1, 2. Aha do na pinangido ni si Samuel tu halak Israel, jala boasa dipangido si Samuel asa marhamubaon nasida?

DIJOU panurirang Samuel ma halak Israel asa marpungu di Gilgal. Nunga matua si Samuel. Nunga leleng ibana gabe panurirang jala panguhum di Israel. Ari logo do tingki i di Israel, jala nunga jonok gotilon, hirahira bulan Mei manang Juni ma i di kalenderta saonari. Hohom do sude halak Israel na ro tu inganan i. Songon dia do bahenon ni si Samuel mangurupi nasida?

² Dipangido halak Israel do asa dipajongjong di nasida sada raja. Ndang diboto nasida molo pangidoan i, mambahen sogo roha ni Jahowa dohot panurirangNa. Sasintongna, Jahowa do na tinulakna gabe rajanasida! Songon dia do bahenon ni si Samuel mangurupi halak Israel asa marhamubaon?

3, 4. (a) Boasa ditaringoti si Samuel na masa di haposoonna tu halak Israel? (b) Songon dia do haporseaon ni si Samuel marlaba tu hita?

³ Didok si Samuel ma tu bangso i, ”Nunga sarimatua ianggo ahu jala ubanon.” Nunga leleng si Samuel marhobas tu Jahowa. Didok ibana ma muse, ’Nunga huuluhon hamu sian sidakdanakonku rasirasa sadarion.’ (1 Sam. 11:14, 15; 12:2) Nang pe naung matua, diingot si Samuel do na masa tingki poso ibana. Nunga marhobas ibana sian na gelleng di tabernakel. On ma na mambahen ibana marhaporseaon na togu tu Jahowa.

 ⁴ Marsitutu do si Samuel patoguhon haporseaonna tu Jahowa, nang pe jotjot halak Israel ndang marsihohot tu Jahowa. Saonari, marungkil do hita mampartahanhon haporseaon ala hita mangolu di tongatonga ni halak na so marhaporseaon. (Jaha Lukas 18:8.) Taparsiajari ma sitiruon sian si Samuel mulai sian na gelleng dope ibana.

5, 6. Songon dia do na masa tu si Samuel tingki gelleng, alai boasa boi pos roha ni natuatuana adong na manarihon ibana?

⁵ Ndang songon na somal parngoluon ni si Samuel tingki dakdanak. Tingki marumur tolu taon manang lobi, nunga marhobas si Samuel di tabernakel ni Jahowa di Silo. Daona hirahira 30 kilometer sian jabuna di Rama. Dilehon natuatuana do si Samuel marhobas tu Jahowa, jala mambahen ibana halak Nasir saleleng ngoluna. * Na so holong do roha ni natuatuana tu si Samuel?

⁶ Ndang songon i! Diboto nasida do adong na manarihon si Samuel di Silo. Disi do si Eli, sintua ni malim. Adong do angka borua na marhobas di tabernakel, mangulahon ulaon naung ditontuhon.​—2 Mus. 38:8; Pangh. 11:34-40.

7, 8. (a) Songon dia do natuatua ni si Samuel patoguhon rohana? (b) Songon dia do natuatua boi marsiajar sian natuatua ni si Samuel?

⁷ Diboto si Hanna dohot si Elkana do molo anak ni nasida i, anak na pinangido sian Jahowa. Martangiang jala marjanji do si Hanna tu Jahowa na lehononna anakna i marhobas tu Jahowa molo saut pangidoanna i. Ganup taon, dijait si Hanna do baju ganjang jala diboan tu Silo pangkeon ni si Samuel di tabernakel. Tontu, las do roha ni si Samuel ala sai ro do natuatuana tu Silo, jala dipatogu do rohana molo marhobas di tabernakel i sada hak na sumurung.

⁸ Saonari, angka natuatua boi do marsiajar sian si Hanna dohot si Elkana. Godang do natuatua holan mamingkirhon na ringkot di pardagingon, sian na ringkot di partondion tu anakkon ni nasida. Alai, natuatua ni si Samuel manjumolohon na ringkot di partondion, jala mangkorhon do i tu parngoluon ni si Samuel.​—Jaha Poda 22:6.

