4 Musa 20:1-29
20 Di bulan na parjolo, sahat ma sude halak Israel di Gurun Zin. Tinggal ma nasida di Kades.+ Disi ma si Miryam+ mate jala dikuburhon.
2 Di sada tikki, dang juppang ni bangso i aek di nasida.+ Alani i, marpungu ma nasida lao mangalo si Musa dohot si Aron.
3 Marsoal ma halak Israel dohot si Musa.+ Didok ma, “Tumagon hian do mate hami rap dohot akka haha angginami i di jolo ni Jahowa!
4 Boasa ma pola boanonmu bangso ni Jahowa on tu gurun on? Na lao pamateonmu do hami dison rap dohot binatang na hupiaro hami?+
5 Boasa ma pola boanonmu hami kaluar sian Mesir tu inganan na ngeri on?+ Ai so tubu manang aha dison, so tubu dison hau ara, anggur, dohot delima. Haru aek pe so adong dison.”+
6 Lao ma si Musa dohot si Aron sian jolo ni bangso i. Lao ma nasida tu pintu kemah parpunguan. Marsinggang ma nasida disi. Dung i, diida nasida ma marsinondang hamuliaon ni Jahowa.+
7 Didok Jahowa ma tu si Musa,
8 “Buat ma tukkotmi. Jala lao ma ho dohot abangmu si Aron manjou bangso i marpungu. Di jolo ni nasida, dokkon ma tu dolok batu i asa dipakaluar aek. Ai sian dolok batu i do pakaluaronmu aek lao inumon ni nasida. Dung i, lehon ma aek i inumon ni nasida dohot akka binatang na dipiaro nasida.”+
9 Dibuat si Musa ma tukkotna i sian jolo ni Jahowa,+ songon na diparettahon i tu ibana.
10 Dung i dijou si Musa dohot si Aron ma bangso i asa ro nasida marpungu di jolo ni dolok batu i. Didok ma tu bangso i, “Hamu ale akka pangalo, bege hamu ma! Ikkon pakaluaronnami do di hamu aek sian dolok batu on?”+
11 Diangkat si Musa ma tanganna, jala diattuk ibana ma dolok batu i pakke tukkotna dua hali. Dung i, kaluar ma aek massai godang sian batu i. Minum ma bangso i dohot akka binatang ni nasida.+
12 Didok Jahowa ma muse tu si Musa dohot tu si Aron, “Dang porsea hamu tu Au, jala dang dipasangap hamu Au di jolo ni bangso Israel marhite patuduhon na badia Au. Alani i, dang hamu be na mamboan bangso on tu luat na lao lehonokki tu nasida.”+
13 On ma Mual Meriba.*+ Disi do halak Israel marsoal dohot Jahowa. Jala di tikki i do dipatudu Ibana tu nasida na Debata na badia Ibana.
14 Disuru si Musa ma halak sian Kades mandapotton raja ni halak Edom.+ Didok halak na sinuruna i ma, “Songon on do hata ni halak Israel anggimi,+ ‘Takkas do diboto ho tuan songon dia sitaononnami.
15 Najolo, lao do akka ompunami tu Mesir.+ Jala leleng do hami tinggal disi.+ Alai porsuk do ngolunami dohot akka ompunami dibahen halak Mesir.+
16 Mangangguki ma hami tu Jahowa.+ Jala ditangihon Ibana do hami. Disuru Ibana ma suru-suruanna.+ Diboan ma hami kaluar sian Mesir. Saonari nungnga sahat hami di Kades, kota parbatasan ni luat ni tuan on.
17 Alani i, paloas ma hami mamolus sian luat ni tuan on. Dang pola lewat hami sian ladang manang porlak anggur. Dang pola huinum hami aek na sian sumur manang na didia pe di luatmon. Holan mardalan sian Dalan ni Raja* i pe hami, dang pola manirpang hami tu kiri manang na tu kanan sappe tu na sae hubolus hami luat ni tuan on.’”+
18 Alai didok raja ni halak Edom ma, “Dang boi hamu lewat sian luatnami on. Molo lewat hamu, ro ma au mamboan podang lao mangalo hamu.”
19 Didok halak Israel i ma tu ibana, “Holan na lewat sian jalan raya i do hami. Molo adong pe sian hami manang binatang na hupiaro hami manginum aek ni tuan, hugarar hami pe.+ Holan na lewat sabbing do hami tuan.”+
20 Alai didok raja i ma, “Dang boi hamu lewat.”+ Dung i ro ma raja ni halak Edom rap dohot akka tentarana na godang jala na gogo mangalo halak Israel.
21 Songon i ma raja ni halak Edom i mangabbati halak Israel lewat sian luatna i. Alani i, mamutar ma halak Israel i.+
22 Borhat ma bangso i, i ma sude halak Israel i sian Kades, jala sahat ma nasida di Dolok Hor.+
23 Makkatai ma Jahowa tu si Musa dohot tu si Aron di Dolok Hor, di parbatasan ni huta Edom. Didok ma,
24 “Mate nama si Aron, jala dikuburhon songon akka ompuna.*+ Dang boi ibana dohot masuk tu luat na lao hulehon i tu halak Israel. Ai dialo hamu na dua do parettakku taringot tu Mual Meriba i.+
25 Togihon ma si Aron dohot si Eleasar anakna i nakkok tu Dolok Hor.
26 Bukka ma baju malim na dipakke si Aron i,+ jala pakkehon ma i tu anakna si Eleasar.+ Ai mate disi nama si Aron.”*
27 Diulahon si Musa ma songon i dos songon na diparettahon Jahowa. Nakkok ma nasida tu Dolok Hor, jala sude do bangso i mangida nasida.
28 Dibukka si Musa ma baju malim ni si Aron i, jala dipakkehon ma i tu anakna si Eleasar. Mate ma si Aron di pussu ni dolok i.+ Dung i, turun ma si Musa dohot si Eleasar sian dolok i.
29 Tikki diboto bangso i naung mate si Aron, mangandungi ma nasida sude saleleng 30 ari.+
Surat na di toru
^ Lapatanna, “Marsoal”.
^ Na nidokna, i ma jalan raya.
^ As. “dipapungu ma ibana tu akka ompuna”. Puisi lao manggombarhon hamatean.
^ As. “Ai disi nama ibana dipapungu jala mate”.
