‘Unang pola marsak ho alani i. Manang ise pe boi do mate di parporangan. Alai, bahen hamu ma muse serangan na unjago lao manaluhon kota i.’+ Songon i ma dokkon lao patoguhon rohana.”
26 Dung diboto si Bat-seba naung mate si Uria suamina i, sai mangandungi ma ibana.
27 Tikki dang marsak be si Bat-seba, disuru si Daud ma halak mangalap ibana asa diboan tu istana. Dibahen si Daud ma ibana gabe istrina+ jala ditubuhon ma sada anak. Alai, massai sogo do roha* ni Jahowa tu pambahenan ni si Daud i.+
Surat na di toru
^ Hira-hira di bulan April tikki musim panas. Ida Lampiran B15.
^ Godang jabu atapna dosdos jala somal do disi nasida mangulahon akka ulaon.
^ Ra ibana paiasson diri ala haid.
^ Manang “bagian ni raja”. Bagian na dikirim tu tamu na massai sangap.
^ As. “jala sussi ma patmu”.
^ Sumpa on patuduhon pasti do ikkon saut janji on.
^ Sarupa do on tu si Jerubbaal manang si Gidion (Pangh 6:32).
^ As. “massai jahat do i di mata”.
