Na disurat si Mateus 20:1-34
20 “Tudos do Harajaon banua ginjang i tu sahalak nappuna ladang anggur. Sogot dope ari, lao ma ibana mangalului halak lao karejo di ladang anggurna.+
2 Didok ibana ma tu akka parkarejo i na lehononna do sadinar* gaji ni karejo sadari, jala setuju ma nasida. Dung i disuru ma nasida karejo di ladang anggurna.
3 Hira-hira jam sia manogot,* lao ma ibana muse tu pasar. Diida ibana ma disi halak na asing, na sai jongjong jala dang adong karejona.
4 Didok ma tu nasida, ‘Dohot ma hamu karejo tu ladang anggurhu, hulehon pe gaji na patut tu hamu.’
5 Jadi, borhat ma nasida. Dung i, songon i ma muse dibahen nappuna ladang anggur hira-hira jam 12 arian* dohot jam 3 botari.*
6 Lao ma ibana muse hira-hira jam lima botari,* juppangna ma halak na asing na jongjong sabbing dang adong karejona. Gabe didok ibana ma tu nasida, ‘Boasa sai jongjong hamu dison jala dang karejo?’
7 Dialusi nasida ma, ‘Dang adong na olo manggaji hami.’ Didok ibana ma tu nasida, ‘Molo songon i, tu ladang anggurhu ma hamu karejo.’
8 “Dung holom ari, didok nappuna ladang anggur i ma tu mandorna, ‘Jou ma akka parkarejo i jala garar ma gaji ni nasida,+ mulai sian na masuk parpudi sahat tu na masuk parjolo.’
9 Dung i ro ma halak na masuk jam lima botari, ganup ma nasida manjalo sadinar.*
10 Jadi tikki ro akka halak na parjolo masuk i, dirippu nasida ma unggodang gaji ni nasida. Hape tong do sadinar* na dilehon tu nasida.
11 Tikki dijalo nasida gajina i, marungut-ungut ma nasida tu nappuna ladang i.
12 Didok nasida ma, ‘Holan sajom do karejo halak na parpudi masuk i, hape hami nungnga karejo sadari manipat didadang las ni ari, alai sarupa do dilehon ho gajinami!’
13 Gabe didok nappuna ladang anggur i ma tu sahalak sian nasida, ‘Ale dongan, dang adong salakku tu ho. Kan nungnga setuju hamu sadinar* jaloonmuna gajimuna?+
14 Jalo ma gajimi jala lao ma ho. Ai naeng lehonokku do sarupa gaji ni na parpudi i dohot gajimuna.
15 Kan lomokku do mamakke hepengku? Na gabe cemburu* do ho ala burju au?’+
16 Dukkon dipaboa Jesus i, didok ibana ma, “Suang songon i ma, na parpudi hian gabe parjolo jala na parjolo gabe parpudi.”+
17 Tikki di pardalanan lao tu Jerusalem, ditogihon Jesus ma siseanna na 12 i pulik sian na asing. Didok ibana ma tu nasida,+
18 “Saonari naeng nakkok nama hita tu Jerusalem. Disi ma pasahatonna Anak ni jolma i tu malim kepala* dohot tu siboto surat.* Jala bahenon ni nasida ma hukuman mate tu ibana.+
19 Pasahaton ni nasida ma ibana tu akka bangso na asing asa direhei, dilissingi, jala digattung tu sada hau.+ Alai na lao hehe+ do ibana di ari patoluhon.”
20 Dung i, ro ma istri ni si Sebedeus+ rap dohot akka anakna mandapotton Jesus. Marsinggang ma ibana lao pasahatton pangidoanna.+
21 Didok Jesus ma tu ibana, “Aha na lao pangidoonmu sian au?” Didok ibana ma tu Jesus, “Bahen ma hundul anakku na dua on di labbungmu, sada di kananmu jala sada di kirimu di Harajaonmi.”+
22 Ninna Jesus ma, “Dang diboto hamu manang aha na pinangidomuna. Tolap do hamu minum sian makkuk panginumakki?”+ Dialusi nasida ma ibana, “Tolap.”
23 Didok ibana ma tu nasida, “Tutu do nian, na lao minum do hamu sian makkuk panginumakki.+ Alai dang au na manottuhon ise na lao hundul di sabola kananku manang di kirikku. Damang i do na manottuhon ise na lao hundul disi.”+
24 Tikki dibege sisean na sappulu i taringot i, muruk ma nasida tu dua halak na marhaha maranggi i.+
25 Dijou Jesus ma nasida jala ninna ma, “Diboto hamu do, lomo-lomo ni akka pamaretta ni akka bangso na asing do mamaretta rakyatna jala dipakke akka pamimpin do huasona lao mangarajai rakyatna.+
26 Alai unang ma songon i hamu,+ manang ise na naeng sangap di tonga-tongamuna ikkon rade do ibana makkobasi na asing.+
27 Jala manang ise sian hamu na naeng parjolo, ikkon gabe hatoban ni na asing do ibana.+
28 Songon Anak ni jolma i, dang na lao dihobasi ibana umbahen na ro. Alai ro do ibana lao marhobas tu na asing+ jala mangalehon ngoluna lao manobus godang jolma.”+
29 Tikki kaluar nasida sian Jeriko, godang ma halak na mangihutton ibana.
30 Adong ma dua halak na mapitung na hundul di pinggir dalan. Dibege nasida ma Jesus mamolus sian i. Gabe joujou ma nasida, ninna ma, “Tuan, Anak ni si Daud,+ asi ma roham tu hami!”
31 Gabe muruk ma akka halak na disi tu nasida jala disuru ma nasida sip. Alai lam gogo do didok, “Tuan, Anak ni si Daud, asi ma roham tu hami!”
32 Alani i, so ma Jesus jala dijou ma nasida, ninna ma, “Aha na dipangido hamu lao bahenokku tu hamu?”
33 Didok nasida ma, “Tuan, bahen ma asa marnida hami.”
34 Gabe asi ma roha ni Jesus, dung i dijama ibana ma mata ni nasida.+ Laos di tikki i, boi ma nasida marnida jala diihutton nasida ma ibana.
Surat na di toru
^ Ida Lampiran B14.
^ As. “jam patoluhon”.
^ As. “jam paonomhon”.
^ As. “jam pasiahon.”
^ As. “jam pasappulu sadahon.”
^ Ida Lampiran B14.
^ Ida Lampiran B14.
^ Ida Lampiran B14.
^ As. “roa; jahat”.
^ Manang “juru tulis”.