9, 10. (a) Gombarhon ma songon dia do tabernakel i, jala songon dia do si Samuel mangida i. (Ida surat na di toru.) (b) Aha do ulaon ni si Samuel jala songon dia do angka na poso maniru ibana saonari?

 ⁹ Pingkirhon ma si Samuel magodang, jala marmeami di angka dolok na jonok tu Silo. Sian dolok i, diida ibana ma tu toru tu inganan ni tabernakel ni Jahowa. Inganan na badia do tabernakel i. * Tingki i, holan i do inganan laho manomba Jahowa di portibi on. Nunga 400 taon leleng ni tabernakel i dung dipajongjong si Musa.

¹⁰ Nang pe poso dope si Samuel, nunga lomo rohana marhobas di tabernakel. Disurat di Bibel, ”Anggo si Samuel marhalado di jolo ni Jahowa, jala marsampesampe epod sian hori do dakdanak i.” (1 Sam. 2:18) Baju ganjang na pinangke ni si Samuel, patuduhon ulaonna di tabernakel, i ma mangurupi angka malim. Nang pe ndang pinompar ni malim, alai diurupi si Samuel do ulaon di tabernakel, songon mambungka pintu ni alaman ni tabernakel tingki manogot, jala mangurupi si Eli naung matua. Alai sada tingki, ganggu ma rohana ala adong diida ibana halak na mangulahon na sala di tabernakel.

11, 12. (a) Aha do aturan na so diulahon si Hopni dohot si Pinehas? (b) Aha do hajahaton dohot haramunon na diulahon nasida di tabernakel? (Ida surat na di toru.)

¹¹ Diida si Samuel do adong hajahaton dohot haramunon na diulahon di tabernakel. Dipaboa di Bibel taringot tu si Hopni dohot si Pinehas anak ni si Eli, ”Jolma na jahat sahali do, ndang ditanda nasida Jahowa”. (1 Sam. 2:12) Dipaboa di ayat i, si Hopni dohot si Pinehas ”jolma na jahat”, ala ndang dipasangap nasida Jahowa. Dialo nasida do patik ni Jahowa, jala diulahon angka dosa na asing.

¹² Ditontuhon do di Patik ni Debata ulaon ni angka malim, jala songon dia nasida mamelehon pelean i. Ringkot do on ihuthonon ni nasida, ala pelean i manggombarhon tobusan  na pinarade ni Debata laho manesa dosa ni jolma, jala mambahen nasida boi mandapot pasupasu dohot panogunoguon sian Jahowa. Alai, mangkorhon na roa do ulaon ni si Hopni dohot si Pinehas tu malim na asing, ala dibahen nasida do ramun pelean tu Jahowa. *

13, 14. (a) Aha do pangkorhon ni hajahaton na diulahon di tabernakel tu halak na marsihohot? (b) Aha do na so diulahon si Eli hombar tu tanggung jawab na jinalona?

¹³ Pingkirhon ma songgot ni roha ni si Samuel mangida ulaon ni angka malim na jahat i. Songon dia ma pangkilalaanna tingki diida ro halak na pogos, na burju, na marsitaonon tu tabernakel patoguhon haporseaonna, alai dung sahat di tabernakel gabe mandele jala hansit rohana? Jala, songon dia do pangkilalaanna ala si Hopni dohot si Pinehas mangulahon parmainanon tu angka borua na marhobas di tabernakel? (1 Sam. 2:22) Ra, hirim do roha ni si Samuel boi padengganon ni si Eli sudena i.

¹⁴ Si Eli do sintua ni malim di tingki i, alani i marhak do ibana padengganhon na masa di tabernakel. Marhak do si Eli maminsang ianakhonna. Dung i, ulaon ni anak ni si Eli parohon jea do tu nasida dohot tu halak di Israel. Alai, ndang denggan si Eli maminsang nasida, jala ndang sahalak malim na denggan ibana. (Jaha 1 Samuel 2:23-25.) Nunga godang dosa ni anak ni si Eli na mambahen nasida boi diuhum mate!

15. Aha do sipasingot ni Jahowa tu si Eli, jala songon dia do pangkilalaan ni si Eli?

¹⁵ Nunga mansai balga parsoalan on. Alani i, disuru Jahowa ma ”sada halak ni Debata” paboahon tu si Eli panguhuman na laho masa. Didok Jahowa ma tu si Eli, ”Sumangap angka anakmu sian Ahu dibahen ho.” Alani i, disurirangkon Jahowa ma na laho mate anak ni si Eli di bagasan sadari. Dung i, masa ma hasusaan tu keluarga ni si Eli, jala ndang hot be hamalimon di nasida. Marhamubaon do keluarga ni si Eli alani barita panguhuman i? Ndang adong na patuduhon molo nasida marhamubaon.​—1 Sam. 2:27–3:1.

16. (a) Songon dia do si Samuel lam togu di partondion? (b) Taronjar do rohamuna mangulahon i? Patorang ma.

 ¹⁶ Mangkorhon do hajahaton ni anak ni si Eli tu si Samuel? Ndang mangkorhon tu ibana. Dipaboa di 1 Samuel 2:18, ”Marhalado di jolo ni Jahowa” do si Samuel jala dijumolohon do Jahowa di haposoonna. Didok muse di ayat 21, ”Magodang di adopan ni Jahowa do ianggo si Samuel.” Lam togu do paralealeon ni si Samuel tu Jahowa dung lam magodang ibana. On ma na mangondingi ibana sian ulaon hajahaton.

17, 18. (a) Songon dia do halak Kristen na poso boi maniru si Samuel pasidingkon hajahaton? (b) Aha do na patuduhon molo si Samuel marsitutu mangulahon na sintong?

¹⁷ Boi do gabe tubu sangkap na sala di roha ni si Samuel, ala diboto ibana mangulahon dosa sintua ni malim dohot anakna. Alai, ndang dibahen ibana hasalaan ni na asing gabe sidalian laho mangulahon dosa. Angka na poso saonari, maniru si Samuel na marsitutu ”magodang di adopan ni Jahowa”, nang pe godang na mangulahon hajahaton di humaliang ni nasida.

¹⁸ Aha do labana ala dioloi si Samuel Jahowa? Dipaboa tu hita, ”Anggo si Samuel na bajar i, lam magodang, lam hasian ni Jahowa dohot jolma.” (1 Sam. 2:26) Las do roha ni halak na marsihohot tu Jahowa mangida si Samuel. Jala las do roha ni Jahowa mangida haporseaon ni si Samuel. Dung i, pos do roha ni si Samuel padengganon ni Jahowa do angka na masa di Silo. Alai, olo do ra sungkunsungkun rohana andigan masa i. Di sada tingki, dapotna ma alusna.

19, 20. (a) Gombarhon ma na masa tu si Samuel tingki modom di tabernakel. (b) Songon dia do boi diboto si Samuel ise na manjou ibana, jala songon dia do ibana maradophon si Eli?

¹⁹ Tingki i, golap dope. Galak dope lampu di tabernakel. Tompu ma dibege si Samuel adong na manjou ibana. Ala dirimpu si Eli na manjou i, hehe jala ”marlojong” ma si Samuel mandapothon si Eli naung matua. Boi do tapingkirhon si Samuel ”marlojong” mandapothon si Eli ndang dipangke dope solopna? Taronjar do rohanta mangida si Samuel na patuduhon sangap dohot haburjuon tu si Eli. Di tingki i, sintua ni malim dope si Eli.​—1 Sam. 3:2-5.

²⁰ Didungoi si Samuel ma si Eli, jala didok, ”Ida ma, dison do ahu, ai dijou ho do ahu.” Alai, didok si Eli ndang adong dijou ibana si Samuel, alani i disuru ma muse si Samuel modom. Alai, ro do muse si Samuel sampe tolu hali! Ujungna diboto si Eli ma, Jahowa do na manjou si Samuel. Nunga leleng Jahowa ndang mangalehon tudutudu marhite parnidaan manang panurirangon tu bangsona, alani hajahaton ni nasida. Alani i, diboto si Eli ma na mangkatai do Jahowa muse marhite si Samuel. Disuru si Eli ma si Samuel modom, jala dipaboa ma aha sidohononna. Ndang leleng dungkon i, dibege si Samuel ma muse soara i, ”O Samuel, Samuel!” Dung i, dialusi ibana ma, ”Mangkuling ma Ho, ai mananginangi do naposomon.”​—1 Sam. 3:1, 5-10.

21. Songon dia do hita saonari boi manangihon Jahowa, jala boasa ringkot i?

²¹ Taboto ma, adong dope halak na manangihon hata ni Jahowa di Silo. Jala ditangihon si Samuel do hata ni Jahowa saleleng ngoluna. Songon i do hita saonari? Ndang pola ingkon tapaima Jahowa mangkatai tu hita. Saonari, marhite Bibel boi do tabege soara ni Jahowa. Molo tatangihon soara ni Debata, lam togu ma haporseaonta. Songon i ma na masa tu si Samuel.

22, 23. (a) Songon dia do tona ni Jahowa tu si Samuel saut? (b) Songon dia do goar ni si Samuel lam tarsar?

²² Ndang hea lupa si Samuel tingki dijou Jahowa ibana. I do mulana maraleale ibana tu Jahowa, jala gabe panurirang. Mulana, mabiar do si Samuel pasahathon tona ni Jahowa na paboahon panguhuman tu keluarga ni si Eli. Alai, dipapos si Samuel ma rohana laho paboahon i, jala diundukkon si Eli do hata ni Jahowa i. Ndang sadia leleng saut ma na nidok ni Jahowa: Mate ma si Hopni dohot si Pinehas di bagasan sadari,  tingki marporang halak Israel dohot halak Palistim. Mate do muse si Eli dung diboto naung tartaban Poti Parpadanan.​—1 Sam. 3:10-18; 4:1-18.

²³ Alai, lam tarbarita ma si Samuel sahalak panurirang ni Jahowa. Dipaboa tu hita, ”didongani Jahowa ibana”, jala sude do dipasaut Jahowa naung sinurirangkon ni si Samuel.​—Jaha 1 Samuel 3:19.

24. Aha do na ditontuhon halak Israel, jala boasa on dosa na balga di adopan ni Jahowa?

²⁴ Olo do bangso Israel mangoloi si Samuel jala mambahen hamubaon? Ndang olo. Lomo do roha ni nasida maniru bangso na asing. Dipangido bangso Israel do asa adong raja di nasida. Didok Jahowa ma tu si Samuel asa dioloi pangidoan ni bangso i. Alai, ingkon patuduhonon ni si Samuel do tu nasida naung mardosa nasida. Nasida ndang manjangkon Jahowa gabe Raja ni nasida! Alani i, dijou si Samuel ma bangso i ro tu Gilgal.

25, 26. Songon dia do si Samuel mangurupi bangso Israel mamboto naung mardosa nasida tu Jahowa?

²⁵ Tapingkirhon ma si Samuel mangkatai tu halak Israel na ro tu Gilgal. Ditaringoti si Samuel do songon dia ibana marsihohot tu Jahowa sian na poso. Dung i dipaboa tu hita, ”Joujou ma si Samuel tu Jahowa.”​—1 Sam. 12:17, 18.

²⁶ Ro ma ronggur dohot udan di ari logo. Ndang hea dope masa songon i! Molo adong na so porsea tu si Samuel, manang adong na manginsahi ibana, pintor hohom do ra nasida. Tompu ma mangkolom langit, ro alogo, ronggur, dung i ro ma udan. Songon dia do pangkilalaan ni bangso i? ”Jadi mabiar situtu ma sandok bangso i mida Jahowa dohot mida si Samuel.” Ujungna, diboto nasida ma na mardosa nasida tu Jahowa.​—1 Sam. 12:18, 19.

27. Songon dia do pangkilalaan ni Debata tu halak na maniru si Samuel?

²⁷ Alai, Debata Jahowa do na paubahon roha ni bangso Israel. Sian na poso sahat tu na matua, marhaporseaon do si Samuel tu Debata. Jala dipasupasu Jahowa do ibana. Sahat tu saonari, dipasupasu dope halak na maniru haporseaon ni si Samuel.